Свет
Австралија ја удвојува нарачката за „фајзер“ поради несаканите ефекти на „астразенека“
Австралија ја удвои нарачката за вакцината на „Фајзер“, изјави премиерот Скот Морисон по одлуката за ограничување на употребата на „Астразенека“ поради ретки случаи на згрутчување на крвта.
До доцна во четвртокот Австралија ја засноваше својата програма за вакцинација во голема мера на вакцината „Астразенека“, од која нарача 50 милиони дози, што е доволно за да се вакцинира цела нација од 25 милиони луѓе во две дози.
Но, сега се приклучи на групата земји кои ја ограничуваат употребата на вакцината поради ретката појава на згрутчување на крвта кај помладите луѓе.
Затоа, Австралија сега нарача 40 милиони дози од вакцината на „Фајзер“, удвојувајќи ја претходната нарачка.
Ваквата промена во политиката за вакцинација всушност значи дека владата нема да може да го исполни својот план за вакцинирање на целата нација до крајот на октомври.
„Ова не е забрана за вакцината ‘астразенека’“, изјави Морисон пред новинарите во Канбера по состанокот на неговата влада.
„Луѓето постари од 50 години сè уште се препорачува да се вакцинираат со вакцината ‘астразенека’“, рече Морисон.
Повеќе од десетина земји во одреден момент привремено ја прекинаа вакцинацијата со „астразенека“, но повеќето продолжија да го прават тоа, но сега ја ограничуваат употребата на вакцината на постара популација.
Шпанија, Холандија и Португалија во четвртокот објавија дека ќе ја ограничат употребата на вакцината на над 60-годишна возраст.
Најнаселената австралиска држава Нов Јужен Велс, каде живеат речиси две третини од населението, престана да користи „астразенека“ сè додека не ги добијат сите податоци што можат да ги информираат пациентите за ризиците.
Дури и пред Австралија да ја удвои нарачката за вакцината на „Фајзер“, „Астразенека“ објави дека ја почитува австралиската одлука и работи со регулаторите ширум светот „за да разбере индивидуални случаи, епидемиологијата и можни механизми што можат да ги објаснат овие исклучително ретки појави“.
Европската агенција за лекови (ЕМА) во средата објави дека има извештај за 169 случаи на ретко нарушување во формирање на тромб на 34 милиони дози вакцина „Астразенека“, т.е. еден случај на 100 000 вакцинирани под 60-годишна возраст.
Повеќето од овие случаи се пријавени кај жени на возраст под 60 години и во рок од две недели по вакцинирањето.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Остин: Бајден ја запре испораката на оружје за Израел
Американскиот министер за одбрана Лојд Остин денеска изјави дека одлуката на американскиот претседател Џозеф Бајден да ја прекине испораката на муниција за Израел е донесена поради израелските планови да изврши офанзива врз градот Рафах на југот на Појасот Газа.
„Од самиот почеток бевме многу јасни дека Израел не треба да започне голема офанзива во Рафах без да ја земе предвид заштитата на цивилите во областа. Откако ја преиспитавме ситуацијата, престанавме да испраќаме муниција во Израел“, рече тој на сослушувањето во Сенатот и потврди дека конечната одлука „што ќе се случи со таа пратка“ се уште не е донесена, пренесува Ројтерс.
Администрацијата на САД ја запре испораката на околу 3.500 бомби во Израел минатата недела поради загриженоста за најавената копнена офанзива на Рафах, објави претходно денеска Асошиејтед прес, повикувајќи се на неименуван претставник од администрацијата.
Овој функционер појаснил дека не е донесена конечна одлука за испораката на бомбите и дека во суспендираната пратка имало 1.800 бомби од по 900 килограми и 1.700 бомби со тежина од 226 килограми.
Во понеделникот, израелскиот воен кабинет одлучи да ја спроведе планираната операција во Рафах за да „изведе воен притисок врз Хамас“, и покрај претходната најава на Хамас дека се согласува со египетско-катарскиот предлог за прекин на огнот.
Европа
Намалениот број на станови доведе до раст на кириите во Германија
Растат кириите во Германија поради немањето станови во услови на високи градежни трошоци и кредити. Сето тоа го запре градежниот сектор и побарувачката, но и ги намали цените на квадратот, се вели во извештајот на здружението на банките.
Становите во Германија поевтиниле за 4,3 отсто во првиот квартал во однос на истиот период лани, објави здружението на германските банки„Pfandbrief“.
Цените за изнајмување на нови станови се зголемени за 5,6 отсто. Трендот на поскапување на кириите нема да запре, оценуваат од здружението.
„Пазарот за изнајмување станови е под огромен притисок. Побарувачката значително ја надминува понудата“, рече извршниот директор на здружението, Јенс Толкмит.
Трошоците за изградба значително се зголемија во последните години поради повисоките каматни стапки на кредитите и значително повисоките трошоци за работна сила и цените на градежните материјали. Во вакви услови се намали бројот на одобренија за градба, а побарувачката ослабе, што резултираше со пониски цени на становите, смета министерот за финансии.
Според податоците на здружението на банките, цените на недвижностите најмногу паднале во Минхен, за 5,3 отсто.
Во исто време, падот на градежната активност го продлабочува „недостигот“ на станови, зголемувајќи го натамошниот раст на закупнината, кој би можел да продолжи уште некое време.
Здружението оценува дека цените на станбените недвижности треба да се стабилизираат во догледна иднина, за разлика од комерцијалните недвижности, како што се деловните згради и трговските центри.
Цените во тој сегмент паднаа за речиси 10 проценти на годишно ниво и се уште не се гледа „дното“, вели првиот човек на здружението.
Проценките се базираат на податоци за работењето на повеќе од 700 банки кои се активни во финансирањето на недвижен имот, а не на понуди за купување и изнајмување кои служат како основа за Заводот за статистика, забележуваат тие во здружението.
Европа
(Видео) Драма на небото над Трст: забележана несекојдневна појава
Во внатрешноста на заливот Трст, во близина на границата со Словенија, во вторникот попладне се формирал вител.
Италијанските медиуми јавија дека невремето не предизвикало материјална штета, ниту било закана за населението. Интервенцијата на пожарникарите и на пристанишните служби не била потребна.
Waterspout reported in the North Adriatic between the town of Muggia and Koper a few hours ago.
Original video shooting from meteoradar
➡️ https://t.co/SXbq5rbWaj pic.twitter.com/XxRu57Gohs— Alpine-Adriatic Meteorological Society (@aametsoc) May 7, 2024
Италијанската метеоролошка агенција објасни дека ваквите појави не се воопшто ретки и дека се резултат на екстремна нестабилност на атмосферата.
Областа на низок воздушен притисок, која владее со поголемиот дел од Италија, донесе влажни струи во Трстскиот Залив.
„Во овие временски услови, неколку пати годишно може да се појават воздушни вртлози, кои во повеќето случаи се распаѓаат на море“, објаснуваат италијанските метеоролози.