Македонија
Захариева: Не ни е целта да ѝ ги расипеме односите на Македонија со Србија

Целта на Бугарија не е да ги расипе односите помеѓу Србија и Северна Македонија, изјави бугарската министерка за надворешни работи, Екатерина Захариева, во интервју за „24 часа.бг“.
Сепак, таа вели дека е видливо оти Белград има силно влијание во Скопје и постои тенденција за приближување до српскиот јазик, бизнисот и институциите.
„Овој тренд не запре во последните 30 години и ова е разбирливо. Но, целта на Бугарија не е да им ги расипе нивните пријателски односи. Нека бидат пријатели. Ние само сакаме да имаме пријателски однос. Ајде сите да бидеме пријатели, да бидеме поврзани и да градиме заедно“, рече Захариева.
Министерката ги оцени како добри односите на Софија и Белград издвојувајќи ја изградбата на автопатот, кој ќе ги поврзува двете земји. Додаде дека бугарските власти во Србија секогаш го поставуваат и прашањето за бугарското малцинско таму, пристапот до образованието и учебниците на мајчин јазик, како и развојот на регионот.
Во однос на соработката со Скопје, таа нагласи дека не може повеќе да нема железничка линија помеѓу Бугарија и Македонија, како и бариери за бугарските компании.
„Со Република Северна Македонија се чини дека има нешто што не е доречено и завршено во последните години, иако ова не е само во последните години“, вели Захариева.
Таа понатаму додаде дека обидот да се претстави Бугарија како историски реваншист е крајно неприфатлив бидејќи нашите проблеми се реални. Рече дека мора да се надминат недоразбирањата бидејќи не е во ред во 21 век да се победува на избори со кампања против соседни земји.
Захариева додаде и дека не сакала толку многу да се водат преговорите пред медиумите, што довело до тешка реторика бидејќи потоа е тешко да се откажете од изговорените зборови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без вода дел од Кисела Вода

Регионалниот центар за управување со кризи на Град Скопје, по добиеното известување од ЈП Водовод и канализација, информира дека денеска поради изведување на водоводен приклучок на водоводна мрежа со пречник од Ф-150 мм на улицата Христо Татарчев бр. 47, прекинато водоснабдување ќе имаат корисниците од истата улица и кулите – Расдник, oпштина Кисела Вода.
Водоснабдувањето ќе биде прекинато од 09:00 часот до завршување на работните активности.
Македонија
Сончево и топло, максималната температура ќе достигне до 34 степени

Времето денеска ќе биде сончево и топло со мала локална облачност. Ќе дува слаб до умерен, а наместа долж Повардарието повремено засилен ветер од северен правец. Минималната температура ќе биде во интервал од 9 до 19, а максималната ќе достигне од 27 до 34 степени.
Во Скопје, сончево и топло. Ќе дува умерен, во делови од котлината повремено засилен ветер од северен правец. Минималната температура ќе се спушти до 17, а максималната ќе достигне до 34 степени.
Времето во наредните денови
Во следните денови времето ќе биде стабилно, претежно сончево и топло. Ќе дува умерен, во сабота наместа долж Повардарието повремено засилен северен ветер.
Македонија
„Уапсени се полицајци и полициски функционери кои биле на смена кобната вечер“: СДСМ ја поздрави акцијата на ОЈО ГОК за Кочани

„Ја поздравуваме вечерашната акција на Обвинителството за организиран криминал и корупција во која се лишени од слобода полицајци и полициски функционери кои биле на смена кобната вечер на 16 март во т.н. дискотека Пулс во Кочани“, соопшти СДСМ.
„Фактот што четири месеци ВМРО-ДПМНЕ се обидуваше да ја сокрие одговорноста на полицајците и полициските функционери, фактот што нивната вина беше негирана од страна на Панче Тошковски и Христијан Мицкоски укажува на тоа дека сите биле вмешани или на некој начин знаеле за нелегалното работење на Пулс и тоа го одобрувале.
Само поради обидите да се сокрие одговорноста од страна на Тошковски и Мицкоски на лицата кои тие ги поставија за полицајци, командири и началници би требало веднаш да си поднесат оставки.
Одговорност мора да има и за Александар Јанев, директорот на БЈБ. Тошковски и Јанев не смеат повеќе да ја попречуваат истрагата ниту да влијаат некој да не сноси одговорност.
Вистината за Кочани која цела недела ја објавуваше СДСМ е точна. Се покажа дека без силен притисок на јавноста, на дел од медиумите и на СДСМ нема да има правда за Кочани. Време е за одговорност, време е за оставки“, се додава во соопштението на СДСМ.