Македонија
Радев: 100.000 граѓани во Македонија имаат бугарско државјанство, да се почитуваат нивните права
Бугарскиот претседател, Румен Радев, повикува на навремен одговор од одговорните институции во Бугарија и Македонија за проблемите со кои се соочуваат нивните државајни во земјава.
Ова следи по писмото од Бугари од Македонија, во кое тие изразуваат загриженост за нивна дискриминација.
Претседателот верува дека човековите права и заштитата од дискриминација се во срцето на демократијата. Тие се исто така основен дел од копенхашките критериуми за членство во Европската унија. Според шефот на државата, „почитувањето на слободното право на самоопределување на Бугарите во Македонија, кои и покрај сите репресии во тоталитарното минато, го зачуваа и отворено го искажуваат својот бугарски национален идентитет, претставува клучен чекор во развојот на добрососедските односи“.
Радев подвлече дека над сто илјади граѓани на Република Северна Македонија имаат бугарско државјанство, стекнато врз основа на слободно изразување на волја и документарна потврда за нивното бугарско етничко потекло. Илјадници други се во процес на разгледување на нивните апликации за бугарско државјанство.
„Очекуваме овие објективни факти да најдат израз во спротивставувањето на официјалните власти во РСМ против алармантните димензии на јазикот на омраза кон Бугарија и Бугарите во РСМ. Бугарите во Република Северна Македонија мора да имаат еднакви права со другите граѓани на земјата во согласност со највисоките светски и европски стандарди. Овој основен принцип на демократија е вграден во духот на Договорот за пријателство, добрососедство и соработка меѓу двете земји од 2017 година“, вели Радев.
Тој ги поддржува апелите во писмото до бугарските институции за олеснување на постапките за стекнување бугарско државјанство кои отворено го изјаснуваат својот бугарски идентитет, и институциите во Македонија да ги создадат сите услови и да го гарантираат правото на слобода и јасна изјава на волја да се дефинираат како Бугари по потекло во согласност со принципите на меѓународното право.
Бугарското МНР: Ние секогаш одговараме на сигналите за дискриминација на Бугарите во РСМ
По изјавата на Радев, реакција стигна од бугарското Министерство за надворешни работи, од каде што велат дека секогаш одговарале на сигналите за дискриминација на нивните сонародници во Република Северна Македонија на сите дипломатски нивоа и често ги објавувале овие постапки во јавноста.
„Задоволни сме што шефот на државата го дели нашиот став дека Република Северна Македонија мора да го почитува правото на самоопределување на сите свои граѓани, вклучително и на оние со бугарски идентитет“, соопшти Министерството.
Писмо од Бугарите во Македонија
Писмото до највисоките бугарски институции беше испратено од Центарот за култура „Иван Михаилов“ во Битола.
Авторите посочуваат дека за неколку недели ќе се одржи попис во Македонија. Во врска со ова, тие бараат од бугарската држава да им обезбеди поголема безбедност со тоа што ќе им овозможи на сите оние кои се регистрираат како „македонски Бугари“ полесно да добијат бугарско државјанство.
Радев истакна дека тој го поддржува барањето.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) МВР: Изборниот ден тече мирно со регистрирани помали инциденти
До сега Министерството за внатрешни работи нема регистрирано посериозни нарушувања на јавниот ред и мир во текот на гласањето, кое, генерално, се одвива мирно, без проблеми, соопшти портпаролот на МВР Тони Ангеловски на денешната прес конференција.
„Од отворањето на гласачките места до 11.00 часот регистрираме две пријави за поставен штанд на политичка партија во близина на гласачко место во Шуто Оризари, како и за залепени плакати и расфрлани летоци на подрачјето на Чаир во Скопје и се преземааат мерки за расчистување на случаите. Исто така, имаме пријави за агитирање во Тетово, Скопје, Куманово село Баница, струмичко и општина Боговиње, но по преземени мерки од страна на полициските службеници, тие наводи до сега не се потврдени“, соопшти Ангеловски.
Министерството за внатрешни работи апелира до граѓаните и до учесниците во изборите и во останатиот дел од гласањето да се воздржат од инциденти, а доколку има било какво нарушување на изборниот процес граѓаните веднаш да ја известат полицијата на броевите 192 и 112 или да пријават во најблиската полициска станица.
Македонија
Со УВ ламба и спреј ќе продолжи гласањето на избирачки места во Кочани, Охрид и Куманово
На едно избирачко место во Кочани, едно во Охрид и едно во Куманово, каде што утрово беа пријавени технички проблеми со биометриските уреди, гласањето ќе продолжи со УВ ламба и спреј. Претседателот на Државната изборна комисија Александар Даштевски рече дека на сите останати места гласањето се тече без проблеми.
„Што се однесува до избирачките места кои ова утро имаа проблеми со користење на техничките апарати, во три избирачки места се отстранети, а во три ќе се продолжи со гласање со УВ ламба и спреј. Тоа се 0838/1 во Кочани, 1252 во Охрид и 1100 во Куманово. Само на тие места ќе се гласа на стариот начин бидејќи на сите други места гласањето е во ред“, рече претседателот Даштевски.
Технички проблеми со биометриските уреди утрово беа пријавени и на гласачки места во Тетово и во Гази Баба.
До 11 часот во ДИК стигнале 164 приговори за лично избирачко право. Од нив 50 се усвоени и на гласачите им е овозможено да го остварат правото на глас, седум приговори се отфрлени како неуредни, а девет приговори се одбиени. Останатите се уште се во обработка.
Македонија
Одѕивот на претседателските избори до 11 часот е 12,87 отсто, а на парламентарните 13,69 отсто
Според податоците од 2080 избирачки места за претседател на државата до 11 часот гласале 12,87 отсто од гласачите. Државната изборна комисија (ДИК) соопшти дека од вкупно запишани 1.096. 219 гласачи на овие избирачки места гласале 141.087 гласачи односно 12,87 отсто.
Најголем одѕив за претседателските избори има во Пробиштип 27,85 отсто, а најмал е одѕивот во Липково 1,76 отсто.
„Може да се забележи дека во Источна и Централна Македонија многу повеќе гласачи гласале на претседателските избори отколку во Западна Македонија каде што процентот е многу низок“, рече претседателот на ДИК Александар Даштевски.
До 11 часот пристигнати се податоци за одѕив на гласачите за парламентарните избори од 1.976 избирачки места. Од вкупно запишани 1. 030.092 гласачи на овие избирачки места гласале 140.990 граѓани. Одѕивот е 13,69 отсто. Најголем одѕив на парламентарните избори има во Кривогаштани 28.38 отсто, а најмал е одѕивот во Врапчиште 5,2 отсто.
Претседателот Даштевски речe дека споредено со парламентарните избори во 2020 година на денешните избори има зголемување на одѕивот од 2,69 отсто.