Македонија
(Видео) Стартува изградбата за брана на реката Отиња во Штип

Стартува изградбата на најголемиот капитален проект за Штип, а тоа е браната на река Отиња.
Премиерот Зоран Заев кој присуствуваше на настанот изјави дека сонот стар 60 години за изградба на браната е веќе реалност.
„Ги гледаме првите градежни машини, коишто работат на изградбата на браната. Работиме посветено и остваруваме. Инвестиционата вредност на градбата изнесува 306 милиони денари согласно склучените договори за изведба и надзор. Средствата се обезбедени во Буџетот на Министерството за транспорт и врски за период од 2021 до 2023 година, а рокот на изведба е планиран да изнесува 30 календарски месеци или две и пол години. Со проектот е предвидено да се изведе камено земјена брана со централно глинено јадро со висина од 33 метри“, рече премиерот Зоран Заев на настанот по повод почетокот на изградбата на браната.
Премиерот Заев на настанот на кој се обратија и вицепремиерот Љупчо Николовски, министерот за транспорт и врски Благој Бочварски и градоначалникот на Штип, Сашко Николов, подвлече дека придобивките од оваа инвестиција се бројни.
„Браната на река Отиња на Штип ќе му донесе промена на климата, заштита на градот од поплави, но и место за рекреација. Ќе се намалат високите летни температури, но и ќе влијае на зголемување на зимските температури. Дополнително се создава биолошки минимум во коритото на река Отиња, а ќе се користи и за наводнување на зелените површини. Ова ќе биде место за рекреација на штипјани, но и на сите наши граѓани во државата. Ќе биде можност за иден развој на градот во наредните години и децении. Плановите тука не застануваат, во втора фаза веднаш после изградбата ќе ја разработуваме и можноста за овој објект да произведува електрична енергија, а со тоа да стане и самоодржлив. Од економски аспект, планираниот проект особено за време на градежната фаза ќе придонесе за проширување на локалната економија, директно преку нови можности за вработување. Се проценува дека околу 200 лица ќе бидат ангажирани за времетраење на градежната фаза“, рече премиерот Заев.
Вицепремиерот Николовски, во своето обраќање истакна дена истокот се претвора во регион каде што буквално во секоја област се реализираат капитални инвестиции.
„На овој проект, сум особено горд и силно го поддржувам, бидејќи целата процедура за изградба на браната, започна кога бев министер за земјоделство, шумарство и водостопанство, во рамки на надлежностите што ги имаше министерството, а во соработка со министерството за транспорт и врски и со Општина Штип. Оваа Влада покажа како вистински треба да се грижиме за граѓаните, за обезбедување на достојни услови за живот во секоја општина, за реализација на капитални проекти од витално значење, за заживување на сите региони во државата подеднакво“, рече Николовски и додаде дека паралелно, непречено се одвива инвестициската офанзива во патната инфраструктура во источниот и североисточниот регион.
Министерот Бочварски истакна дека конечно стартува капиталниот проект кој беше најавуван децении наназад.
„Оваа Влада и тимот од локалната самоуправа Штип покажавме храброст и решителност. Потрошивме многу часови и денови, но со голем ентузијазам и верба почнавме полека да го трасираме патот до сегашната реализација. Изготвивме основен проект, се направи ревизија на проектот, студија за животна средина, изработивме Урбанистички план, преку општината обезбедивме разни согласности од државните институции, за на крај со поддршка на Владата да обезбедиме средства од државниот буџет и преку Министерството за транспорт и врски и да обезбедиме одобрение за градење за да можеме денеска конечно да излеземе пред граѓаните на Штип и да кажеме, еве тоа е тоа што години и децении наназад беше најавувано, оваа Влада, оваа локална самоуправа започнува да ја гради браната Отиња. Успеавме и сите сме горди на овој успех. Но сега пред нас е нов предизвик. Искуствата покажуваат дека изградбата на ваков габаритен објект нема да биде лесно, впрочем во градежништвото и нема лесна работа. На терен не чекаат нови предизвици, но тука повторно сме сите, заеднички да ги решаваме“, рече Бочварски и додаде дека денеска сме сите сведоци на економското зајакнување на Истокот, се модернизира цела патна мрежа, се изгради еден автопат, се градат нови експресни патишта, се отвораат нови фабрики и нови работни места.
Градоначалникот Николов рече дека со овој најголем и најзначаен капитален проект, Штип не само што добива брана од 3 милиони метри кубни вода и опфат од 120 хектари, туку градот ќе има сигурна заштита од поплави.
„Населбите Суитлак и Блок 2.000 конечно ќе се поврзат со улица што ќе поминува по круната на браната, а за нашиот град ќе се отвори нова можност за економски развој и напредок. Изградбата на овој значаен проект значи чиста животна средина, вода и место за рекреација. Иако некои не веруваа нашето присуство денес, потврдува дека го реализираме сонот на штипјани, ја градиме браната Отиња и стоиме на зборот“, рече Николов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Бендевска: Да го продолжиме заветот од Илинден и пораката од АСНОМ

По повод 2 Август – Денот на Републиката, во име на претседателот на Собранието на Република Северна Македонија, Африм Гаши, потпретседателката на Собранието на Република Северна Македонија, Весна Бендевска, заедно со собраниска делегација во состав: Бране Петрушевски, Никола Коњановски, Даниела Николова и Даниел Стојчевски, одбележа 81 година од Првото заседание на АСНОМ, во Меморијалниот центар АСНОМ во Пелинце.
„На хероите на двата Илиндена кои се жртвуваа за денес да можеме да бидеме свои на своето, да им ветиме уште еднаш дека денешните генерации нема да го заборават заветот што ни го оставија. Да ги насочиме нашите погледи, стремежи и напори од заедничкото минато, кон заедничката сегашност и иднина. Да го продолжиме заветот од Илинден и пораката од АСНОМ“ – порача потпретседателката Бендевска.
Македонија
(Фото) Сиљановска-Давкова: Мора да го искорениме плевелот на корупцијата и криминалот, време е за нова пролет на нашата македонска република

Претседателката Гордана Сиљановска-Давкова, денеска се обрати на чествувањето на 2 Август – Илинден, Денот на Републиката на Мечкин Камен во Крушево.
Во својот говор, Сиљановска-Давкова рече дека е „време за нова пролет на нашата македонска република, за навраќање на републиканските корени“.
„Што значи тоа? Македонските граѓани од својата република очекуваат барем две нешта ̶ слобода и правда. Кога зборувам за слобода, не мислам само на политичката, туку и на економската, на академската, на културната, на социјалната… Кога зборувам за правда, не мислам само на правосудството, туку и на социјалната, еколошката и на генерациската правда. Не смееме да изумиме дека предуслови за слободата и за правдата се владеењето на правото и еднаквоста пред законот“, истакна претседателката.
Таа додаде дека „мора да го искорениме плевелот на корупцијата и на криминалот“.
„Никој не смее да биде недопирлив, независно дали е поранешен или актуелен политичар или функционер, судија или влијателен бизнисмен. За правдата да биде неселективна и навремена, потребни се забрзани и длабоки реформи во правосудството, а тие почнуваат со европска правна рамка, но и со европски критериуми на регрутирање, како и со европски стандарди на функционирање и одговорност“, вели Сиљановска-Давкова.
Според неа, потребен ни е здравствен систем по мерка на здравјето на пациентите и на нацијата. За креативните умови, потребни се инвестиции во образованието и науката, во истражувањето, во развојот и дигитализацијата.
Претседателката се осврна и на пожарите.
„Деновиве, републиката ни е во пламен. За помалку шумски пожари, потребен е не само правен, туку и ефикасен институционален систем, вистински луѓе на важни позиции, вградена превентивна и волонтерска димензија, стимулативни мерки за пожарникарите, пожарникарството и за волонтерите. И овие активности се во ек. За да се заштити здравјето на луѓето и на природата, мора да ставиме крај на дивите депонии и на нивното палење, но и да имаме контрола врз палењето“, вели претседателката.
Сиљановска-Давкова истакна дека имаме потреба од длабоки и суштински реформи во секоја област по европска мерка: со заштитени слободи и права, со владеење на правото и бескомпромисна борба со корупцијата; со стратегиски партнерства со државите со заеднички вредности и интереси; со независни и функционални институции; со компетитивна економија и со капитални инвестиции; со партиципативна политичка култура.
„Ние не сме стебло без корен. Нашата слобода и нашата република се вкоренети во европската пролет на народите, во демократските и хумани визии на „Млада Европа“. И затоа, на оној што ќе ни рече „вие сте млад народ со млада држава“, ќе му одговориме дека сме чеда на Гоцевата визија за „Млада Европа“ обединета Европа, и за светот како поле за културен натпревар на народите!
Колку и да ни е тешко, не треба да се обесхрабруваме од пречките и препреките. Сме опстоиле и сме надминале и потешки проблеми. Не сме сами. Имаме пријатели – демократи кои го почитуваат нашето право на национален и културен идентитет, на граѓански дигнитет и интегритет зашто и самите го сакаат и уживаат. Верувам во нивната поддршка и помош. Тие не се плашат да укажат и да се спротивстават на двојните стандарди и на анахроните обиди за ревизија на историјата.
Ние не се откажуваме од природниот пат кон членството во ЕУ, оти отсекогаш сме дел на Европа: географски, историски и културно, зошто да не и политички. Едноставно, ние балканските народи и нации сме биле, сме и ќе останеме Европејци.
Цврсто сме решени како што беше европски зацртано да стигнеме до целта до 2030 година, европеизирани по словото на Копенхагенските критериуми!“, рече претседателката Сиљановска-Давкова.
Македонија
Филков од Пелинце: АСНОМ нека ни биде потсетник – патот на правдата бара храброст, истрајност и одговорност

Министерот за правда, Игор Филков, беше дел од владината делегација која оддаде почит по повод 81 година од Првото заседание на АСНОМ, во Меморијалниот центар АСНОМ во Пелинце.
„Денес сме овде, во Меморијалниот центар АСНОМ во Пелинце, за да оддадеме почит на државничката визија и храброста на генерациите кои пред 81 година го поставија темелот на нашата државност.
Првото заседание на АСНОМ не е само историски момент, туку жив доказ дека борбата за правда, слобода и достоинство е темел на нашето постоење како народ и држава.
Како министер за правда, должност ми е да го чувам тој завет – да се грижам за правна држава, за независни институции и за заштита на човековите права.
Нека ни биде потсетник – патот на правдата бара храброст, истрајност и одговорност. АСНОМ ни остави обврска, а ние имаме должност таа обврска да ја преточиме во дела“, истакна министерот Филков.