Директорот на Здравствениот дом Охрид заедно со поранешната раководителка за економски работи и уште еден вработен во домот купувал лап топ компјутер, мобилен телефон, фотоапарат, тренерки, накит од сметката на установата со што го оштетил домот за речиси 10.000 евра.

Во текот на 2013 и 2014 година, директорот М.Д. заедно со  второпријавената М.Н., која во тој период била раководител за економски работи, од повеќе фирми во Охрид и од други градови, набавиле техничка роба, лап-топ компјутер, мобилен телефон, фото апарат, во вредност од 208.583 денари, часовници  и накит во вредност од 149.050 денари, фотоапарат со оптички зум и мобилни телефони во вредност од 45.890 денари, тренерки и 21 чифт обувки во износ од 133. 792 денари и две влезни врати во вредност од 61.193 денари. На тој начин, двајцата ја оштетиле установата со паричен износ од 598.508 денари или 9.731 евра.Набавените производи не биле евидентирани во сметководствената евиденција, не била изготвена документација за прием, а фактурите од добавувачите биле целосно исплаќани од сметката на ЈЗУ„Здравствен дом“. При извршениот попис во листите, констатирано е дека стоката не е евидентирана и ја нема  во просториите. Од извршениот увид во фактурите од фирмите каде се купени производите, утврдено е дека сите фактури се потпишани од директорот кој лично ги подигнувал купените предмети. Од извршените контроли, констатирано било дека фактурите уредно се заведувале во влезната книга во ЈЗУ „Здравствен дом“ со потпис од второ пријавената М.Н. а потоа се чувале заклучени во нејзиното биро. Тука биле пронајдени  при извршена финансиска контрола од Фондот за здравствено осигурување.Трето пријавениот Л.Р. како одговорен за возниот парк, несовесно работел, на начин што во период од 27.03.2014 година до 19.06.2015 година, во патните налози за службеното возило впишувал податоци за изминати километри многу поголеми од реалните, не водел уредна евиденција на бројчаната состојба  на броилото на возилото кое го управувал и истото, заедно со директорот го користел за приватни потреби. Против директорот и раководителката е поднесена кривична пријава за злоупотреба на службената положба, а против одговорниот за возниот парк е поднесена кривична пријава за несовесно работење во службата./крај/мф