Македонија
(Видео) Актерките за сексуалното насилство: жртвите не смее да бидат обвинувани
Четири наши глумици од разни генерации застанаа во одбрана на жртвите на сексуалното насилство и ги поддржаа колешките од регионот, кои, по случајот со актерката Милена Радуловиќ, се охрабрија да зборуваат за своите искуства со сексуалните предатори. Иако кај нас досега ниедна од актерките не се огласи со слични искуства, тоа не значи дека ги нема, согласни се глумиците Весна Петрушевска, Ивана Павлаковиќ, Кристина Леловац и Изабела Јакимова. Во дебатата тие беа едноглсни дека се свесни како поединци сè уште гледаат на професијата актерка и дека уште при изборот на оваа професија слушале коментари: „Биди спремна дека може да бидеш сексуално вознемирувана“. Отворено и искрено зборуваа за сите состојби што во изминатиот период ја бранува јавноста, случајот „Јавна соба“, силувањата, менталитетот на осуда на жртвите, говорот на омраза, некултурата.
„Ние не сме вреќа компири, голотијата во уметноста е оправдана и точно се знае зошто една глумица во функција на една сцена ќе се соблече“, вели Павлаковиќ.
Според Леловац, интегритетот на глумицата е важен, но изложеноста на машки ситуации не секогаш значи дека доаѓа од маж.
Петрушевска вели дека актерската професија подразбира слобода и љубов и дека е злосторство некој да ја изневери довербата што едно дете ја гради кон својот учител или професор по глума.
Јакимова вели дека проблемот на девојката Ана, чија фотографија во бикини завршила во „Јавна соба“, е тоа што имаме систем на неказнивост и негуваме култура во која не се почитува приватноста.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Православните верници го слават Велигден
Православните верници денеска го слават најголемиот христијански празник Велигден – Христовото воскресение, ден кога Исус Христос ја докажал својата божествена моќ и воскреснал од мртвите. Воскресението Христово на полноќ беше објавено во сите храмови на Македонската православна црква, а денеска се одржуваат воскресенски литургии.
Поглаварот на МПЦ-ОА г.г. Стефан богослужеше во Соборниот храм „Свети Климент Охридски“ во Скопје од каде го објави Христовото Воскресение и упати Велигденски пораки.
Македонија
Посебен сообраќаен режим утре и задутре во Тетово поради предизборни митинзи
СВР Тетово информира дека поради одржување на митинзи на политичките партии во рамки на предизборната кампања во следните два дена (недела и понеделник) ќе има посебен сообраќаен режим во центарот на градот.
– Ќе се воведе посебен режим на сообраќајот и тоа по булевар „Илирија“од влезот на Тетово сè до плоштадот, односно кружниот тек со булевар „Илинденска”, при што нема да се дозволува паркирање на возилата низ булеварот. Исто така, за време на митинзите сообраќајот ќе биде пренасочен по другите улици, и тоа по улиците „ЈНА“, „Тодор Ципоски-Мерџан”, „Јане Сандански“ и улица „Никола Тесла“, се вели во соопштението на СВР Тетово.
Отттаму со апел возачите да бидат трпеливи и да ги почитуваат наредбите што ќе ги издаваат полициските службеници.
Македонија
Ковачевски: Имаме задача да не се откажеме од европскиот сон за подобра и просперитетна држава за идните генерации
„Нашата генерација има задача да не се откаже од европскиот сон на земјата и да направи сè за Македонија да стане рамноправна членка на Европската Унија“, порача претседателот на СДСМ, Димитар Ковачевски, на митингот на Коалицијата за европска иднина во Кичево.
Ковачевски истакна дека денеска кога чествуваме 121 година од смртта на македонскиот револуционер, идеолог и учител, Гоце Делчев, важно е да се потсетиме дека низ историјата нашиот народ не се откажувал дури ни пред најтешките предизвици. Порача дека 8 мај е нов историски крстопат, денот кога сите прогресивни и демократски сили во државата треба да одлучат државата одлучно да продолжи на патот кон Европската Унија.
„Само така ќе изградиме подобра и просперитетна држава за идните генерации. Држава со европски животен стандард, европски вредности, европски правила на игра“, рече Ковачевски.
Ако ВМРО ДПМНЕ и Силјановска се дограбат до власта, ќе стават рампа на патот на Македонија кон Брисел и ќе можеме да се збогуваме од ЕУ, истакна Ковачевски.
„Не смееме да ја повториме грешката од минатото и да дадеме преголема моќ во рацете на десничарска партија како ВМРО ДПМНЕ. Уште се свежи раните што ѝ ги нанесоа на државата за време на нивното 11-годишно владеење на Македонија. Сетете се на заробените медиуми, замолчените вработени во јавниот сектор, натепаните студенти во библиотеките и плоштадите. Сетете се на милионите потрошени за жални врби, лажен барок, евтин стиропор само за да се богатат поединци од ВМРО – ДПМНЕ“, истакна Ковачевски.
Лидерот на СДСМ пред граѓаните на Кичево најави повисоки плати и пензии, пакети за поддршка на учениците и студентите, одговорна социјална политика и одлучна борба против криминалот и корупцијата.