Македонија
Од ВМРО-ДПМНЕ поднесоа пријава против Шилегов, велат дека субвенциите за инвертери ги делел по партиски клуч
Денеска, ќе поднесеме пријава до Државната комисија за спречување на корупцијата (ДКСК) за градоначалникот на град Скопје, Петре Шилегов, за кој постојат основани сомненија дека ненаменски потрошил над 33 милиони денари народни пари, кои требало да бидат искористени за исплаќање субвенции за инвертер-клими на домаќинства што се греат на дрва, нафта или мазут, изјави советничката во Советот на Град Скопје од редовите на ВМРО-ДПМНЕ, Сетлана Колариќ.
„Од свиркачи во Град Скопје имаме информации дека им се давани субвенции и на домаќинства што не ги исполнуват бараните услови пропишани во програмата донесена од Советот на Град Скопје на 29 јануари 2020 година“, посочи таа.
Според Колариќ, станува збор за класична злоупотреба, која мора да биде санкционирана.
„Дополнително, постои сомнение дека поделбата на субвенциите е вршена и по партиски клуч. Имено, на некои од граѓаните им било барано да достават потврда од БЕГ дека не се приклучени на градското парно, на други им била прифаќана и изјава на нотар, а на трети не им се барани никакви документи“, нагласи претставничката на опозициската партија.
Таа додаде дека постојат и сомнежи дека е вршен поткуп пред избори, особено поради фактот што огласот за инвертер-клими бил распишан 13 дена пред парламентарните избори во 2020 година.
Колариќ побара ДКСК во најбрз можен рок да отвори постапка и да го истражи овој случај до крај.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.
Македонија
Личните документи ќе можат да се подигнат и в среда, извести МВР
Во пресрет на претстојните Претседателски и Парламентарни избори што ќе се одржат утре, Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 08.05.2024 ќе работат за издавање на лични документи со работно време од 08.00 до 19.00 часот.
„Исто така ги известуваме граѓаните дека сите барања за лични карти кои се поднесени до 03.05.2024 година, се веќе изготвени и граѓаните можат да ги подигнат“, соопшти МВР.
Македонија
Пронајдени три полуавтоматски пиштоли и 139 куршуми, ОЈО Велес отвори истрага за недозволено држење оружје
Основното јавно обвинителство Велес донесе Наредба за спроведување истражна постапка против едно лице за кривично дело – Неовластено изработување, држење, посредување и тргување со оружје или експлозивни материи од член 396 став 5 во врска со став 3 на Кривичниот законик.
„При претрес во домот на осомничениот во селото Мелница, општина Чашка, полицијата пронашла поголемо количество оружје и муниција – три полуавтоматски пиштоли и 139 куршуми со различен калибар. За осомничениот поднесен е предлог за определување мерка притвор“, соопшти Обвинителството.
ОЈО Велес продолжува да постапува и да презема дејствија за проверка на сомненијата за изборен поткуп во однос на овој осомничен и на уште едно лице во велешко кај кое во текот на вчерашниот ден беа извршени претреси, се додава во соопштението.