Демократската Унија за Интеграција денеска во Липково го одбележа крајот на воениот конфликт од 2001 година.

Активностите почнаа на гробиштата на борците во селото Слупчане, каде пристигна лидерот на ДУИ, Али Ахмети придружуван од министри и пратеници од ДУИ.

Ахмети пред присутните порача дека ДУИ досега постигнале многу, но потребно е уште многу да биде направено за, како што вели, да се остварат идеалите на многу генерации во земјата и на загинатите во конфликтот.

„Пред нас имаме големи одговорности, мора да ги оствариме сите соништа на хероите и паднатите борци. Постигнавме многу, но пред нас има уште многу работа. Нашите напори, нашата посветеност никогаш нема да запрат во реализирањето на идеалите на сите генерации кои се жртвуваа и работеа за подобри и посветли денови, затоа не само на оваа годишнина, туку и во секој момент ние се сеќаваме на сите тие генерации, се сеќаваме на сите кои се бореа и паднаа, со цел нивните дела да не бидат закочени, туку да се материјализираат како што им доликува“, изјави Ахмети.

Тој го постави камен темелникот на Спомен кулата што ќе се гради во знак на сеќавање на мајките кои ја поддржале ОНА.

„Овој споменик се гради во спомен на мајките на целата општина Липково, жените, нашите сестри. Ние не ја изгубивме војната пред противниците што ги имавме, тука ја изгубивме војната со нашите мајки, сестри и жени бидејќи не сакаа да излезат од рововите и покрај нашите молитви и ултиматуми, тие го дадоа најавтентичниот пример за мајката Албанка која што историски се борела за слобода, правда и еднаквост, затоа овој споменик им е посветен токму на нив“, рече Ахмети.

Ахмети додаде дека спомен кулата ќе биде готова до 28 ноември.

(Обновено)