Европа
Во Италија разнишана доверба во вакцинацијата поради „Астра зенека“
Италијанските власти, научници и експерти се обидуваат да ја поправат недовербата во вакцинацијата против Ковид-19 предизвикана од сомнежите дека вакцината на „Астра зенека“ има врска со смртни случаи забележани веднаш по имунизацијата, пишува весникот „Фанпејџ“.
Познатиот експерт за испитување на јавното мислење, Ренато Менхајмен, проценува дека проблемите и збунувачките официјални соопштенија во врска со вакцината на „Астра зенека“ ја зголемиле недовербата кај најмалку 30-40 проценти од постарата популација.
Премиерот Марио Драги рече дека нема план Б и дека вакцинацијата е единствениот вистински лек за коронавирусот, а извори блиски до владата, цитирани од агенцијата „Анса“, тврдат дека никој не ни размислувал во насока на тоа употребата на шведско-англиската вакцина целосно да се запре или забрани.
Напротив, министерот за здравство, Роберто Сперанца, истакна дека владата има максимална доверба во вакцината на „Астра зенека“ и дека употребата на тој лек ќе продолжи веднаш откога Европската агенција за лекови (ЕМА) ќе ги објави резултатите од новите тестови.
Властите се обидуваат да утврдат како да се компензираат 200.000 вакцинации што се закажани и одложени додека не продолжи вакцинацијата со „Астра зенека“.
Италијанската агенција за лекови (АИФА) во четвртокот забрани употреба на една серија вакцини од „Астра зенека“ на национално ниво.
АИФА соопшти дека забраната се однесува на серијата ABV2856 додавајќи дека може да разгледа дополнителни мерки, доколку е потребно, во координација со Европската агенција за лекови (ЕМА).
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Борис Џонсон тврди дека кралицата Елизабета имала рак: Го знаев тоа една година
Поранешниот британски премиер Борис Џонсон ја опиша својата последна средба со покојната кралица Елизабета Втора, која се одржа во замокот Балморал во септември 2022 година, неколку дена пред нејзината смрт, во неговите претстојни мемоари „Unleashed“.
Џонсон тврди дека на кралицата и бил дијагностициран рак на коските во последните години од животот, пренесува Daily Mail делови од неговите мемоари.
„Една година или повеќе знаев дека има форма на рак на коските, а нејзините лекари беа загрижени дека во секој момент може да дојде до ненадеен пад“, напиша Џонсон во мемоарите.
Пред нивниот состанок, Џонсон тврдеше дека приватниот секретар на кралицата, Едвард Јанг, го предупредил дека нејзиното здравје „се влошило во текот на летото“.
„Но, нејзиниот ум – како што рече и Едвард – беше целосно неповреден од нејзината болест и одвреме-навреме во нашиот разговор таа сè уште имаше голема насмевка која го подигнуваше расположението“, додаде Борис.
Кралицата почина само два дена по нивната последна средба. Според Џонсон, Елизабет цело лето знаела дека ќе умре, „но била решена да издржи и да ја изврши последната должност“ и да го надгледува неговото заминување од премиерската функција. Борис Џонсон официјално поднесе оставка за време на нивната средба.
Европа
Путин нареди регрутирање на 133.000 нови војници
Рускиот претседател Владимир Путин нареди да се регрутираат нови 133.000 војници во есенското регрутирање, кое започнува на 1 октомври и трае до крајот на годината, а според шефот на канцеларијата за регрутирање, регрутите нема да одат на боиштата во Украина.
Декретот на Кремљ, објавен во вчерашниот руски државен весник „Росијскаја газета“, повикува на мобилизација на граѓаните „на возраст од 18 до 30 години, кои не се во резерва и се предмет на воена служба во согласност со федералниот закон (…) во износ од 133.000 луѓе.“
Шефот на руската канцеларија за регрутирање, вицеадмирал Владимир Цимлјански изјави дека условите за регрутирање остануваат исти – 12 месеци стаж во воените единици во Русија.
„Би сакал да забележам дека регрутите нема да бидат поканети да учествуваат во специјална воена операција во новите региони“, го цитира весникот рускиот вицеадмирал.
Русија ја нарекува војната во Украина, која започна со инвазијата во февруари 2022 година, специјална воена операција. Киев и неговите сојузници тоа го нарекуваат брутална агресија и неиспровоциран, империјалистички обид за заземање на земјата.
Во потег што го осуди поголемиот дел од западниот свет, Русија анектираше делови од југоисточна Украина кон крајот на 2022 година, нарекувајќи ја земјата „нови региони“, потсетува Ројтерс.
Наведувајќи ги зголемените закани на западните граници на Русија, Путин нареди во септември руската војска да се прошири за 180.000 војници на 1,5 милиони активни војници, што ќе ја направи втора по големина во светот по кинеската.
Европа
Почнува судењето на Ле Пен и десничарите, се сомничи дека украле 7 милиони евра
Пред судот во Париз денеска почнува судењето на Марин Ле Пен и другите француски десничари под обвинение за незаконско земање финансиски средства за лажни вработени во Европскиот парламент.
Покрај долгогодишниот лидер на Националниот фронт, Ле Пен, еден од 28-те обвинети за проневера е и татко ѝ и основач на партијата, Жан Мари Ле Пен.
Од самиот почеток Марин Ле Пен ги негира наводите за проневера, кои се однесуваат на периодот меѓу 2004 и 2016 година.
Според неа, станува збор за политички прогон, а од Европскиот парламент велат дека се оштетени финансиски, но и дека им е уништен угледот.
На обвинетите им се суди за евентуално измамничко вработување асистенти на неколку француски пратеници во Европскиот парламент.
Според Обвинителството, Ле Пен и нејзините колеги од партиите Национален фронт и Национален собир користеле пари наменети за плаќање помошници на пратениците во Европскиот парламент за да им платат на луѓето што извршувале работа за партијата во Франција.
Доколку биде прогласена за виновна, максималната казна за овие кривични дела е 10 години зад решетки.
Исто така, доколку бидат прогласени за виновни, обвинетите би можеле да добијат забрана за вршење јавна функција во рок од пет години, што би можело да ја спречи кандидатурата на Ле Пен на следните претседателски избори во 2027 година.