Моќната експлозија којашто во понеделникот го потресе деловниот и туристички центар на тајландската престолнина Бангкок во непосредна близина на најголемиот трговски центар и главното хиндуистичко светилиште, според последните податоци, однесе 27 човечки животи, а уште повеќе од 80 луѓе се ранети.

Експлозијата во центарот на Бангкок од понеделникот вечерта по локално време, локалните власти ја квалификуваа како терористички напад. Во непосредна близина на местото на експлозијата предизвикана со мотоцикл-бомба, полицијата открила уште една експлозивна направа, а подоцна на 30 метри од местото на нападот пред влезот во луксузниот трговски центар „Кесон Плаза“ е откриена и третата бомба.

Последните извештаи говорат дека во терористичкиот напад се убиени 27 луѓе, а над 80 се ранети. Според локалните медиуми, меѓу загинатите се осум странски државјани, чија националност не е соопштена. Властите официјално го потврдија загинувањето на четири странци. Претходно тајландските медиуми објавија дека најголем број од настраданите се кинески туристи.

„Загинаа 27 луѓе, меѓи нив четворица се државјани на странски земји, од кои тројца се државјани на Кина“, изјави за националната телевизија началникот на тајландската полиција, генерал-полковникот Самијот Пум Пан Мианг. Според телевизијата Nation TV, во болниците најмногу се хоспитализирани од Кина и од Тајван.

Полицијата, исто така, соопшти дека во болницата во близина на местото на експлозијата се пренесени најголемиот број повредени, но дека се јавил проблем со јазичната бариера. Покрај тоа, според локалните медиуми, оваа клиника има недостиг од крв за трансфузија, па затоа директорот на болницата апелирал до локалните жители да донираат крв од која и да е крвна група.

Тајландските власти велат дека мотивите на напаѓачите во центарот на главниот град сé уште не се јасни.

„Сé уште не е јасно кои се мотивите на злосторниците. Може да биде политиката, може да биде тероризмот“, изјави за националната телевизија министерот за одбрана, генерал-полковникот Правит Вонгсуван.

Тој, исто така, претпоставува дека целта на напаѓачите била да се нанесе удар на туристичкиот сектор на Тајланд, кој е важна економска гранка за оваа земја во југоисточна Азија. „Тоа беше бомба ТНТ. Напаѓачите планирале да ги уништат економијата и туризмот на земјата, имајќи предвид дека експлозијата се случи во срцето на туристичка област“, додаде Вонгсуван, пренесува Reuters.

Хиндуистичкиот храм Ераван, е сместен во фреквентниот кварт преполни со хотели, трговски центри, канцеларии на компании и болници, и е туристичка атракција за азиските посетители.

Тајландската влада заседава во ткн „воената соба, за да го координира одговорот на нападот, го цитира AFP премиерот Прајута Чан-очу. Воената хунта ги повика граѓаните да останат мирни. „Ги повикувам сите да останат прибрани и да не шират шпекулации кои би предизвикале паника“, соопшти портпаролот на владата додавајќи дека „властите ја држат ситуацијата под контрола“. Низ целиот Бангкок се поставени контролни пунктови на поважните градски сообраќајници и туристички локации.

Досега никој не ја презема одговорноста за нападот. Тајландските власти со години се борат со муслиманскиот бунт кој е оценет со низок интензитети, и е концентриран на областа на Малајскиот полуостров населен со доминантно муслиманско население, па бомбашките напади надвор од овој регион досега беа релативно ретки. Во Тајланд, исто така, понекогаш избувнуваат многу насилни судири меѓу ривалските политички групи./крај/мф/сн

Извор: Макфакс