Македонија
(Видео) Николовски: Заврши времето кога народните пари се трошеа за сé и сешто

Заврши времето кога народните пари се трошеа за сé и сешто, сега службените трошоци се строго регулирани со уредби и одлуки кои за првпат се носат и важат за сите државни функционери, рече вицепремиерот задолжен за борба против корупција и криминал Љупчо Николовски, одговарајќи на пратеничко прашање на денешната собраниска седница.
Николовски посочи дека за првпат е донесена Уредба за дар со која се регулираат и подароците со целосно намалување на износите што се можни за примање подароци, а, како што кажа, воспоставен е и Регистар на примање подароци.
„Донесена е и одлука којашто е целосно во примена, а се однесува на регулирањето на угостителските услуги за сите избрани именувани функционери, регулиран е износот којшто може да биде потрошен и е регулирана целокупната постапка којашто треба да се спроведе“, посочи вицепремиерот.
Николовски најави и дека во владина процедура дополнително се неколку други одлуки коiшто ќе гo регулираат останатиот дел од службените трошоци, како што е Регистарот за службени возила, со кој точно ќе се регулира користењето на службените возила со цел да нема злоупотреби, а сето тоа ќе биде и законски регулирано.
„Граѓаните може да дознаат за секоја работа и за секое трошење од страна на сите институции и раководители. И да потсетам, тоа е огромна разлика од режимскотo време во кое стотици илјади евра од секое министерство и институции се трошеа нерегулирано, се вадеа кеш средства од службени картички и се трошеа нерационално. Не беа регулирани начинот и постапката и за што може да се трошат овие средства“, нагласи вицепремиерот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.