Општество
Отворен Центар за ран детски развој во кумановската приградска населба Иго Тричковиќ
Центар за ран детски развој беше отворен во рамките на иницијативата „Првите пет се најважни на свет“, при што околу 60 деца на возраст од 3 до 6 години од приградската населба Иго Тричковиќ во Куманово ќе имаат можност да посетуваат квалитетна предучилишна програма.
Со свечено сечење лента центарот официјално го отворија Фросина Тасевска Ременски, министер за труд и социјална политика, Зоран Дамјановски, градоначалник на Куманово и Ража Мсефер Берада заменик претставничка на УНИЦЕФ. “Министерството за труд и социјална политика е посветено на поддршка за проширување на можностите децата да посетуваат квалитетна предучилишна програма. Подготвени сме да ги помогнеме локалните иницијативи за отворање нови центри за да се поттикне креативноста и способностите на децата како воведна фаза во образованието“, рече Тасевска Ременски. “Благодарение на соработката со УНИЦЕФ и Фондацијата Телеком Македонија создадовме услови децата на возраст од 3 до 6 години од оваа брзо растечка населба во Куманово да посетуваат предучилишно образование. Планираме да отвориме уште вакви центри во други населби и села,” рече Зоран Дамјановски, градоначалник на Куманово.Освен што обезбеди простории во основното училиште „Христијан Карпош“ Општината исто така ги покрива платите за две едукаторки и тековните трошоци на центарот, така што услугите се бесплатни за сите деца од населбата. “Податоците покажуваат дека децата кои почнуваат со учење на помала возраст имаат подобар успех на училиште и подоцна имаат подобри можности во животот. Првите пет години од животот се единствена прилика за развој на децата и обликување на нивниот понатамошен живот”. рече Ража Мсефер Берада заменик претставничка на УНИЦЕФ. Овој центар е единаесетти по ред што се отвора со донација од Фондацијата Телеком Македонија во рамките на иницијативата „Првите пет се најважни на свет’ . Другите десет центри се во Селце, Тетово; Јаргулица, Радовиш; Злеово, Радовиш; Десово, Долнени; Ратавица, Пробиштип; Центар Жупа, Центар Жупа; Дебереше, Гостивар; Шипковица, Тетово; Долно Лисиче, Аеродром и Радојца Новичиќ, Охрид. Центрите за ран детски развој што се отворија како дел од ова партнерство се базираат на модел што беше тестиран од страна на УНИЦЕФ. Најдобро соодветствуваат на заедници кои не се во можност да имаат градинка како што се селските и маргинализираните заедници. Децата посетуваат организирана програма за учење неколку часа на ден, а родителите добиваат едукативни материјали кои им помагаат за подобра поддршка во учењето на децата дома. Програмата во центрите се раководи според Стандардите за рано учење и развој. Во план е продолжување на соработката меѓу УНИЦЕФ и Фондацијата Телеком Македонија за да им се помогне на општините да создадат услови повеќе деца од селските и маргинализираните средини да посетуваат квалитетна програма за ран детски развој. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Г.г. Стефан: Да ги зацврстиме единството и слогата, да ги надминеме разногласијата и меѓусебните поделби
Ариепископот Охридски и македонски заедно со Светиот архиерејски Синод, по повод велигденските празнувања, испраќа мир и благослов од Бога до свештенослужителите, монаштвото и до сите чеда на МПЦ-ОА.
– Христовото воскресение е смислата на нашето севкупно постоење. Тоа е стожерот околу којшто се одвива сиот наш живот и камен-темелникот врз којшто се гради сиот наш подвиг на верата, на надежта и на љубовта во Бога. Тајната на Христовото воскресение го преобразува и го вообличува севкупниот наш поглед кон светот и човекот, кон времето и вечноста. Зашто, токму ова спасоносно собитие е најголемата вистина којашто му беше објавена на човековиот род и токму оваа Тајна над тајните е најрадосното благовестие со коешто велегласно беше возвестена конечната победа на животот над смртта, на доброто над злото и на љубовта над омразата, вели г.г. Стефан меѓу другото во обраќањето.
Македонија
Православните верници го слават Велигден
Православните верници денеска го слават најголемиот христијански празник Велигден – Христовото воскресение, ден кога Исус Христос ја докажал својата божествена моќ и воскреснал од мртвите. Воскресението Христово на полноќ беше објавено во сите храмови на Македонската православна црква, а денеска се одржуваат воскресенски литургии.
Поглаварот на МПЦ-ОА г.г. Стефан богослужеше во Соборниот храм „Свети Климент Охридски“ во Скопје од каде го објави Христовото Воскресение и упати Велигденски пораки.
Македонија
Годишен извештај на Народниот правобранител: Помалку претставки од граѓаните за работата на јавните обвинителства
Во извештајната 2023 година, во областа која се однесува на работата и постапувањето на обвинителствата во Република Северна Македонија поднесени се 63 претставки што е за 24 помалку во однос на 2022 година, се констатира во Годишниот извештај за степенот на обезбедувањето почитување, унапредување и заштита на човековите слободи и права во 2023 година што го објавува Народниот правобранител на Република Северна Македонија.
Согласно објавените податоци, бројот на претставки на граѓаните на годишно ниво се намалил за повеќе од 38%, што претставува резултат на заложбите на Јавното обвинителство за зголемување на ефикасноста на постапките и континуираните напори за подобрување на довербата на граѓаните во работата на јавните обвинителства.
Во најголем број од претставките граѓаните бараа интервенција во врска со постапки пред основните јавни обвинителства (51), потоа пред Основното јавно обвинителството за организиран криминал и корупција (4), постапка пред Јавното обвинителство на РСМ (3), пред вишите јавни обвинителства (2), друго (2) и една претставка се однесуваше за постапка пред Совет на јавни обвинители. Ваквиот сооднос е очекуван со оглед на обемот на предметна работа и фактот што токму јавните обвинителства со основна надлежност го прават првиот директен контакт на граѓаните со институцијата.
Доколку се има предвид вкупниот обем на работа на јавните обвинителства кои активно постапуваат по поднесени кривични пријави за над 40.000 сторители на кривични дела во текот на годината, поднесените 63 претставки до Народниот правобранител претставуваат околу 0,1% од таа бројка. Притоа, граѓаните во посочените предмети изразувале незадоволство поради непостапување по поднесена пријава на кривично дело, одолжување на постапката или поради незадоволство од донесена одлука. Од тие причини Народниот правобранител, меѓу останатите препораки во извештајот, во делот на Јавното обвинителство препорачува основните јавни обвинителства да ги доставуваат јавнообвинителските одлуки до странките и да им се овозможи правото да ги обжалат до повисоките јавни обвинителства, да постапуваат поажурно и навремено да преземаат дејствија, да го почитуваат рокот од 3 месеци доколку не донесат јавнообвинителска одлука да го известуваат повисокиот јавен обвинител и пријавителот, за да нема сомневање и страв дека гонењето ќе застари.
Сите овие забелешки Јавното обвинителство ги зема предвид, детално ги анализира и ќе продолжи да презема активности за дополнително зголемување на ефикасноста, на транспарентноста и на отчетноста за постапките што ги води. Ваквите заложби на Јавното обвинителство се веќе воспоставен начин на работа при што уште во извештајот за 2022 година омбудсманот констатираше дека за разлика од претходните години, сега јавните обвинителства, особено издвојувајќи ги Основното јавно обвинителство Скопје и Основно јавно обвинителство за гонење на организиран криминал и корупција, постапуваат по барањата на Народниот правобранител, даваат суштински и целосни одговори за бараните информации од постапките, се вели во соопштението од Јавното обвинителство.