Македонија
Камчев: На снимките со Јовановски и Кичеец, се извадени четири – пет луѓе, не знам зошто
Бизнисменот Орце Камчев на сведочењето за „Меѓународен сојуз“ рече дека проектот што му бил нуден од Бојан Јовановски со потпис од Лазар Јанев, синот на Катица Јанева, бил фиктивен, со цел да се заработат пари. Одговарајќи на прашања од првобвинетиот Јовановски, Камчев рече дека му платил 150.000 евра за да купи време за својата слобода.
„Кога Бојан Јовановски дојде со Милевски, тој договор беше условен дека со помош на Министерството за труд и социјална политика ќе биде побарана локација, каде што имаше сериозни врски. Се фалеше со слики од премиерот, а викаше дека 20 отсто од средствата ќе бидат субвенционирани од Министерството за труд и социјална политика. Ми кажа дека Охрид и Битола се зафатени, Карпош е бојкотиран. Додека купував време за својата слобода, кога го правев тоа што го правев за да те тргнам ‘из такво’, ти понудив два договора од 150.000 евра. Едната фактура од ‘Ок медија’ и една од ‘Систина’ се платени на ‘1ТВ’ за рекет. Во Македонија не постои телевизииска куќа со договор од 150 илјади евра, без прајмтајм-термини. Договорите се платени на твојата телевизија бидејќи проектот беше таков каков што беше. Јасна Мандиќ може да го потврди тоа“, рече Камчев.
Орце Камчев рече дека од снимките што беа изведени во случајот „Рекет“, а на кои се гледаат Зоран Милевски-Кичеец и Бојан Јовановски со торба, биле извадени четири-пет луѓе, кои ги имало регистрирано на видеонадзорот.
„Зоран Милевски-Кичеец ве донесе кај мене во канцеларија за да го презентирате проектот. Лицето Зоран Милевски-Кичеец во тоа време работеше во една од моите компании. Ме посетувале илјадиници луѓе дома – од политика, министерство, Обвинителство. Уште четири-пет луѓе не се извадени од снимките, не знам зошто. Вие сте биле секојдневие, не мислам на вас, вие сте биле кај мене и на контролни прегледи, да видам до каде ви е зарасната раната“, рече Камчев одговарајќи на прашања од Бојан Јовановски.
Бизнисменот рече дека не е сопственик на ниту една од компаниите.
„Сточарство, земјоделство, произведување сирење, млеко, породилиште, болница за бебиња, болница за срце, општа клиничка болница, центри за дијализа, фабрики за текстил, чевли, фабрики за арско ѓубриво, кое се преработува од говедата – преработка на гомна, производство на ковид-маски и така натаму. Никаде не сум сопственик. Во последните 15 години не поседувам ни една акција ни една компанија. Јас како одговорно лице во компаниите сум потпишувал партнерски договори“, рече Камчев запрашан да наброи со што се занимаваат неговите компании, но и да одговори дали е нивен сопственик.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Кацарска рече дека закани добивала на секои два-три дена, а била и физички нападната
Претседателката на Уставниот суд во заминување, Добрила Кацарска, која неодамна во полицијата пријави закани, рече дека тоа станало премногу често.
„Закани трпам неколку години. Немало недела да помине, а да нема некоја закана. Бев и физички нападната, сметав дека се работи за изолирани случаи“, рече Кацарска притоа додавајќи дека претходните закани не ги пријавувала за да не ги вознемирува јавноста и полицијата, но кога почнале да се повторуваат секој втор или трет ден, одлучила дека треба да го направи тоа.
Како што рече, до денес нема информација од МВР во врска со пријавата пред две недели кога судијката нашла импровизиран кревет и забоден кујнски нож пред гаражата.
Подоцна таа пријави уште една закана што се случила во близина на ТЦ „Рамстор“ за која рече дека од она што го знае заканувачот бил приведен, а за што информира и МВР.
Македонија
Ахмети: Неприфатливо е коалицијата што освоила помал број мандати да стане дел од владата
Остра критика од лидерот на ДУИ, Али Ахмети, кој во име на „Европскиот фронт“ ги обвини албанските политички субјекти, кои се очекува да бидат дел од идната влада, дека го нарушиле легитимитетот на слободното гласање и на Охридскиот договор.
Според Ахмети, за „Европскиот фронт“, неприфатливо е коалицијата што освоила помал број мандати да стане дел од владата.
„Охридскиот договор не се чита исто од сите политички или јавни кадри, ние не дозволуваме овој договор да биде прекршен“, рече тој.
Додаде дека таквите чекори нè враќаат, како што рече, две децении назад.
„Непочитувањето на легитимитетот е понижување за Албанците, Турците, Ромите, Бошњаците и другите.
Ова понижување, за жал, го овозможуваат некои што потпишаа заедничка изјава со нас, кои неколкупати јавно изјавија дека доколку загубат со еден глас и еден пратеник помалку, ќе се повлечат, но од ситни лични амбиции или други непознати причини пред пошироката јавност и со голема омраза кон нас, потклекнаа и овозможуваат воспоставување етничка хегемонија.
Го почнуваме овој пат за да не дозволиме мајоризација, која ги оптоварува соживотот и демократијата“, додаде тој.
Ги повика граѓаните да им се придружат во нивните напори за да се заштитат гласот, легитимитетот и духот на Охридскиот договор, но и на договорите од Преспа и за добрососедството за европската иднина, дополни Ахмети.
„Луѓето нè прашуваат зошто гласаме кога некој друг одлучува за нашата волја и нашите определби, граѓаните нè прашуваат која е смислата на демократијата кога не се почитува легитимитетот, кога одлучува најголемата македонска партија. Ова нè враќа две децении назад кога не се почитуваше слободната волја на заедниците. Легитимноста е столбот на демократијата, затоа ја почнуваме битката за почитување на Охридскиот договор. Кога се почитува духот на Охридскиот договор, општеството напредува, но кога не се почитува, се враќаме во други времиња, кои колективно сме ги напуштиле“, потенцира лидерот на ДУИ.
Ахмети не сака да ги открие следните чекори на „Европскиот фронт“, но кусо изјави дека јавноста ќе биде навреме информирана за тоа.
Македонија
Успеавме да го надминеме секој тест на издржливост, рече Кацарска на крајот од мандатот
Со непоколеблива посветеност и истрајност го зачувавме достоинството на Уставниот суд. Успеавме да го надминеме секој тест на изджливост и непристрасност на судот и не потклекнавме под еден од најспецифичничните предизвици што ги памети историјата на Уставниот суд, а тоа е 17 месеци функционирање на работ на кворумот со само пет судии, а потоа и без една третина од судиите. Ова го истакна претседателката на Уставниот суд во заминување, Добрила Кацарска.
До идниот претседател и граѓаните порача дека треба да бидат комотни бидејќи нема натрупани или заостанати предмети.
„Очекувам судот и натаму да биде ажурен, да се постапува по сите предмети, да продолжи таму каде што застанав јас“, одговори Кацарска на прашања за очекувањата од нејзиниот наследник.
Во отчетот за сработеното Кацарска рече дека судот по 32 години, донел современ акт, кој ја регулира нивната работа.
Во таа насока Уставниот суд ќе им овозможи на правните лица и на странските државјани да поднесат барање за заштита на нивните слободи и права – право што досега го имале само поединци. Понатаму, народниот правобранител ќе може да поднесува барања за заштита на слободите и правата во име на оние граѓани што не може тоа да го сторат. Овој нов акт, вели Кацарска, предвидува и т.н. контролни механизми за судиите и претседателите да не може да чуваат предмети во фиока со години, што, за жал, беше случај во минатото. Се предвидува рок од 6 медсеци за судиите да го завршат предметот. Уставниот суд, кога ќе ги добие готовите предмети, не смее да ги чува подолго од еден месец и во тој период мора да ги стави на дневен ред, појасни Кацарска.
Додаде и дека е намален бројот на стари предмети од кои некои се чувале и десетина години. Има раст на укинати или поништени акти, што во минатото ретко се случувало.
„Има 78 одлуки со кои се укинуваат закони и други акти и прописи што се донесени од разни собраниски состави, што говори за непристасноста“, рече Кацарска.
Нагласи и дека во моментот Уставниот суд работи со полн капацитет со 9 судии.