Свет
Во САД повеќе од 130 американски дипломати го добиле синдромот Хавана

Меѓу американските дипломати, разузнавачки агенти и членови на Министерството за одбрана досега се регистрирани повеќе од 130 необјасниви инциденти поврзани со повреди на мозокот, познати како синдром Хавана, а некои од нив се случиле во последните неколку недели.
Тројца офицери на ЦИА добиле сериозни симптоми од декември откога биле на задачи во странство, па затоа морале да се пријават во воената болница во Вашингтон, пишува „Њујорк тајмс, пренесува „Гардијан“.
Бројот на пријавени случаи е за 70 поголем од првично објавениот.
Претставникот на поранешните функционери погодени од синдромот Хавана, Марк Заид, рече дека со него контактирале некои други службеници, кои сметаат дека имаат симптоми на овој мистериозен феномен.
„Бројките, дефинитивно, растат“, додаде Заид.
Американските официјални лица потврдија дека се појавуваат нови случаи, кои детаљно се анализираат, а истовремено предупредуваат дека некои луѓе можеби ги реинтерпретирале симптомите што ги имале порано и дека бројот на нови случаи не може да го одразува бројот на нови инциденти.
Во декември Националната академија на науките објави извештај во кој се наведува дека оштетувањето на мозокот што го претрпеле американските официјални лица на Куба и во Кина, најверојатно, е резултат на некаква форма на насочена енергија, односно енергетски напад.
Шерил Рофер, поранешна хемичарка во Националната лабораторија „Лос Аламос“, ги доведе во прашање заклучоците од студијата и тврдењата на жртвите и некои експерти дека зад оштетувањето на мозокот стои некаков вид микробраново оружје развиено од непријателите.
„Доказите за ефектите предизвикани од микробрановите, кои се нарекуваат синдром Хавана, се многу тенки. Ниту еден од поддржувачите на оваа идеја не објасни како навистина функционира оружјето. Нема докази дека такво оружје е развиено некаде во светот. Ваквите тврдења бараат јасни објаснувања, но досега никој не понудил нешто што би го потврдило постоењето на мистериозното оружје“, рече Рофер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Путин денеска изјави дека преговорите со САД во Алјаска биле „многу искрени и содржајни“

Рускиот претседател Владимир Путин денеска изјави дека преговорите со САД во Алјаска биле „многу искрени и содржајни“ и ги приближиле двете страни до донесување на неопходните одлуки.
– Разговорот беше многу отворен и по мое мислење нѐ доближува до потребните решенија, рече Путин на состанок во Кремљ посветен на резултатите од преговорите во Анкориџ.
Тој додаде дека долго време не биле водени преговори од ваков вид на толку високо ниво и дека имал можност „смирено и детално“ да ја изложи руската позиција. Според него, се дискутирало за сите аспекти на билатералната соработка, но главниот акцент бил ставен на можностите за праведно решавање на украинската криза.
На состанокот во Кремљ присуствуваа премиерот Михаил Мишустин, претседателот на Државната дума Вјачеслав Володин, раководителот на претседателската администрација Антон Вајно, како и секретарот и заменик-претседателот на Советот за безбедност Дмитриј Медведев и Сергеј Шојгу. Присуствуваа и вицепремиери, министри, како и гувернерката на Централната банка, претставници на ФСБ, Генералштабот и Рускиот фонд за директни инвестиции.
Путин најави дека детално ќе ги информира учесниците за разговорите со американскиот претседател Доналд Трамп. Состанокот во Кремљ продолжи зад затворени врати.
Регион
Црна Гора се бори со пожари

Седми ден по ред пожарите во Црна Гора не стивнуваат, а најкритично е во Подгорица, каде што и покрај тоа што ситуацијата е под контрола.
Началникот на Дирекцијата за цивилна заштита и намалување на ризици од катастрофи, Љубан Тмушиќ, соопшти дека најзагрозени области се Пипери и Кучки Корита. – Во овие подрачја се ангажирани сите расположливи ресурси – 12 возила и 42 пожарникари, рече Тмушиќ.
Посебна закана претставуваат и таканаречените „подземни пожари“ кои се активираат со пораст на температурите.
Во гаснењето се вклучени и армијата, како и помош од странство – Србија испрати хеликоптер, а вчера пристигна и швајцарски тим со 26 пожарникари и четири специјализирани возила. Поддршка дава и хеликоптер од Чешка.
Свет
(Видео) Четворица маскирани напаѓачи ограбија златарница во западниот дел на Сиетл

Четворица маскирани напаѓачи ограбија златарница во западниот дел на Сиетл и за помалку од две минути украдоа накит и луксузни предмети во вредност од околу два милиона долари, соопшти полицијата.
Настанот се случил во четвртокот попладне, а надзорните камери снимија како осомничените со чекани ги разбиваат заклучените стаклени врати и за 90 секунди празнат шест витрини. Меѓу украдените предмети се наоѓаат и „Ролекс“ часовници со проценета вредност од 750.000 долари и смарагдна огрлица вредна 125.000 долари, објави Еј-Би-Си њуз.
За време на грабежот, еден од напаѓачите им се заканувал на вработените со спреј против мечки и електрошокер, но никој не бил повреден.
„Длабоко сме потресени како вработени. Продавницата ќе биде затворена извесно време“, изјави потпретседателот на семејната златарница Џош Минаше.
Полицијата пристигнала веднаш по дојавата, но сторителите веќе избегале со возило и засега се недостапни за законот.