Македонија
Мицевски го обвини Џафери дека од Собранието прави театар

На уште непочната седница, координаторот на ВМРО-ДПМНЕ, Никола Мицевски и собранискиот спикер, Талат Џафери се скараа поради доцнењето на седницата, но и поради тоа што и натаму трае 32. седница наместо да започне 36. седница за да се изгласаат економските мерки.
Мицевски го обвини Џафери дека од Собранието прави театар, а претседателот пак врати дека четири години се бори за институтот пратеник. Опозицијата излезе од салата, а Собранието немаше кворум за да се изгласаат законите. Пратениците на ВМРО-ДПМНЕ кажа дека тие ќе влезат кога на ред ќе дојде 36. седница, на која се и економските мерки.
„Вчера имавме координации и тие координации се за текот на седниците. Во спротивно зошто би доаѓал на координација ако тоа што го договараме не го пренесеме на пратениците? По ова што го направивте денеска, морам да ви кажам да престанете да правите театар од Собранието. Треба да престанете да ја девалвирате институцијата Собрание и пратениците во него. Треба барем еднаш да бидете на висината на задачата и да прекините да ги држите граѓаните, компаниите, пратениците како заложници поради ваша теснопартиска агенда. Ние сме тука, ве чекаме веќе саат и 20 минути од времето кога кажавте дека ќе продолжиме, доаѓа време по два часа и пауза да направиме. 32. седница ние ќе ја напуштиме, ќе чекаме да пред вратата на Собранието за да влеземе на 36. седница. Пратеничката група на ВМРО-ДПМНЕ е цел ден во Собрание и чека да ја започнете седницата за економскиот пакет мерки. Прекинете ја 32. седница и дајте да ги изгласаме законите кои ги чекаат граѓаните, за да заврши театарот кој го правите“, рече Мицевски.
Пратениците на ВМРО-ДПМНЕ и координаторот Мицевски по неговиот процедурален говор ја напуштија салата.
Претседателот на Собранието, Талат Џафери, им одговараше на тезите, но тие не го ислушаа.
„Јас вчера не можев да претпоставам кога ќе заврши седницата за да можам да се определам за продолжение на следната. Оваа слика може да ја гледа јавноста“, рече Џафери додека пратениците излегуваа од салата, а му реплицираше пратеничката Гордана Силјановска Давкова: „Не е за јавноста, два саати чекавме“, а тој ѝ врати: „Можете да одите како што тргнавте професорке, да си отидете, а јас за јавноста треба да образложам зошто се решив седницата да продолжи денеска“.
„Според списокот на присутност на седница на Собранието, денеска се имаат потпишани дека се присутни 101 пратеник и ќе ги читам по име и презиме кои се. Како што одат, како што не се тука, утре ќе бараат патни трошоци. Граѓаните треба да ценат дали тие се дојдени на седница или само за патни трошоци. Четири години сум веќе претседател на Собранието, четири години се борам за статусот на институтот пратеник и за дигнитетот на Собранието како законодавен дом“, рече Џафери.
Кога Џафери почна да чита кои пратеници се потпишани како присутни, а не се во салата, пратениците на ВМРО-ДПМНЕ влегоа за да се пријават.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Стојановски: Дојранското Езеро пресушува, хидросистемот Ѓавато не функционира

Дојранското Езеро, едно од нашите најзначајни природни богатства, заштитено подрачје и туристичко место е под сериозна и реална закана поради катастрофалната негрижа на Владата на ВМРО-ДПМНЕ, ВЛЕН и ЗНАМ. Алармантна е состојбата со хидросистемот Ѓавато. Речиси четири месеци водата не тече низ каналот, систем изграден за да го одржува водостојот на Езерото и да спречи негова деградација, вели Љупчо Стојановски од Комисијата за животна средина на СДСМ.
„Пумпите кај Богданци се исклучени, делови од системот се уништени, цевководот е во распаѓање, а коритото е целосно неодржувано. Иако, Министерството за животна средина и просторно палнирање е задолжено да обезбеди финансиски средства во буџетот за 2025 година за реконструкција на хидросистемот, негово ставање во функција за да се обезбеди дотур на вода во Дојранско Езеро.
Од ноември 2024 година, Владата на ВМРО-ДПМНЕ, ВЛЕН и ЗНАМ ја лаже јавноста дека ќе го санира системот. Досега – ништо“, вели тој.
Како што додава, не е направен ниту еден конкретен чекор.
„Последиците веќе се видливи. Хидросистемот Ѓавато не функционира. Дојранското Езеро нема дотек на вода. Нивото на езерото е под дозволениот минимум. Биодиверзитетот е загрозен. Туризмот трпи штети. Егзистенцијата на стотици семејства е доведена во прашање. Премиерот Мицкоски, наместо да побара одговорност и да понуди решенија, влезе во јавен конфликт со новинарка која го постави легитимното прашање за состојбата со хидросистемот. Кого бранеше Мицкоски, дали својот коалициски партнер? Што прави ЗНАМ, ова ли е нивната грижа? Каде е коректорот? Или само бизнисот во Куманово го интересира? Ова не е прашање на политички односи туку на животната средна“, додадде Стојановски.
СДСМ, мкако што нагласи, бара итна и реакција од институции, пред се министерството за животна средни:
„Да се санира веднаш и да се пушти во функција системот Ѓавато. Да се воспостави редовен мониторинг за нивото на водата и јавноста да биде навремено информирана.
Секој следен ден неактивност е директен удар врз животната средина, врз граѓаните и врз иднината на регионот.
Не смее да се дозволи Дојранско езеро да стане жртва на неспособноста на владата на ВМРО-ДПМНЕ, ВЛЕН и ЗНАМ“.
Македонија
(Видео) Само 26 проценти реализација на капитални инвестиции, власта е тотално неспособна, велат од СДСМ

Владата на ВМРО-ДПМНЕ, ВЛЕН и ЗНАМ во првите 6 месеци има катастрофални 26 проценти реализација на капиталните инвестиции.
Ова не е само катастрофална бројка. Ова е показател, доказ за целосна институционална неспособност на Владата и промашени економски политики, истакна на прес-конференција Јовица Јанковиќ, од СДСМ.
Според него, со ваква мизерна реализација, Македонија не може да напредува.
„Во споредба со истиот квартал од минатите години, реализацијата на капиталните инвестиции во првите шест месеци од оваа година е преполовена.
Во времето на СДСМ, во истиот период од 2023 и 2024 година, реализацијата изнесуваше над 60%.
Со ВМРО-ДПМНЕ имаме огромен пад, кој со себе повлекува последици по целата економија затоа што капиталните инвестиции се едни од најважните алатки за економски раст“.
Дополнително, како што вели, загрижувачки е што парите со кои власта се задолжува не се ефектутуираат за проекти, туку се трошат ненаменски за покривање буџетски дупки.
„Со ВМРО-ДПМНЕ и Христијан Мицкоски македонската економија тоне, граѓаните имаат се помалку пари, животниот стандард опаѓа а сиромаштијата се зголемува.
Министерката Димитриеска-Кочоска во март очајно ја правдаше катастрофалната реализација со „студеното време во јануари и февруари“.
Сега е август – топло е, дали повторно температурите се виновни? Или конечно ќе признае дека потфрли владата затоа што е неспособна“, праша тој.
Македонија
„Борис Трајковски“ под лупа на ревизорите: аквапаркот под клуч, паркингот не заработува, а поддршката за самитот на ОБСЕ недокументирана

Државниот завод за ревизија го објави извештајот за работењето на салата „Борис Трајковски“ за 2023 година. Во извештајот е наведено дека друштвото остварило приходи од закупнина во износ од 10,9 милиони денари преку 24 активни договори, но кај повеќето договори цените се намалени или останале непроменети во однос на почетните.
Во 2023 година приходите од продажба на добра и услуги изнесувале 48,8 милиони денари, што е намалување од 3 проценти во споредба со претходната година, а за 2024 година се очекува зголемување на приходите за 13 отсто.
Приходите од користење на разните објекти, како пливачки базен, лизгалиште, мала сала, кугларница, конгресна сала и пинг понг-центар, бележат пораст, а аквапаркот има пад на приходите и во 2024 година е затворен поради економска неплатливост и истекување на гарантниот рок на опремата.
Во извештајот е посочена и неизвесноста за функционирањето на соларниот систем, кој бил набавен за загревање на пливачкиот базен, поради технички недостатоци.
Исто така, друштвото не остварува приходи од стопанисување со паркингот, иако има стекнато право на користење.
Во рамките на претседавањето со ОБСЕ во спортскиот центар, друштвото обезбедило логистичка поддршка на Министерството за надворешни работи, но ревизорите укажуваат дека не се доставени записи за изведените работи и инсталации и тие сѐ уште не се ставени во владение на друштвото.
Ревизорите констатирале и други неправилности, како слабости во работењето со готовината, начинот на евидентирање на резервите суровини и материјали, нецелосно извршен попис, непропишани прецизни надлежностите за надзорниот одбор, слабости во актот за систематизација и актите со кои се уредува начинот на пресметка на платите.
Наведените состојби, неправилности и неусогласености од разна природа влијаат на изразување на мислењето со резерва за реалноста и за објективноста на финансиските извештаи за 2023 година и неповолно мислење за усогласеноста со законската регулатива, упатства и воспоставени политики.
Се забележува и дека долгот од над 260 милиони денари кон Град Скопје за изградба на салата, направен во 2011 година, бил отплатен дури во периодот 2019 – 2023 година. Друштвото работело со загуба, а средствата биле обезбедени од државниот буџет.
За надминување на констатираните недостатоци, дадени се препораки до надлежните органи.