Македонија
Народен правобранител: Итно да се најде решение за луѓето со истечени лични карти кои не можат да подигнат пари од банка

Народниот правобранител по информациите изнесени во јавноста, како и по јавувања од граѓани кои поради неможноста навремено да си ги обноват личните документи, особено личните карти (поради немање соодветен термин) се соочуваат со проблеми, па не можат да си подигнат пари од банка (пензии, плати и други личните примања) и да си ги платат сметките, бара Владата под итно, заедно со деловните банки да најде времено решение со кое ќе им излезе во пресрет на овие граѓани.
„Недозволиво е слабостите во системот за издавање лични документи во МВР, за што Народниот правобранител еднаш веќе реагираше, да се прекршуваат врз грбот на граѓаните и неправдано да им создаваат дополнителни проблеми, посебно што во принцип станува збор за категорија граѓани кои спаѓаат во групата на постари лица кои не ги користат дигиталните, туку оние традиционалните банкарски услуги, односно пензиите и платите ги подигнуваат непосредно од шалтерите на банките“, се наведува во реакцијата на Народниот правобрантел, Насер Зибери.
Според него, конкретно овие граѓани не по нивна вина се ставени во незавидна позиција, од една страна, да останат без основни средства за живот, а од друга страна, поради неможноста да си ги подмират долговите кон јавните претпријатија и другите даватели на услуги (струја, вода, телефон) да стравуваат дека истите ќе им бидат ускратени.
Народниот правобранител потсетува и дека оваа есен претстои одржување на пописот како и на локалните избори – операции за чие спроведување на граѓаните им требат важечки лични документи, па апелира надлежните институции да изнајдат начин за надминување на овој проблем.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Лицемерие и евтин театар, Дејан Митески без легитимитет собира политички поени преку лажно обвинување, реагираат од ЈП „Комунална хигиена-Скопје“

Лицемерие и евтин театар од В.Д. градоначалникот на Аеродром Дејан Митески. Полу градоначалникот Митески без легитимитет се обидува да собира политички поени преку лажно обвинување на ЈП Комунална хигиена Скопје, реагираат од таму.
ЈП Комунална хигиена, како што потенцираат, работи според оперативен план кој го усвојува Советот на Град Скопје, под целосна контрола на ВМРО-ДПМНЕ и ВЛЕН.
Планот, според наведенотот во реакцијата, го спроведува управниот одбор составен од ВМРО и ВЛЕН, предводен од Јулијана Спировска функционерка на ВМРО и криминалка осудена за убиство.
„Кога В.Д градоначалникот Митески ги повикува граѓаните да фрлаат кабаст отпад, треба да знае и дека законот го обврзува да го собира тој отпад.
А кога на слика се гледаат гарнитури и мебел од нечија дневна соба, тоа е обврска на службите кои тој ги раководи. Ако навистина ви беше Митески до хигиена, ќе побаравте од осудената криминалка за убиство и претседателка на Управниот одбор на Комунална хигиена, Јулијана Спировска и од вашиот Совет на град Скопје да си ја завршат работата. Но, на Митески кога целта му е да избегне одговорност, вистината не му е важна“, истакнуваат од ЈП Комунална хигиена Скопје.
Македонија
(Видео) Арсовска: Жителите на Ѓорче Петров не сакаат хемиски фабрики да се градат во општината

Жителите на Ѓорче Петров не сакаат три индустриски објекти хемиски фабрики на 157.000 m2 да се градат во општината, вели градоначалничаката на Град Скопје, Данела Арсовска.
„Во февруари 2024 година како град Скопје, не дозволивме и не дадовме согласност за градба на три индустриски објекти, хемиски фабрики на 157.000 m2 и дополнително над 30 висококатници со кои ќе се пренатрупа за двојно повеќе бројот на жители дозволени согласно ГУП во тој дел на градот“, додава Арсовска.
Како што појаснува, одлуката на општината Ѓорче Петров ја обжалиле уште тогаш до Уставниот суд затоа што хемиските фабрики ќе се градат во заштитната зона Нерези – Лепенец и бунарите од кои вода пие цело Скопје.
„На 28 мај 2025 година, година и половина од нашата иницијатива до Уставниот суд, судиите одлучија да не ја разгледуваат иницијативата за оценка на Уставноста поднесена од град Скопје“, реагира Арсовска.
Македонија
(Видео) Конески: СДММ тоне во безидејност, наместо предлози и поддршка на младите, тие се занимаваат со некрофилство како нивните ментори

СДММ по стапките на нивните ментори, тонејќи во безидејност и немање политики за младите, се занимаваат со некрофилство. Немањето на идеи, предлози, аргументирани критики, туку само ад хок напади врз власта, ги доведува на она место коешто се денес, а тоа е во длабока опозиција, вели Тодор Конески, член на ИК на УМС на ВМРО-ДПМНЕ.
„Иако, според Законот, членот 31 предвидува забрана за употреба во затворени простории. Да е уште потрагично, пратениците или оние коишто им ги пишуваат пресовите, не ги читаат Законите до крај. Бакљите спаѓаат во групата на пиротехнички средства од третата категорија коишто се во слободна продажба и без обврска на продавачот да го извести надлежниот орган, односно Отсекот за оружје. Се продаваат на физички лица, коишто не треба да имаат дозвола за ракување и доаѓаат со упатство за употреба. Притоа, мора да потенцираме дека ги испочитувавме сите параметри и предвидени законски норми за одржувањето на настанот. Пред одржувањето на настанот, ги известивме МВР, противпожарната бригада и Итната медицинска помош, сите кои беа просутни за време на одржувањето на настанот“, вели Конески.
СДММ, додава тој, наместо некрофилство и безидејност, треба да одговори, зошто вака не беа гласни за Модуларната болница, за Онкологија, за Дурмо турс, за Беса транс?
„Зошто не беа гласни кога нивните претседатели на партијата ветуваа многу проекти за млади, но ништо не остварија. Зошто не беа гласни кога се ветуваа студентски домови, нови факултети, нови вработувања за младите, нови стипендии, туку се тоа беше укинато. Зошто не прашаа каде се гугл, фејсбук и ветената стаза за Формула 1? Зошто не го прашаа Заев од каде му се парите за инвестиции за висококатници во Дубаи и акциите во индиска авиокомпанија? Зошто не го прашаа Филипче од каде му е златната виза за Дубаи“, праша тој.
Сега, нагласи тој, има конкретни мерки за младите, наведувајќи ги реконструкцијата на студентски домови, нови факултети и реконструкција на постоечките, нови училишта и реконструкција на голем дел на постоечките училишта и капацитети за учениците, поддршка на младите земјоделци, поддршка на старт ап бизнисите, поддршка за младите при купувањето на свој нов дом исто така нов оперативен план за вработување на младите.
Сите се проекти, според него, кои СДС не успеа да ги оствари за време на нивното владеење.
Порача, СДС и СДММ да не се срамат во јавноста, пред да кажат нешто два пати да размислат.