Црна хроника
Жртвите не биле малтретирани пред и по убиството
По направените обдукции врз телата на убиените кај Смилковци, на телата на жртвите не се најдени друг вид повреди освен прострелните рани, рекоа во неделата специјалистите од Судска медицина кои го вршеле вештачењето, Билјана Јаневска и Златко Јаќовски.
Според наодите на Судска медицина, не се забележани повреди нанесени пред или по настапувањето на смртта. Тоа покажува, според експертите, дека жртвите не биле претходно малтретирани. Скршениците на вилицата и на ногата кај некои од жртвите, биле предизвикани од проектилите со коишто било пукано кон нив .
„И тие скршувања што се најдени кај некого на вилицата, кај некого на рбетот се скршувања затоа што каналот на огнострелната повреда поминувал од таму. Не сме нашле траги дека биле врзани. Такви повреди не се најдени, сите повреди се од огнострелните рани“ изјави Билјана Јаневска, специјалист по судска медицина.
Некои од жртвите биле убиени од непосредна близина, додека за некои се чека целосно исушување на облеката за да може да се утврди од која далечина било пукано во нив.
Кај сите жртви најдени се по неколку прострелни рани, во грбот, главата и градниот кош. Пронајден е само еден куршум во телата на егзекутираните, што ги потврдува сомневањата дека злосторниците употребиле оружје со голема моќност.
Од таму не можат да кажат од која страна било пукано врз убиените, од задната или од предната.
„Имаме ние правци, канали, се работи за една динамика. Секој од починатите има по неколку огнострелни повреди и конечно за динамиката на самиот настан каде кој стоел и од каде е пукано, такво мислење даваме заедно со балистичарите. Има и од задната страна на телата има на грбот на градниот кош и од лево и од десно, нема една строга дефинираност со еден правец на протегање“ рече Јаневска.
Вештачењето го направиле три екипи со над 10 лица. Обдукцијата била направена по европски стандарди и е обезбдена фотодокументација и материјални докази за второ мислење.
Во четвртокот вечерта кај езерото во атарот на скопското село Смилковци, беа убиени Александар Наќовски, Цветанчо Ацевски, Кире Тричковски и Филип Славковски на возраст од 18 до 20 години од скопската населба Радишани и 45-годишниот Борче Стефковски од село Црешово додека ловеле риба на езерото кај Смилковци. Сé уште не се познати мотивите за ова грозоморно злосторство /крај/мф/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Топ
Три лица, меѓу кои и полицаец, осомничени за разбојништво и противправно лишување од слобода
Јавен обвинител од Основното јавно обвинителство Скопје донесе Наредба за спроведување истражна постапка против две лица кои како соизвршители се осомничени за кривични дела – Разбојништво од член 237 став 1 и Противправно лишување од слобода согласно член 140 став 5 од Кривичниот законик.
Двајцата се осомничени дека на 23 април противправно лишиле од слобода едно лице, така што го повикале да излезе со изговор дека им е потребна помош, а потоа присилно го внеле во автомобил и се упатиле кон мостот на улицата “Беласица”.
Со возилото управувало трето лице – полициски службеник против кого постапката е издвоена и ќе ја води Одделението за гонење кривични дела сторени од лица со полициски овластувања и припадници на затворската полиција при Основното јавно обвинителство за гонење на организиран криминал и корупција.
Додека полицискиот службеник возел, двајцата други осомничени му се заканувале на оштетениот и му нанеле убодни рани со нож во ногата и во рамото. Кога стигнале под мостот, насилно го извадиле од автомобилот и сите тројца физички го нападнале со удари со клоци и тупаници по целото тело, нанесувајќи му тешки повреди.
Му одзеле околу 8.000 денари колку што имал оштетениот со себе во моментот, а потоа го пуштиле да си оди со закана дека доколку до 1 мај не им исплати 10.000 евра ќе го убијат и него и неговиот татко.
Основното јавно обвинителство Скопје до Основниот кривичен суд Скопје достави предлог за определување мерка притвор за двајцата осомничени против кои постапува. Едниот од нив е во бегство и притворската мерка ќе започне да се применува од неговото пронаоѓање и лишување од слобода.
Топ
Уапсени крадци на автомобили – ги расклопувале за делови
Единицата за внатрешни работи Центар и Бит Пазар при СВР Скопје поднесе кривична пријава против Ш.Н.(68) од Липково, поради постоење основи на сомнение за сторени 4 кривични дела „одземање на моторно возило“, од кои три на подрачјето на скопски Центар и едно на подрачјето на општина Аеродром, како и против Ф.Љ.(22) од Скопје, поради постоење основи на сомнение за сторено кривични дело „помагање“.
Имено, првопријавениот кривичните дела ги извршил во последните два месеца, така што со употреба на физичка сила и погоден алат ги отворал бравите од возилата, ги одземал возилата и ги предавал на второпријавениот, каде што возилата биле расклопувани и продавани за делови.
Полициски службеници со судска наредба извршиле претрес на локација, сопственост на Ф.Љ., каде биле пронајдени поголема количина делови од возила кои потекнуваат од кривичните дела. Известен бил Јавен обвинител, а од страна на Судија на претходна постапка на Ш.Н. му е одредена мерка притвор.
Топ
Две жртви во сообраќајката на патот Радовиш-Штип, уште едно лице повредено
Две лица загинаа на лице место во сообраќајната несреќа што се случи попладнево на магистралниот пат Радовиш-Штип.
Во несреќата е повредена и сопатничката од едното возило, која е пренесена во штипската Болница.
Веста за „Макфакс“ ја потврди портпаролката на СВР Струмица, Александра Трајанова, која информираше дека во несреќата учествувале автомобили „пасат“ и „опел“.
„На местото на несреќата починале возачите на двете возила, смртта ја констатирал лекар од „ЈЗУ Здравствен дом Радовиш“ а сопатничка од патничкото возило „опел” била пренесена во Медицински центар Штип“, информира Трајанова.
Увид на местото на несреќата врши јавен обвинител, а сообраќајот се пренасочува по стариот пат.
Од полицијата повеќе детали за несреќата најавуваат за утре.