Македонија
Филипче: Од вторник дневно ќе се вакцинираат помеѓу 10 до 15 илјади граѓани

Вакцините кои утрово пристигнаа во државата од наредните денови ќе бидат дистрибуирани во поголемите вакцинални пунктови во земјава, а вакцинацијата ќе започне од вторник, истакна министерот за здравство Венко Филипче. Според неговите најави дневно ќе се вакцинираат по 10 до 15 илјади луѓе.
Министерот за здравство најави дека во наредниот период ќе стигнат уште 500.000 вакцини на „Синовак“, 100.000 вакцини од „Синофарм“, како и уште 26.000 од „Фајзер“.
Со асистенција на припадници на Армијата, кинеските вакцини утрово беа складирани во ладната соба во поликлиниката „Јане Сандански“ во Скопје. Станува збор за пратка од 200. 000 вакцини на „Синофарм“ кои се купени со директни преговори со производителот, а со кои од следната недела и официјално ќе започне масовната имунизација на населението.
„Ова е месец во којшто очекуваме и други големи количини на вакцини и верувам дека до почетокот на летото ќе имаме висок процент на вакцинирано население и тоа ќе придонесе до целосно менување на сликата на епидемијата кај нас“, рече Филипче.
Според него приоритет ќе имаат граѓаните коишто се веќе пријавени за вакцинација, а ќе бидат повикани според возраста и според приоритетот на пријавување.
Засега, рече Филипче остануваат да функционираат и помалите пунктови за вакцинација, но се разгледува опцијата кадарот да се сконцентрира само во големите пунктови.
„Акцент ќе се стави на граѓаните кои се веќе пријавени, според возраста и според приоритетот на пријавување. Ја разгледуваме можноста помалите пунктови од другите градови да го дадат кадарот за да функционираат само големите пунктови, засега останува паралелно да функционираат двата системи. Ако некаде се укаже потреба, може да се сконцентрира експертизата на едно место“, рече Филипче.
„Се уште немаме точен термин за тоа кога и колкава количина ќе стигне од руските вакцини, а се понеизвесно станува пристигнувањето на вакцината на „Астра зенека“ со оглед на лошата состојбата во Индија, земјата има забрана за извоз на вакцини, а дел од вакцините преку „Ковакс“ системот треба да пристигнат и од институтот во Индија. Тоа може малку да ги искомплицира и одложи работите“, рече Филипче.
Кинескиот амбасадор Џанг Ѕуо истакна дека вакцинацијата е важна за да се спречи пандемијата.
„Денеска присуствуваме на предавањето на 200 илјади вакцини за Северна Македонија. Пријателските односи придонесоа за оваа испорака. Вакцинацијата е важна за контрола на епидемијата. Кина испорача вакцини за 100 земји во Светот. Кина е прва по вакцинација со над 200 милиони вакцинирани жители и се надевам дека ќе биде ставен крај на оваа пандемија, рече Ѕуо.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Минчев ја истакна важноста од носење закон за организација и работа на органите на државната управа

Министерот за јавна администрација, Горан Минчев, денеска оствари средба со претставници на СИГМА, заедничка иницијатива на ОЕЦД и Европската унија, која обезбедува стручна поддршка за реформите во јавната администрација во земјите од Западен Балкан и пошироко.
На средбата се разговараше за тековните и идните активности во областа на јавната администрација, со посебен фокус на модернизацијата и професионализацијата на административните служби.
Министерот Минчев ги презентираше клучните реформски приоритети на Министерството, особено истакнувајќи ја важноста на креирањето и носењето на Закон за организација и работа на органите на државната управа (ЗОРОДУ), како основа за поефикасна, поусогласена и одговорна јавна администрација.
Претставниците на СИГМА ја поздравија определбата на Министерството кон суштински реформи и ја истакнаа силната поддршка за донесувањето и имплементацијата на Законот за организација и работа на органите на државната управа, нагласувајќи дека овој закон претставува клучна алатка за обезбедување на функционална, деполитизирана и транспарентна државна управа, во согласност со европските стандарди.
Средбата заврши со заедничка посветеност за продолжување на соработката и координирана работа во насока на градење современа и граѓански ориентирана јавна администрација, како дел од европскиот пат на Република Македонија.
Македонија
Сиљановска-Давкова: Уставниот суд е најнереформираниот државен орган

Претседателката Гордана Сиљановска-Давкова се обрати на тркалезната маса насловена како: „Дали ни е потребен Закон за Уставниот суд?“, организирана од Уставниот суд и ЕУ.
Според претседателката, прашањето: „Дали е потребна реформа на македонското уставното судство?“ е вистинското прашање. Истакнувајќи дека Уставниот суд е најнереформираната институција, со оглед на неколкуте неуспешни обиди за уставни измени, претседателката укажа на неодржливоста на сегашното правно решение и упати на препораките на Венецијанската комисија за донесување Закон за Уставниот суд. Таа констатираше дека нашиот Уставен суд не успеа да прерасне во четврта власт, коректор на односите меѓу трите власти и заштитник на слободите и правата на граѓаните.
Сиљановска-Давкова укажа на важната улога во градењето уставна демократија на уставните судови на Германија, Франција, Шпанија, Португалија, Словенија и на Хрватска.
Таа се заложи за поширока надлежност на Уставниот суд: проширување на листата на заштитени слободи и права, оценка на меѓународните договори пред да бидат ратификувани од Собранието, давање финална оценка на изборите и референдумите, дислоцирање на автентичното толкување на законите од надлежност на Собранието во надлежност на Уставниот суд, воведување impeachment и за други носители на високи функции, конкретизирање на условите за „истакнат правник“ за да се оневозможи политизацијата и партизацијата, што доминирале во досегашното регрутирање на уставните судии.
Претседателката се вклучи во бурната дебата што следеше, застапувајќи и бранејќи го ставот за нужноста од уставни промени заради создавање уставен основ за донесување Закон за Уставен суд по примерот на најголемиот број развиени демократии, како и во духот на препораките на Венецијанската комисија и научната мисла.
Во воведниот дел на тркалезната маса говореа претседателот на Уставниот суд Дарко Костадиновски, амбасадорот на ЕУ, Михаил Рокас, амбасадорката на Германија, Петра Дреклер и амбасадорката на САД, Анџела Агелер.
Наодите од анализата за тоа дали има или не потреба од донесување Закон за Уставен суд беа презентирани од проектниот тим, составен од Карстен Манке, раководител и Мартин Сопранов и Маргарита Цаца Николовска, правни експерти. Проектот е финансиран од Европската Унија.
Свои ставови презентираа судијките Татјана Васиќ-Бозаџиева и Ана Павлова Данева, како и универзитетските професори по уставно право: Рената Десковска- Тренеска, Тања Каракамишева-Јовановска, Јетон Шасивари и Денис Прешова.
Присутните го слушнаа и мислењето на невладиниот сектор, односно на претставниците на „Сите за правично судење” и „Млади правници”.
Македонија
Апасиев: Собранието да ги отвори вратите за мајките да ја следат интерпелацијата на Тошковски

Собранието да ги отвори вратите за мајките да ја следат интерпелацијата на министерот за внатрешни работи, Панче Тошковски, предлага пратеникот Димитар Апасиев од Левица.
,,Зошто денес да не ги пуштиме мајките на загинатите деца од Кочани кои протестираат во Скопје, во живо да ја следат интерпелацијата на министерот за внатрешни работи, Тошковски, (кој го посочуваат за селективна истрага)?. Согласно Деловникот на Собранието, граѓанин може непосредно да ја следи пленарната седница од Галеријата“, додава лидерот на Левица.
Инаку, пратеничката група од Левица поднесе интерпелација против Тошковски и истата денес е на Дневен ред на седница во Собранието.
Левица ја поднесе интерпелацијата на 14 април поради тоа што, како што велат од партијата, Тошковски несоодветно ја извршувал функцијата, постапувајќи нестручно, непрофесионално, несовесно и неодговорно поради што имало низа противзаконски дејствија, скандали и кадрови поместувања во МВР.
Од Левица велат дека интерпелацијата е базирана на десет основи, од кои пет се директно поврзани со трагичната несреќа во Кочани во која животот го загубија 62 лица, а близу 200 беа повредени. Според партијата, МВР потфрлило и во тоа што долг период во истрагата не биле вклучени функционери и носители на функции блиски до ВМРО-ДПМНЕ.