Од Министерството за здравство информираат дека минатата година биле реализирани 446 нови вработувања во јавно-здравствени установи во државата. Од почетокот 2020 година 164 доктори, 247 медицински сестри и 35 специјалисти добиле статус на вработени на неопределено време.

„Вложувањата во човечки капитал во здравството не застанаа, дури ни во време на пандемија. Пандемијата покажа колку се значајни здравствените работници, тие се столбот на нашето здравство. Со нови вработувања и зголемувањата на платите создаваме услови секој млад здравствен работник својата иднина и кариера да ги гледа во својата земја. Се залагаме за подобрување на условите во кои тие работат и ги слушаме нивните потреби. Отворени сме за соработка со младите како никогаш досега“, истакнува министерот Венко Филипче.

Според него, во изминатите 3 години дадени се повеќе од 5.000 согласности за вработување во јавно-здравствените установи и првпат се платени приватните специјализанти во висина од просечна плата на општ лекар, со што тие се изедначуваат со статусот на своите колеги.

„Во септември 2018 година на 19.123 вработени во јавно-здравствените установи им се зголеми основицата за плата 5 %. Во јануари 2019 година следуваше дополнително зголемување на платите на здравствените работници – доктори, медицински сестри, болничари, техничари. 5 % за медицинските сестри, 8 % на медицинските сестри на клиниките и 10 % за докторите специјалисти“, информираат од Министерството за здравство.

Според нивните анализи, во септември 2019 година 5 % е зголемена платата на администрацијата во здравството. Од февруари 2020 година платите на лекарите специјалисти се зголемуваат 25 %, а на медицинските сестри 10 %.

„Кумулативно, заедно со сите зголемувања досега, вклучително и зголемувањата во февруари 2020 година, основната плата на лекарот специјалист е зголемена 40 %, на медицинските сестри помеѓу 20 и 23 %, на општите лекари 25 %, а на здравствените соработници 15 %“, велат од Министерството за здравство.