Македонија
Пендаровски: Заштита на критичната инфраструктура предуслов за функционална држава

Во организација на Претседателскиот центар за политичко образование, а во соработка со партнерската Фондација „Фридрих Еберт“ – канцеларија во Северна Македонија, денеска беше одржана конференцијата на тема „Критична инфраструктура: ЕУ-димензија, закон, стратегиски и институционален пристап“.
Говорејќи за динамичните промени и растечката непредвидливост со која со соочува целиот свет, претседателот Стево Пендаровски во своето воведно обраќање нагласи дека новите асиметрични закани и зачестените природни и од човекот предизвикани непогоди и катастрофи ја зголемуваат ранливоста на критичната инфраструктура и со тоа ги загрозуваат виталните функции на државата и општеството.
„Отежнувачки фактор за нас е што Северна Македонија се наоѓа во еден климатски, но и безбедносно најранливи региони во Европа. Поради незавршената интеграција на регионот на Западен Балкан во Европската Унија и во НАТО, степенот на порозност на критичната инфраструктура секогаш има и нагласена безбедносна димензија, дополнително засилена со присуството на новите хибридни закани“, рече Пендаровски оценувајќи дека во такви сложени услови нашата држава е недоволно подготвена.
Според Пендаровски, за да имаме вистински функционална држава со одржлива развојна економија и можност за планирање на иднината, неопходно е да изградиме ефикасен систем за заштита на критичната инфраструктура, процес кон кој мора да пристапиме темелно и без импровизации.
„Треба да се утврдат јасни критериуми за идентификација на критичната инфраструктура и да се направат процени на ризиците и заканите за нејзиниот интегритет. Овој потфат е преголем за само една институција и за само еден мандат. Неопходно е да се вклучат сите надлежни државни институции, релевантни оператори и компании од приватниот сектор, како и искусни експерти од областа“, истакна претседателот.
Посочувајќи ја директивата на Европската Унија од 2008 година како ориентир при конципирање на идното решение, тој нагласи дека би можеле најдобрите европски искуства да ги приспособиме на нашиот домашен амбиент и постојните системски решенија. Стратегијата за заштита на критичната инфраструктура, истакна претседателот Пендаровски, треба да биде комплементарна со другите сродни стратегиски документи за одбрана, енергетика, економски развој, животна средина и за намалување на ризиците од катастрофи.
„Северна Македонија има потреба од заштита на критичната инфраструктура. Неопходно е без одлагање да пристапиме кон изработка на стратегија што ќе биде преточена во единствено законско решение и придружни оперативни документи. Треба да бидеме свесни дека тоа не е ни малку лесна задача. Градењето систем за заштита на критичната инфраструктура е крупен предизвик и за многу поголеми и поразвиени држави од нашата. Но, ако не го направиме тоа, цената може да биде многу висока“, заклучи Пендаровски во своето обраќање.
Министерката за одбрана, Радмила Шекеринска, рече дека членството во НАТО значи дека сме дел од колективната безбедност и затоа треба да ја подобриме и отпорноста на критичната инфраструктура.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Невидена партизација во тек, единствениот пат до вработување е или преку партија или преку граница, велат од СДСМ

„Во државата на ДПМНЕ, нема институција која не е подложена на груба партизација пред изборите. МНАВ, Министерството за одбрана и уште десетина институции со преку 700 огласи за работа се предмет на вдомување исклучиво партиски подобни лица. Вакава груба партизација е незапаметена во историјата на државата. Стручни и квалитетни кандидати се отфрлаат секаде, а местата се полнат со партиски луѓе. Се партизира секоја позиција, па дури и личните асистенти за децата со посебни потреби“, велат од СДСМ.
„ВМРО-ДПМНЕ ја уништува последната капка надеж кај младите дека може да се вработат според квалификации и знаење. Каде е министерот Минчев да излезе и да објасни како се професионализирала администрацијата? Администрацијата никогаш не била на посилен удар, не е ни чудо што лани преку 17.000 луѓе се иселиле. Оваа бројка секојдневно ќе расте. ВМРО-ДПМНЕ надежта ја претвори во очај.
Само ако се анализираат вработувањата во МНАВ, целата работа е јасна. Вработувањето на Атанас Стамнов, човек без никакво искуство во воздушниот сообраќај, е само почеток. Негова сопруга е Анита Стамнова, директор на Централниот регистар. Братот на претседателот на управниот одбор, Владимир Ристовски, кој е чист партиски кадар од Карпош, е унапреден.
Во Министерството за одбрана се случува уште поголема манипулација. Во конкурсот за 60 места за стручно оспособување на офицери, 74 кандидати успешно ја поминале селекцијата, но само 29 имиња се нашле во решението. Министерството за одбрана ја лаже јавноста тврдејќи дека тие кандидати ќе бидат пренасочени во “втора група” за курсисти, што е целосна манипулација.
Нема да има втора група, туку нов оглас за нови кадри кои се подобни и кои ќе ги чуваат местата за нив.
Граѓаните треба да бидат свесни дека пораката на ВМРО-ДПМНЕ е јасна: нема место во оваа држава за чесните, работливи, оние кои вложувале во себе и својот развој. Единствениот пат до успехот е или преку партијата или преку граница. Токму ваквиот систем граѓаните се надеваа да се промени, но тој не само што не се промени, туку за прв пат се надгради до мера на уништување на целото општествено ткиво“, соопшти СДСМ.
Македонија
„Додека Филипче и Заев уживаат во сомнително стекнатиот капитал, во Скопје Коцевски ги брани со сите сили за да им го штити капиталот и украдените пари“, велат од ВМРО-ДПМНЕ

„Не е проблем што Венко Филипче отишол на одмор, проблем е неговото лицемерие. Додека Венко Филипче ужива на јахта во Белото Море, неговата СДС во исто време хушка и потпалува пожари, додека во исто време држат пресови за ширење на паника и страв“, велат од ВМРО-ДПМНЕ.
„Додека Венко Филипче во друштво на Зоран Заев уживаат во сомнително стекнатиот капитал, во Скопје нивниот Љупчо Коцевски го бранат со сите сили за да им го штити капиталот и украдените пари.
Додека во Грција на јахта Венко Филипче покажува колку е одлепен од реалноста, во Скопје лажат дека им е грижа за работниците и стандардот на граѓаните.
Венко Филипче ужива со Зоран Заев на јахта во Грција, оваа фотографија која ја објавија медиумите го покажува целиот раскош и раскалашеност на СДС и нивното раководство.
Венко Филипче со неговиот тутор Зоран Заев покажаа врвно лицемерие.
Затоа, Венко Филипче и Зоран Заев се дел од срамното минато на државата и не се никаква иднина“, соопшти ВМРО-ДПМНЕ.
Македонија
Герасимовски: Детска атлетика со Кокан Ајановски на Кејот на Вардар

Градоначалникот Горан Герасимовски ги поканува сите деца од Скопје, заедно со нивните родители да се приклучат на спортска дружба и забава со познатиот македонски атлетичар Кокан Ајановски. Настанот ќе се одржи во среда, 13 август, со почеток во 19:00 часот кај скалите под Хотел „Парк“ на Кејот на Вардар и е во рамки на проектот „На одмор сум, во Центар сум“.
Дечињата ќе имаат можност да трчаат заедно со Кокан, да научат повеќе за атлетиката и да уживаат во позитивната енергија на спортот.
Герасимовски истакнува дека со овие активности им нудиме на децата што летово остануваат во градот можност за дружење, забава и нови спортски искуства.
„Верувам дека ваквите спортски дружби се најдобриот начин децата да го поминат летото активно и креативно. Нашата цел е да им создадеме моменти кои ќе ги паметат, но и да ги поттикнеме да го засакаат спортот како дел од нивното секојдневие. Спортот не само што го зајакнува телото, туку гради и тимски дух, дисциплина и самодоверба која е важна за развојот на децата. Ве чекаме во среда на Кејот на Вардар“, вели Герасимовски.
Настанот „На одмор сум, во Центар сум“, се реализира во рамки на Програмата за култура на Општина Центар за 2025 година. Целта е да се збогатат спортските, рекреативните и културните содржини за учениците кои не заминале на летен одмор.