Претседателот на Милан, Паоло Скарони (78), истакна дека Интер и Милан ќе го добијат најдобриот стадион во Европа до 2031 година, кој ќе биде гордост на сите граѓани на Милано, објавија италијанските медиуми.

„Проектот за нов стадион во градскиот округ Сан Сиро е во изработка веќе долго време, инвестирани се многу пари и сигурно ќе ја постигнеме зацртаната цел. Милан и Интер ќе го добијат најдобриот стадион во Европа, на кој сите граѓани на Милано ќе бидат горди“, рече Скарони, претприемач кој за време на својата бизнис кариера беше на чело на италијанските енергетски компании Енел и Ени.

Компанијата „Популос“ е одговорна за прелиминарниот дизајн на стадионот. Стадионот е дел од генералниот план за ревитализација на клучна урбана област на Милано во округ посветен на спорт и забава.

Општина Милано, исто така, одлучи да го трансформира квартот Сан Сиро во пешачка зона со околу 110.000 квадратни метри зелена површина (40 проценти од вкупната квадратура).

Паркингот, кој моментално зафаќа 40% од целиот простор, ќе биде преместен во целосно подземен простор. Повеќето спортски и рекреативни објекти, затворени и отворени, ќе бидат бесплатни или субвенционирани од градот.

Правоаголниот стадион со 60.000 седишта е инспириран од градските знаменитости, како што се Дуомо ди Милано и Галерија Виторио Емануеле, па и прекарото на овој предложен дизајн е „Катедрала“. Околу стадионот ќе има вертикални летвички кои ќе се издигаат и ќе го поддржуваат стаклениот ѕид што го опкружува просторот наречен дневна галерија. Внатрешната структура на стадионот е дизајнирана да биде „најинтимна во Европа“, доближувајќи ги гледачите што е можно поблиску до игралиштето.

Оваа недела, секторскиот комитет на Градскиот совет на Милано даде зелено светло за купување на земјиштето на кое се наоѓа стадионот „Џузепе Меаца“. За земјиштето, кое го вклучува и околниот простор околу стадионот, Интер и Милан ќе треба да платат 197 милиони евра. Проектот на новиот стадион има поддршка од градоначалникот на Милано, Џузепе Сала, а целата постапка во Градскиот совет треба да биде завршена до крајот на септември.

Се проценува дека конечната цена на изградбата на новиот стадион ќе биде околу една милијарда евра.

Сè уште не е утврдено дали сегашниот стадион „Џузепе Меаца“, со капацитет од 75.000 гледачи, ќе биде делумно или целосно срушен. Последното големо реновирање на стадионот се случи пред Светското првенство во 1990 година, чиј домаќин беше Италија.

Рокот за завршување на стадионот до 2031 година беше поставен за да може да биде домаќин на натпревари од ЕУРО 2032, чии домаќини се Италија и Турција.

Синот на легендарниот француски фудбалер Зинедин Зидан, Лука, госмени спортското државјанство и во иднина ќе игра за Алжир, објави денес Светската фудбалска федерација (ФИФА).

Како што објави ФИФА, барањето на Лука Зидан е одобрено бидејќи тој никогаш не бранел за Франција во сениорската конкуренција, туку само во помладите категории.

Лука Зидан има 27 години и го брани голот на шпанскиот второлигаш Гранада, а според најавите, селекторот на Алжир, Владимир Петковиќ, ќе го покани да дебитира во октомври, кога Алжир ќе игра против Сомалија и Уганда во квалификациите за Светското првенство.

Алжир е на чекор од директен пласман на Светското првенство, во квалификациската група Г има 19 бода, четири повеќе од Уганда и Мозамбик, а остануваат уште две кола.

Пред дербито со Арсенал, менаџерот на Манчестер сити, Пеп Гвардиола, зборуваше и за својот пријател и поранешен помошник Микел Артета, сегашниот менаџер на лондонските „топџии“.

Дербито на петтото коло од Премиер лигата се игра во недела во Лондон, каде што Арсенал го пречекува Манчестер Сити.

„Топџиите“ беа вицешампиони на Англија во последните три сезони, двапати зад „граѓаните“ на Гвардиола, а минатата сезона зад Ливерпул на Арне Слот. Сега тие повторно се меѓу најсериозните кандидати за титулата, особено откако доведоа неколку исклучително квалитетни засилувања.

„Сакам да му кажам на мојот пријател, Микел Артета, ако ја освои титулата во Премиер лигата, тоа ќе биде само поради вложените пари, а не затоа што тој и неговите играчи работеа напорно“, им рече Пеп Гвардиола на собраните новинари и додаде:

„Исто како и Ливерпул. Ако Арне Слот повторно ја освои титулата, тоа ќе биде затоа што потроши многу пари оваа година, нели? Затоа што тоа не му се случи само на Манчестер сити, нели? Значи, сите го прават тоа…“.

Манчестер сити е најуспешниот тим во Премиер лигата во последната деценија, во претходните осум сезони беше шампион шест пати, но медиумите секогаш констатираа дека тоа е најмногу поради многу потрошени пари.

„Со години, секој клуб може да прави што сака. Знам дека начинот на кој се однесуваат кон нас е сосема различен, но сите клубови трошат затоа што сакаат“, рече Шпанецот.

По четири одиграни натпревари, тимот на Гвардиола има две победи и исто толку порази, и со шест бода го зазема осмото место на табелата во Премиер лигата. Ливерпул е прв со максимални 12 бода, Арсенал втор со девет.

Фото/ Принтскрин