Македонија
Миланов: Измената на обвинението за „27 април“ е пораз за истрагата
Адвокатот Еленко Миланов смета дека измената на обвинителниот акт е триумф за одбраната. Според него, сега Миле Јанакиески и Спиро Ристовски не се товарат за организирање на партиски структури, туку за организирање на пратеници, без да се каже кој пратеник на кој начин е организиран.
Обвинителката Вилма Русковска, по судењето, кажа дека обвинението е променето поради недостаток на докази.
Миланов, кој ги застапува Јанакиески, Ристовски и Трајко Вељановски посочи дека се товарат за организирање на протести до 28 март, кога во Собранието не се спречувало ништо.
„Измената на обвинителниот акт сметам дека е само пораз за истрагата на Обвинителството и сето она што го правела до отпочнување на главната расправа. Одбраната со своите докази успеа да докаже дека оние дејствија кои што им ги ставаа на товар се до сега, за кои наводно ги сториле, а со тоа и ова кривично дело – паднаа во вода. Сите тие пропаднаа и затоа сега Обвинителството оди со сосема нови дејствија за кои одбраната досега ниту се произнела, ниту во тој дел понудила свои докази. Затоа сметам дека овој момент е триумф на одбраната, со тоа што, она што се тврдеше дека е сторено, не постои во диспозитивот на обвинителниот акт. Сега, имаме сосема нови дејствија. Организирање на протести заклучно со 28 март или на еден ден од отпочнувањето на расправата по третата точка. Кој до тогаш, до тој момент, било што спречуваше во Собранието? Дејствијата ако беа дека досега ги организирале партиските структури, Миле и Спиро, сега е дека организирале пратеници. Кој пратеник на кој начин го организирал? Во делот на насилство и организација на насилство во Собрание, освен некој си план, не ги товари Трајко, Миле и Спиро. На кој начин е сторено терористичко загрозување? Со насилство или со уметници на протести? Тоа е суштинската измена во обвинителниот акт“, рече Миланов.
Обвинителката Вилма Русковска прашана зошто ексминистерката за култура, Елизабета Канческа-Милевска, не е опфатена со обвинителниот акт, кога разменувала пораки со Миле Јанакиески кои се доказ дека обвинетиот организирал протести, таа кажа дека за неа немало докази дека направила нешто друго, освен ангажирањето на уметници.
„Не е комплетно изменето обвинението. Има измена во дејствијата на обвинетите Миле Јанакиески и Спиро Ристовски. Тие измени се направија бидејќи произлегоа од одбраната на обвинетите. Обвинителството има неспорни докази дека тие од првиот момент се едни од главните организатори на протестите на ‘За заедничка Македонија’. Не знам и стварно не ми е јасно зошто одбраната бараше одлагање на завршените зборови. Материјалните докази, СМС-пораките беа сите изведени. Бидејќи немаме материјален доказ за тоа, се направија измените. Само во однос на организирање на протестите. За Елизабета Канческа-Милевска нема обвинение зошто немавме докази дека освен ангажирање на уметници и познати личности, направила било што друго, конкретно. И Кирил Божиновски го споменав. Но, освен тоа, немавме други докази за нешто поконкретно“, рече Русковска по рочиштето.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Петрушевски: Поради бизнис интересот на претходната власт, граѓаните плаќаат поскапа струја, ЕСМ работи на намалување
Криминалното и недомаќинско работење на Сoцијалдемократскиот сојуз на Македонија и ДУИ во енергетскиот сектор и во управувањето со ЕСМ резултираше со поскапа струја за граѓаните 7 години по ред, и е причина за финансиските проблеми на претпријатието до денес, изјави пратеникот од ВМРО-ДПМНЕ, Бране Петрушевски.
„Ако во 2017 година кога ЕСМ го раководеше премиерот Христијан Мицкоски просечната производствена цена на 1 мегават час струја во РЕК Битола беше 33 евра, сега истата е 133 евра за мегават час. Зошто е тоа така? Ако ја погледнеме статистиката ќе видиме дека во времето кога премиерот Мицкоски управувал со ЕСМ производствената цена на струјата била пониска за над 25% од таа пред тоа. А што се случува потоа? Цената од година во година расте за во 2023 година да достигне 103 евра за мегават час, а во 2024 година 133 евра за мегават час“, рече Петрушевски.
Како што додаде, растот на цената е причинет од не копањето на сопствен јаглен, и скапиот увозен јаглен. Цената на произведен мегават час струја може да се намали и веќе раководството на ЕСМ работи на тоа, додаде Петрушевски.
Македонија
Финализиран проектот за обука за финансиски истраги, поддржан од Владата на Обединетото Кралство
Министерството за внатрешни работи изразува искрена благодарност до Амбасадата на Велика Британија и тимот за обука на Царската служба за приходи и царина за Западен Балкан, за успешната реализација на Проектот за обука за финансиски истраги кој се спроведува изминативе две години.
„Овој проект овозможи значителен напредок во знаењата и вештините на нашите претставници и претставниците на партнерските институции, вклучувајќи ги Финансиската полиција, Јавното обвинителство и Царинската управа. Доделувањето на меѓународно признати акредитиви е доказ за квалитетот на програмата и нејзината важност за зајакнување на нашите капацитети за справување со финансискиот и организираниот криминал“, велат од МВР.
Министерството посебно ја истакнува посветеноста на Владата на Обединетото Кралство за поддршка во борбата против сериозниот и организираниот криминал. Оваа соработка, како што се додава, е од непроценливо значење за зајакнувањето на институционалните капацитети и унапредувањето на безбедноста и владеењето на правото во нашата земја.
Со вакви проекти и заеднички заложби, продолжуваме да градиме побезбедна и стабилна иднина за сите наши граѓани.
Македонија
„Влен“: ДУИ како во холивудско сценарио оркестрирала сензационално враќање на Груевски
Јавноста деновиве дозна шокантни детали за тоа како ДУИ, како во холивудско филмско сценарио го оркестрирала сензационалното враќање на поранешниот премиер Никола Груевски во Скопје, велат од коалицијата „Влен“.
Од тука oбвинија дека во операцијата за враќање на поранешниот премиер Никола Груевски во Северна Македонија, вмешани биле група шверцери предводени од претседателот на партијата Али Ахмети, поранешниот вицепремиер Артан Груби и поранешниот министер за надворешни работи Бујар Османи, кој додека бил министер се сретнал со Груевски во Будимпешта.
„Во Вила Водно имаше средба за враќање на Груевски. На оваа средба што се одржа во март учествуваа Стево Пендаровски, Димитар Ковачевски, Али Ахмети, Бојан Маричиќ, Артан Груби, Бујар Османи. Али, кој има толкава носталгија за Никола Груевски кој толку многу им нанел зло на Албанците, нагласи дека овој може да се врати на два начина, преку помилување од претседателот и преку „нашите луѓе„ во судовите. Сепак, ова беше најпозитивниот дел од средбата, кој го сними вработен во администрацијата. Колку што траеше средбата, тој успеа да го сними телефонскиот разговор од кабината на преведувачот, а на крајот истата снимка му ја предаде на Блерим Ќосето Беџети. Ахмети и ДУИ, за да го спроведат својот план за ослободување на Груевски, вршеа силен притисок врз Врховниот суд, но тука наидоа на неволност на претседателката на овој суд, Беса Адеми, против која подоцна беше покрената иницијатива за разрешување како резултат на неслушање на наредбите. Потсетуваме на јавноста дека тогаш холандскиот амбасадор го посетил Али Груевски во Мала Речица каде го предупредил дека тој и неговата партија треба да се откажат од судовите и да престанат со притисоците“, велат од „Влен“.
Додаваат и дека измените во кривичниот законик што ги спроведе ДУИ биле донесени за да се активира од Будимпешта.