Македонија
Одбраната на Камчев поднесе кривични пријави за судиите кои му одредија притвор
Одбраната на Орце Камчев поднесе кривични пријави против судиите кои му го продолжија притворот за уште 30 дена за предметот „Плацови на Водно“, а бара и изземање на обвинителката Лиле Стефанова.
„Пред Републичкиот Совет поднесовме претставка за несовесно и нестручно работење на судија на претходна постапка како и на судиите од Кривичен Совет кои одлучуваа и изрекоа мерка притвор и по втор пат, повторно без презентирање на докази. Денеска ја информираме јавноста дека за нивното работење поднесуваме и кривични пријави. Воедно поднесовме барање до ЈО за изземање на обвинителката Лиле Стефанова која првенствено нема ниту стварна ниту месна надлежност за случајот и е компромитирана како обвинител кој беше дел од СЈО кога се потврди случајот ‘Рекет’. За неа се поднесени кривични пријави од страна на Јордан Камчев во врска со нејзино незаконско постапување во предметот ‘Империја’, а невозможно е да остане незабележан личниот анимозитет и непрофесионален однос кон г-дин Јордан Камчев, кој во нејзините јавни излагања досега, се нема ни обидено да го прикрие“, се вели во писменото соопштение на адвокатот на Камчев, Тони Менкиноски.
Дополнително на тоа, вели тој, уште еден доказ за пристрасно, незаконско, скандалозно и тендециозно судење е и тоа што во предлогот на обвинителката за продолжување на притворот навела десетици фирми во странство и оф-шор компании тврдејќи дека се во сопственост на Камчев што, како што велат адвокатите, е ноторна лага и за истото до судот се доставени докази.
Одбраната на Камчев вели дека е лага и тврдењето на Стефанова дека Камчев поседува стан во Бугарија.
„Сведоци сме дека лица осомничени за злоупотреба на стотици илјади евра државни пари им е изречена мерка домашен притвор, а на човек кој вработува над 3.000 лица и во буџетот на РСМ годишно исплаќа 18.500.000 милиони евра даноци, по основ на непрезентиран доказ, белешка од тајна служба, изготвена, по наши информации врз основа на усмен исказ на доушник, му се изрекуваат дополнителни 30 дена ефективен притвор“, вели Менкиноски.
Тој апелира до институциите да престане, како што велат, злоупотребата на тајните служби за местенки на граѓаните на оваа земја.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Mеѓуопштински натпревар во прва помош за учениците од училиштата во Ѓорче Петров
Во реонскиот парк во Ѓорче Петров денеска првпат се одржа натпревар во прва помош за екипи од основните училишта. Учество зедоа училишта од општините Ѓорче Петров, Сарај и Карпош, односно вкупно 23 екипи.
„Ова е еден од начините организиран од Општина Ѓорче Петров во соработка со Црвениот крст – Карпош преку натпревар да ги едуцира учениците со придобивките од познавањето на првата помош.
Натпреварите се организираат на општинско, градско, регионално и на државно ниво и имаат цел да ја зголемат јавната свест за улогата и значењето на првата помош како животоспасувачка вештина. Целта е, пред сè, најмладите да се стекнат со основни познавања и вештини за правилно и навремено укажување прва помош“, велат од Општината.
Општина Ѓорче Петров и во иднина ќе поддржи настани со цел едукација на нашите млади жители во насока на хуманоста и солидарноста, додаваат од Општината.
Македонија
Силјановска-Давкова: Лентите не се многу големи, сакав да пишува РС Македонија, но немаше место
Претседателката Гордана Силјановска-Давкова објасни зошто на чествувањето во Ватикан на венецот што беше положен не беше напишано името на државата.
„Знаете дека тие ленти не се многу големи, разговаравме во кабинетот, имавме и разни мислења меѓу себе, на пример, јас имав мислење дека може ‘РС Македонија’ бидејќи немаше простор. Но, некако на крајот рековме дека можеби бидејќи јас сум на чело на делегацијата, државна, црковна, ова да биде некое решение. Знам дека може да има забелешки, ги разбирам многу од нив, многу се логични. Македонија ја претставувавме таму. Но, веројатно во време кога, по мојот говор, по моето избегнување на говорницата на официјалното име на државата, по определувањето за Македонија, врз основа на правото на самоопределување или слободата на изразување на мислата, се одлучивмне на ова решение. Не мислам дека тоа е не знам каков проблем, ниту негирање на Македонија ниту негирање на државата. Се знаеше која е делегацијата, кои сме ние. Нам ни се чинеше дека тоа е најдобро во тој момент“, одговори Силјановска-Давкова на новинарското прашање.
Македонија
Германската амбасадорка Дрекслер до Кацарска: „Вашата сила и посветеност ќе останат инспирација за многумина“
Претседателката на Уставниот суд, Добрила Кацарска, денеска оствари средба со амбасадорката на Сојузна Република Германија, Петра Дрекслер, по повод завршувањето на мандатот, како и неколкугодишната успешна соработка.
На средбата беше истакнато заедничкото задоволство од спроведените проекти и активности во Уставниот суд со поддршка на Сојузна Република Германија.
Амбасадорката Петра Дрекслер изрази искрена лична благодарност до претседателката на Уставниот суд, Добрила Кацарска, за она што е сработено и произлезено од соработката во текот на тригодишниот мандат и резултатите што се добиени во насока на унапредување на работењето на судот.
„На крајот од вашиот мандат се заблагодарувам за одличната соработка. Вашата сила и посветеност ќе останат инспирација за многумина!“, истакна Дрекслер на средбата.
Таа најави дека амбасадата на Република Германија останува на своите заложби и во иднина да ја продолжи соработката во интерес на унапредување на слободите и правата на граѓаните и обезбедување на владеењето на правото. Дрекслер ја истакна поддршката до претседателката Кацарска по последните инциденти и закани што лично ѝ беа упатени.
Ова е втора официјална средба на германската амбасадорка Петра Дрекслер и претседателката на Уставниот суд, Добрила Кацарска, во текот на нејзиниот мандат. Уставниот суд изминатите три години ја зацврсти соработката со германската фондација ИРЗ, која изработи студија за потребата од воведување на уставната жалба, а преку други проекти и невладини организации поддржани од Сојузна Република Германија беа остварени средби во Уставниот суд во Словенија и беа организирани конференции со реномирани домашни и меѓународни експерти на тема уставна жалба во Република Северна Македонија.