Најмалку девет Палестинци, од кои седум деца, се убиени во понеделникот наутро во израелски воздушен напад врз Рафај на југот од палестинската енклава Појасот Газа каде не престануваат судирите и покрај повикот на Советот за безбедност при Обединетите нации на итен прекин на непријателствата на вонредната седница ноќта кон понеделникот.

Советот за безбедност при ОН се состана на барање на Јордан откако неделата беше најкрвавиот ден во двонеделната војна меѓу Израел и палестинското исламистичко движење Хамас кога загинаа повеќе од 60 Палестинци и 13 израелски војници.„Членките на Советот за безбедност изразуваат сериозна загриженост поради сé поголемиот број настрадани. Членките на СВ повикуваат на моментален прекин на непријателствата“, изјави за новинарите амбасадорот на Руанда во ОН, Еужен Гасана, по итниот состанок на Советот. Членките на ВС повикаа на почитување на меѓународното хуманитарно право, вклучително на заштитата на цивилите, додаде амбасадорот Гасана.Меѓутоа, во понеделникот наутро девет Палестинци се убиени и сите се членови на едно семејство кои живееле во куќа која била цел на гранатирање. Портпаролот на израелската армија објави дека во понеделникот наутро се убиени најмалку десет Палестинци кои се уфрлиле во јужен Израел, преку тунелите кои водат од централниот дел на Појасот Газа. „Терористите коишто се уфрлија во Израел низ два тунела од северот на Појасот Газа се забележани и убиени се повеќе од десет“, рече. Во израелските редови елитната бригада Голани во последните 24 часа загуби 13 војници, или вкупно 18 загинати израелски војници од почетокот на офанзивата „Линија на одбраната“ која започна на 8-ми јули. Тоа се најтешките загуби за израелската војска од Либанската војна во 2006 година досега.Седум војници загинале во експлозија на бомба при минување на оклопни возила, трија во престрелка со палестинските активисти на две различни локации и уште тројца настрадале во пожар во една зграда, прецизира израелската армија./ Во понеделникот се пронајдени уште 16 тела на Палестинци убиени во воздушен напад врз една куќа во близина на Кан Јуенс, на југот на Појасот Газа. Шеџаија, источното предградие на Газа, беше најжестоко бомбардирано од страна на израелската армија од почетокот на судирите и притоа загинаа најмалку 72 Палестинци, соопшти портпаролот на медицинските служби во Газа. Повеќе од 250 лица се ранети во оваа населба во неделата и уште 450 во целиот Појас Газа, додава портпаролот.Во меѓувреме портпаролот Абу Убаида на военото крило на Хамас зборувајќи маскиран преку телевизијата на движењето, изјави дека за време на борбите во Појасот Газа е заробен еден израелски војник. Тој го идентификуваше заробениот војник како Шаул Арон Засега од израелска страна нема коментари, армијата соопшти дека ја проверува информацијата дека во текот на борбите е заробен нивен војник. Израелското воено радио, телевизиските станици и интернет медиумите го игнорираа тврдењето на Хамас. Доколку биде потврдена оваа вест, Арон ќе биде првиот израелски воен заробеник во Га за од 2011 година кога по пет години беше ослободен војникот Гилад Шалит заробен во 2006 година. Израел во 2011 година ослободи повеќе од илјада палестински затвореници за да биде ослободен Шалит. Меѓутоа, Хамас тврди дека тие повторно се уапсени по убиството на тројцата израелски тинејџери во другата палестинска енклава Западниот брег (од реката Јордан), и нивното ослободување го поставува како еден од условите за прекинување на огнот./крај/мф/сн

Извор: Reuters/AFP