Свет
Девет лица повредени во престрелка на Роуд Ајленд
Девет лица се повредени синоќа во Провиденс, главниот град на источноамериканската држава Роуд Ајленд, соопшти полицијата проценувајќи дека станува збор за најсериозниот инцидент од ваков вид во историјата на градот.
Од деветмината ранети, тројца се со сериозни повреди и може да бидат во критична состојба, изјави началникот на полицијата.
Тој рече дека во пукотниците биле употребени неколку парчиња огнено оружје и дека станува збор за конфликт меѓу две групи познати на властите.
Шефот на полицијата рече дека инцидентот почнал кога од возилото било пукано во една куќа, а потоа едно или повеќе лица од таа куќа возвратиле со оган. Тој ги опиша учесниците во инцидентот како „млади мажи“.
Додаде дека пукањето почнало околу 19 часот во јужниот кварт, што се смета за мирен и оцени дека биле испукани неколку десетици куршуми.
Истрагата е во почетна фаза и никој досега не е приведен, рече Климентс.
Детективите во болницата разговараат со жртвите на возраст меѓу 19 и 25 години.
Градоначалникот на Провиденс ги повика граѓаните да престанат да користат огнено оружје за решавање на споровите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Премиерката на Бангладеш: Сопствениците на фабрики да се откажат од луксузот заради вработените
Премиерката на Бангладеш Шеиха Хасина за време на своето обраќање по повод празникот Први мај ги повика сопствениците на текстилните фабрики и другите фабрики од Бангладеш да ги подобрат условите за работа на своите вработени со тоа што ќе се откажат од дел од својот луксуз.
„Сакам сопствениците (фабриките) да посветат посебно внимание на работниците, намалувајќи го малку нивниот луксуз, бидејќи работниците ви дадоа простор да водите луксузен живот со зголемување на производството со нивната напорна работа“, рече Хасина.
Таа, исто така, ги предупреди работниците да ги игнорираат повиците за штрајк бидејќи „на тој начин работниците понекогаш всушност си нанесуваат штета себеси, на своите семејства, на земјата и на сопствениците на фабриките“, пренесува агенцијата БСС.
Свет
Уривање на дел од автопат во Кина: Најмалку 24 лица загинаа, 30 се повредени
Најмалку 24 лица загинаа, а 30 се повредени при уривање на дел од автопат на југот на Кина, во провинцијата Гуангдонг, јавија кинеските медиуми.
„Осумнаесет автомобили паднаа по падината откако се урна дел од автопатот долг 17,9 метри околу 2 часот по полноќ“, се вели во соопштението на властите во градот Мејџоу во провинцијата Гуангдонг, пренесува АП.
Според американската агенција, околу 11:45 часот по локално време под урнатините биле пронајдени 18 автомобили.
Свет
Блинкен им порача на Израел и Хамас дека е време за прекин на огнот
Државниот секретар на Соединетите Држави (САД) Ентони Блинкен се состана со израелските лидери на 1 мај, за време на посетата на Израел, а во таа прилика му порача на претседателот на земјата дека „е дојдено времето“ за договор за прекин на огнот во војната во Газа.
Ова е седма посета на Блинкен од почетокот на војната меѓу Израел и Хамас – палестинска група прогласена за терористичка организација од страна на САД и Европската Унија уште од октомври.
Блинкен се обидува да постигне договор кој би ги ослободил заложниците кои ги држат милитантите на Хамас во замена за прекин на борбите. Како дел од договорот се очекува да бидат ослободени и палестинските затвореници.