Регион
(Видео) Пукање во Сараево: Истрели кон раперот Буба Корели и негов роднина

Попладнево околу 16:30 часот дошло до пукање од огнено оружје на улицата Џемал Биједиќ во сараевската населба Ступ, во кое две лица биле повредени, пренесуваат регионалните медиуми.
Наводно било пукано во Омар, роднина на музичарот Амар Хоџиќ, попознат како Буба Корели, кој исто така бил со него, пишува „Дневни аваз“. Во инцидентот, според непотврдени информации, Омар бил ранет.
„Полициските службеници излегоа на местото на настанот и пронајдоа две повредени лица“, соопштија од Центарот за операции на Министерството на внатрешни работи при кантонот Сараево, од каде додаваат дека повредените биле пренесени на универзитетскиот Клинички центар.
На кратко видео, кое беше објавено од порталот „Кликс.ба“, се прикажани пет лица, но не е познато колку од нив имаат врска со пукањето.
Според првичните информации, едно лице било приведено на местото на настанот под сомнение дека има врска со инцидентот.
Неофицијално, пукал син на поранешен полицаец чиј автомобил бил уништен во експлозија во населбата Нова Отока пред неколку месеци.
Откако веста се прошири во медиумите, познатиот рапер објави дека се нашол во погрешно време, на погрешно место.
„По повод денешниот инцидент, моето име беше споменато во некои медиуми. Се најдов на погрешно место, во погрешно време и во никој случај не сум поврзан со тој настан“, соопшти Буба Корели.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вештак открива детали за момчето-убиец од Белград: „Сакал да биде психопат“

Вишиот суд во Белград на 5 јуни ја продолжи кривичната постапка против родителите на момчето (Коста К.) кое уби 10 лица во основното училиште „Владислав Рибникар“ во мај минатата година. На судењето присуствуваше судскиот експерт за невропсихијатрија д-р Анета Лакиќ, која ги презентираше наодите од психијатриското и психолошкото испитување на момчето, објавува Блиц.
Според неа, момчето не покажало знаци на каење, иако било свесно за сериозноста на своите постапки. Тој изјавил дека немало да го стори тоа што го сторил доколку знаел какви ќе бидат последиците, но не изразил никакви чувства на вина. Вештакот истакнал дека момчето систематски се обидува да ја минимизира сериозноста на кривичното дело и користи одбранбени механизми за да избегне непријатни прашања – на пример, го прекинува разговорот и го бара својот лекар.
Според наодите, момчето било свесно дека поради неговата возраст нема да биде кривично одговорно. Веднаш по извршувањето на кривичното дело, знаело кого да повика и како да се однесува. Тој исто така изјавил дека се чувствува безбедно бидејќи, како што рекол, е „заштитен од одмаздата на оние чии деца ги убил“.
„Кога нешто во разговорот го вознемирува и прави да се чувствува непријатно, тој совршено добро знае како да прекине, веднаш станува и вели: ‘Сакам да го посетам мојот лекар’. Тој го прави ова за да се заштити“, заклучи Лакиќ.
За време на вештачењето, исто така беше споменато дека пред да го изврши злосторството, момчето пребарувало на интернет информации за доживотни и смртни казни, и наводно очекувало да заврши во затворска установа каде што ќе има мир и ќе чита книги.
Вештакот исто така изјави дека момчето изјавило дека „некое време сакал да стане ‘психопат’, инспириран од случаите на момчиња убијци од САД, но дека подоцна се откажал од тоа“.
Зборувајќи за неговите семејни односи, тој изјави дека бил најблизок со неговата баба и чичко, додека остатокот од неговото семејство го опиша како „проколнат“. Д-р Лакиќ додаде дека момчето давало лажни информации за своето здравје, како на пример дека има астма и дека неговиот дедо починал, што го користел за да избегнува училиште.
Кога адвокатот ја прашал зошто не разговарала со родителите на обвинетиот, вештакот објаснил дека таков разговор би можел да ги компромитира наодите бидејќи целта била да се процени перцепцијата и расудувањето на момчето во времето на кривичното дело.
Судската постапка против родителите на момчето продолжува.
Регион
(Фото) Аеродромот во Загреб затворен за сообраќај – мал авион слета надвор од пистата

Аеродромот „Фрањо Туѓман“ во Загреб денеска попладне беше затворен за сообраќај поради инцидент со приватен авион кој се излизгал од пистата, пишува Индекс.
Инцидентот се случил околу 15:21 часот, при слетување на приватен авион од типот Cessna 525.
Леталото проклизнало и завршило на тревната површина покрај пистата.
Според информации од авиокомпанијата, авионот бил празен и во инцидентот нема повредени.
Во моментот се преземаат мерки за отстранување на леталото од пистата, а аеродромот останува затворен до понатамошно известување.
Од Аеродромот „Фрањо Туѓман“ се извинија на патниците за доцнењата на пристигнувачките и поаѓачките летови и најавија дека јавноста ќе биде навремено информирана кога сообраќајот повторно ќе биде воспоставен.
Регион
Локални избори во Заечар и Косјериќ

Денеска во Заечар и Косјериќ се одржуваат редовни локални избори, на кои се избираат советници во општинските совети на овие две локални самоуправи. Гласачките места се отворија утрово во 7:00 часот, а се затворија во 20:00 часот.
Осум изборни листи учествуваат на изборите во Заечар и три во Косјериќ. Изборниот молк ќе трае до затворањето на гласачките места.
Министерот за внатрешни работи на Србија, Ивица Дачиќ, изјави дека нарушувањето на изборите е кривично дело и дека полицијата ќе реагира.
– Полицијата мора да си ја врши својата работа. Во кривичниот законик постои кривично дело попречување на избори. Доколку некој крши гласачки кутии или им попречува на луѓето да гласаат, тоа нема да биде дозволено – рече Дачиќ.
Општина Косјериќ има околу 10.000 жители, а право на глас имаат 8.897 гласачи.
Според податоците на Градската изборна комисија, вкупниот број на гласачи на територијата на Заечар е 47.357.
Прелиминарните резултати се очекуваат вечерва.