Македонија
Средба Џафери-Кучава: Интеграциските искуства на Северна Македонија, можат да бидат од полза за Грузија

Во рамките на Петтата светска конференција на претседатели на парламенти, што се одржува во Виена, Австрија, претседателот на Собранието на Република Северна Македонија Талат Џафери, оствари средба со претседателот на Парламентот на Грузија, Каха Кучава.
Претседателот Џафери изрази задоволство што по воспоставувањето на билатералните односи меѓу Република Северна Македонија и Грузија во 2019 година, политичката соработка на високо ниво се движи по нагорна линија, а потврда за ова е посетата на претседателката на Грузија, Саломе Зурабишвили на нашата земја во мај годинава. Тој се осврна на унапредувањето на меѓу-парламентарната соработка, истакнувајќи дека во двата парламенти се формирани пратенички групи за соработка и пријателство, а пратениците од двете земји успешно соработуваат и во рамките на меѓународните парламентарни собранија.
Џафери оцени дека Договорот за олеснување на визниот режим и Меморандумот за соработка во областа на културата се од големо значење за унапредување на билатералните односи, а Спогодбата за заемно укинување на визите несомнено ќе придонесе за подобра комуникација и зајакнување на пријателството меѓу Северна Македонија и Грузија.
Претседателот на Парламентот на Грузија, Каха Кучава, изрази благодарност што Република Северна Македонија ги поддржува суверенитетот и територијалниот интегритет на Грузија во рамките на меѓународно признатите граници. Тој истакна дека, двете земји ја споделуваат стратешката определба за членство во ЕУ и НАТО и меѓусебно се поддржуваат на мултилатерален план. Искуствата на Северна Македонија во интеграциските процеси, можат да бидат од особена полза за Грузија.
Истовремено, Кучава информираше дека во 2020 година во Парламентот на Грузија бил основан Парламентарен центар за истражување, врз основа на искуствата од Парламентарниот институт на Собранието на Република Северна Македонија. Тој оцени дека реципрочните посети на претседателите од двата парламенти во голема мера можат да ја продлабочат меѓу-парламентарната соработка и да ги унапредат билатералните односи.
Соговорниците се согласија дека во наредниот период треба да се направат заеднички напори за интензивирање и продлабочување на економската соработка и зголемување на трговската размена. Постои голем простор и за унапредување на соработката во областа на туризмот, внатрешните работи, образованието, науката и техниката.
На крајот од средбата претседателите Џафери и Кучава изразија подготвеност за натамошно унапредување на соработката меѓу двата парламенти, како во рамките на меѓународните парламентарни собранија, така и на билатерално ниво, меѓу пратеничките група за соработка и комисиите за надворешна политика и европски прашања.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Марш на ангелите во Кочани: Ако нема правда за ангелите, за нивните родители и семејства, нема да има за никој

Правда мора да има, ако не ќе поставиме шатори пред судот и полицијата и нема да дозволиме никој да влегува. Ако нема правда за ангелите, за нивните родители и семејства, нема да има за никој. Ова го порача поддржувач на родителите чии деца загинаа на 16 март во дискотеката „Пулс“ во Кочани.
Тој од својата инвалидска количка го предводеше осумнаесетиот марш на ангелите. Зборувајќи пред Основниот суд во Кочани, ја обвини полицијата дека дваесет минути на влезот во градот, кај ресторанот „Национал“, држела луѓе од други општини затоа што доаѓале да ги подржат кочанчани.
– Без никакво образложение легитимирале, претресувале. И порачувам на цела Влада – помеѓу тие луѓе нема ниту еден терорист, ниту еден нарко дилер, ниту еден криминалец. Тоа се луѓе со душа и срце. Зошто се прави таков притисок, се обидувате ли нешто да скриете. Истрагата „терајте“ ја како што треба. Родителите на починатите веќе немат солзи во очите, изјави поддржувачот на родителите.
Осумнаесетиот марш на ангелите вечерва се одвиваше по истата маршрута како и претходно: Парк на Револуцијата, кафуле „Класик“, Општина, УЈП, полиција, суд, со тоа што вечерва немаше свирежи пред споменатите институции.
Родителите беа доста тивки. Сестра на починато момче во пожарот во „Пулс“ само потсети дека денеска, 16 август, навршија пет месеци откако на 16 март 62 лица ги загубија своите животи.
Македонија
Пожарот што зафати дел над селото Лојане, Општина Липково, во голем дел е локализиран и изгаснат

Пожарот што зафати дел над селото Лојане, Општина Липково, во голем дел е локализиран и изгаснат. Селото е целосно заштитено, а интензитетот на горењето во појасот на боровата шума значително е намален, информира вечерва директорот на Центарот за управување со кризи (ЦУК) Мухамед Али.
Со отворањето на патот за пристап, како што наведува, се овозможи пешадиско дејствување на екипите на „Национални шуми“, што значително придонесе кон ограничување на ширењето на огнот.
– Во акцијата беа ангажирани хеликоптер Бел-412 на МВР, две екипи на Територијалната противпожарна единица Куманово со соодветни противпожарни возила, како и екипи на „Национални шуми“ – Подружница Куманово со специјализирани возила за шумски пожари. Активно учество зема и месното население, чија помош беше од големо значење. Како директор на Центарот за управување со кризи, лично ги координирав активностите на терен, осигурувајќи соработка меѓу институциите и брза реакција за заштита на животите и имотот на граѓаните. Благодарност до сите учесници за професионалниот ангажман и посветеност, нагласи Али.
ЦУК соопшти дека вечерва до 18:00 часот на територијата на цела држава има вкупно 19 пожари на отворен простор, од кои четири се активни, а 15 се изгаснати. Освен пожарот во селата Лојане и Табановце, активни пожари има и во повеќенаменското подрачје „Јасен“, во општина Јегуновце, меѓу селата Рогачево, Јажинце, Долно Орешје, каде се зафатени пасишта и мешана шума и во кумановското село Черкези.
Македонија
На Табановце се чека 40 минути

Зголемена е фреквенцијата на возила во земјава. На граничниот премин „Табановце времето на чекање за излез е околу 40 минути, додека на останатите гранични премини од македонска страна нема подолги задржувања при влез или излез од државата.
Како што информира АМСМ, сообраќајот на државните патишта се одвива непречено, по суви коловози, а интензитетот на патиштата надвор од градските средини е зголемен.
Се препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.