Ексминистерот за транспорт и врски, Миле Јанакиески, кој е обвинет дека бил организатор на упадот во Собранието на 27 април, побара ослободителна пресуда. Тој се заколна дека не придонел да се случи крвавиот настан.

Јанакиески рече дека бил во притвор за околности за кои сега обвинителката Вилма Русковска кажала пред медиумите дека нема докази. Тој очекува да биде ослободен од сите обвиненија.

„За овој предмет бевме во притвор со Спире. Ниту за тој настан се најдоа мотивите зошто бевме претепани ниту се откри вистината за 27 април“, рече Јанакиески.

За пораките разменети со ексминистерката за култура, Елизабета Канческа-Милевска, во кои таа бара свирчиња од Јанакиески, обвинетиот рече: „Па со свирчиња ли ги викна некој присутните пред Паркот на жената борец да влезат во Собранието?“

Тој вели дека како и во текот на судскиот процес и сега не негира дека давал мислења за јавни личности што биле говорници, но не бил организатор на протестите на „За заедничка Македонија“.

„Обвинителниот акт и ваквото постапување на Обвинителството ја наметнува правната несигурност што во основа ја има правната дискриминација базирана на фикции, лажен исказ и претпоставки за вина, а сето тоа се прави како обид да се докаже дека јас сум виновен за дејствата што ми се ставаат на товар со обвинителниот акт. Не сум јас тој што треба да седи тука пред вас на оваа обвинителна клупа“, рече Јанакиески.

„Главното прашање што се поставува денеска пред вас е ‘дали за овие 2,5 години слушнавте од Обвинителството: еве го доказот против Миле Јанакиески, еве го доказот дека Миле Јанакиески ги сторил дејствата што му се ставаат на товар?’ Ниту вие, ниту јас, ниту моите бранители ниту, пак, јавноста не слушна, ниту виде. Сето ова време се правеа манипулации и се зборуваше од страна на Обвинителството дека ‘Миле ги координирал комитетите за масовност на протестите’. И, одеднаш, по речиси 2 години судски рочишта, на крајот од постапката – тој дел исчезнува. Излегува обвинителката и вели: ‘Немаме докази’. Па оттука се прикажува нова приказна: ‘Миле ги организира пратениците и протестите’. Е, како е тоа направено? Се јавила Канческа-Милевска и барала свирчиња. Добро, и? Со свирчиња ли ги викна некој присутните пред Паркот на жената борец, кои го извршија актот на насилство да влезат во Собранието? Без поента се целата таа помпезност и презентирањето на тие пораки, кои, за жал, не може ни да се поврзат со обвинението, освен ако, како во случајот, некој си замислил некаква фикција нешто дека е така, па тоа евтино и се надевам безуспешно го продава пред судот и јавноста“, изјави Јанакиески.

Во периодот кога се разменувани и пораките што Обвинителството ги презентирало, Јанакиески вели дека немало никакво насилство, ниту нетрпеливост, а во Собранието не се дискутирало за избор на претседател.

За пораките со Канческа-Милевска, обвинетиот рече дека не може да се предмет на кривично дело, а тоа го потврдила и Русковска со изјавата пред медиумите, во која рекла: „Немаше обвинение за неа затоа што немавме докази. Освен ангажирање уметници и познати личности, таа не направила што и да било друго конкретно“.

„Ако за Канческа-Милевска нема докази, како може за мене врз основа на истата комуникација да се бара од вас да утврдите дека јас сум наводен организатор на протестите и тие да претставуваат како доказ за упадот во Собранието. Како може за Канческа-Милевска, која контактирала со нив, да нема основ за кривично гонење, а за мене, бидејќи контактирам само со неа, да има? Не е можно, почитувани судии. Или пораките имаат доказна вредност или немаат“, рече Јанакиески.

Во завршниот збор Јанакиески рече дека врз основа на пораките се правеле претпоставки, а за обвинителниот акт посочи дека се базира на фикции, лажен исказ и претпоставки за вина.