Македонија
(Видео) Муцунски: ВМРО-ДПМНЕ понуди резолуција за единство, СДСМ бара причини за разединување
На Република Македонија ѝ треба единство, не разединување. ВМРО-ДПМНЕ понуди резолуција за единство, СДСМ бара причина за разединување, истакна денеска пратеникот на ВМРО-ДПМНЕ, Тимчо Муцунски.
Тој додаде дека Извршниот комитет на ВМРО-ДПМНЕ останува на предложениот концепт за единство на сите политички партии, зад текстот кој е, како што рече, создаден и напишан од врвните научни, образовни и општествени институции МАНУ, УКИМ и МПЦ-ОА.
„Не би сакале да веруваме дека зад одлуката на СДСМ стои оставање простор за пазарење со националните и државните интереси од највисок интерес, идентитетот, јазикот и националната засебност на македонскиот народ. Структурата на предложената Резолуција е концепт зад кој, за првпат, политичките партии може да најдат минимум простор за заеднички позиции. За националните и државните интереси треба да го најдеме тоа што нè обединува“, рече Муцунски.
„Фактот што СДСМ одлучи да го промени својот став по трет пат и да отвора теми кои не се поврзани со содржината на резолуцијата, за жал, ги ослабнува позициите на Македонија во какви било идни разговори со Бугарија. Обврска на државниот врв е да обединува, а не да разединува. СДСМ го прави токму второто. ВМРО-ДПМНЕ нема да прифати една одлично структуирана резолуција, зад која стои авторитетот на највисоките образовни и научни институции, да стане предмет на партиски калкулации и пазарења“, истакна пратеникот на ВМРО-ДПМНЕ.
Според него усвојувањето на резолуцијата е од исклучителна важност за забрзување на европската перспектива, зацврстување на државниот и националниот суверенитет на Република Македонија.
Додаде дека Собранието на Република Македонија во овие, како што ги нарече, критични моменти на развојот е повеќе од потребно да излезе со единствен државен став во поглед на прашања кои се од национално значење и кои се очекува да придонесат за непречениот развој на нашата држава, но и за унапредувањето на мирот, стабилноста и безбедноста на нашиот регион и Европа во целина.
„Наша заедничка оценка е дека на македонската дипломатија ѝ е потребна соодветна алатка во нејзините раце со која на меѓународната сцена ќе се грижи за целосна заштита на македонскиот идентитет, повеќе вековните историски традиции, преданија, обичаи, колективна меморија, расна и етничка припадност, лингвистичко единство, етнокултурна посебност, колективен интегритет, религиски идентитет, заеднички економски живот и наративот за припадност на одреден и географски простор. Целта на резолуцијата не е да се поткопаат позициите на Република Македонија, туку да се помогне во насока на заштита на националните интереси, а токму оваа резолуција нуди компромисна содржина позади која може цврсто да се обедини целата македонска нација во заштита на македонскиот јазик и македонскиот национален идентитет“, потенцира Муцунски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.
Македонија
Личните документи ќе можат да се подигнат и в среда, извести МВР
Во пресрет на претстојните Претседателски и Парламентарни избори што ќе се одржат утре, Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 08.05.2024 ќе работат за издавање на лични документи со работно време од 08.00 до 19.00 часот.
„Исто така ги известуваме граѓаните дека сите барања за лични карти кои се поднесени до 03.05.2024 година, се веќе изготвени и граѓаните можат да ги подигнат“, соопшти МВР.
Македонија
Пронајдени три полуавтоматски пиштоли и 139 куршуми, ОЈО Велес отвори истрага за недозволено држење оружје
Основното јавно обвинителство Велес донесе Наредба за спроведување истражна постапка против едно лице за кривично дело – Неовластено изработување, држење, посредување и тргување со оружје или експлозивни материи од член 396 став 5 во врска со став 3 на Кривичниот законик.
„При претрес во домот на осомничениот во селото Мелница, општина Чашка, полицијата пронашла поголемо количество оружје и муниција – три полуавтоматски пиштоли и 139 куршуми со различен калибар. За осомничениот поднесен е предлог за определување мерка притвор“, соопшти Обвинителството.
ОЈО Велес продолжува да постапува и да презема дејствија за проверка на сомненијата за изборен поткуп во однос на овој осомничен и на уште едно лице во велешко кај кое во текот на вчерашниот ден беа извршени претреси, се додава во соопштението.