Францускиот претседател Франсоа Оланд и германската канцеларка Ангела Меркел побарале во петокот на средбата во Париз од рускиот претседател Владимир Путин руските воздушни удари во Сирија да бидат насочени исклучиво врз Исламската држава (IS), соопштија нивните кабинети.

Портпаролот на рускиот претседател Дмитриј Песков за новинарите извести дека Владимир Путин на одвоените средби со германската канцеларка Ангела Меркел и со францускиот претседател Франсоа Оланд, „посветиле многу широко внимание“ на ситуацијата во Сирија.

Притоа Путин го информирал Оланд за руските операции во Сирија и за информативниот центар кој во Багдад го воспоставија Русија, Ирак, Сирија и Иран истакнувајќи ја „неопходноста од присоединување и на други земји, секако, доколку сакаат, во работата на тој центар“, чија задача е да ги собира и анализира информациите собирани за активностите на екстремистичките организации на Блискиот исток.

„Приближно во иста насока сириската проблематика беше разгледувана и со германската канцеларка Меркел, посветувајќи и многу голем внимание“, рече Песков.

Воздушните удари „треба да бидат насочени само кон Даеш и исклучиво Даеш“ (арапска кратенка за Исламската држава), изјави Оланд на заедничката прес-конференција со Меркел во Париз, откако претходно со Путин и со украинскиот претседател Петро Порошенко разговараа за примирјето од договорот од Минск.

„Ние двајцата инсистиравме само дека Исламската држава е непријателот кој мора да биде победен“, рече Оланд.

Меркел и Оланд, исто така, се согласија дека двете кризни жаришта, Украина и Сирија, немаат никаква врска меѓу себе, „За нас прашањето на Сирија не е поврзано со прашањето од Минск“, рече Меркел алудирајќи на мировниот договор преку чие исполнување треба да се надмине украинскиот судир. „Тие прашања немаа ништо едно со друго“, додаде.

Меркел, притоа, додаде дека нејзината изјава од минатиот месец дека сирискиот претседател Башар ал-Асад би требало да биде вклучен во преговорите со кои би завршила војната во Сирија, не значи дека смета оти тој би требало да остане на власт.

Кога станува збор за Украина, Оланд истакнал во разговорите дека ќе биде потребно време да се организираат избори во земјата за да се почитуваат меѓународните стандарди, бидејќи не сака да бидат организирани избори на територијата на рускојазичните региони во Украина во услови со кои не би се почитувале договорите од Минска. Оттаму, според францускиот претседател, јасно е дека зададените токови ќе бидат пречекорени

„Веројатно, сега речиси сигурно“, дека, имајќи предвид дека ни се потребни три месеца да организираме избори, ќе го пречекориме рокот кој во договорот од Минска беше 31-ви декември 2015 година“, изјави Оланд на прес-конференција.

Меркел поп билатералниот разговор со Путин, пак, рече дека рускиот челник се обврзал да работи на создавање услови кои би ги овозможиле изборите „во согласност со Минскиот договори и врз основа на украинските закони“, кои требаа да бидат променети со некои уставни измени, кои на одметнатите региони Донецк и Луганск им даваат многу широка автономија./крај/мф/сн

Извор: Макфакс