Македонија
Путин, папата, кралицата Елизабета и други светски лидери со честитки по повод 8 Септември

По повод 8 Септември, Денот на независноста, писма со честитки до претседателот Стево Пендаровски испратиле повеќе шефови на држави, меѓу кои и најмоќните светски лидери.
Од Кабинетот на претседателот на државата во соопштение до јавноста интегрално ја пренесуваат содржината на писмата.
Претседателот на Сојузна Република Германија, Франк Валтер-Штајнмаер, во писмото упатува срдечни честитки по повод 30-годишнината од нашата независност.
„Во последните 30 години Вашата земја се справи со голем број предизвици и притоа постигна многу. Примери за тоа се мирното решавање на конфликтот од 2001 година преку Охридскиот рамковен договор, историскиот преспански договор и членството во НАТО во последната година. Северна Македонија сѐ уште не е на целта. Германија и понатаму ќе се залага што е можно побргу да почнат пристапните преговори со Европската Унија. Притоа од големо значење се доследното продолжување на реформите во областа на владеењето на правото и доброто владеење, како и негата на добрососедските односи“, пишува во честитката од германскиот претседател.
Претседателот на Република Франција, Емануел Макрон, честитајќи го Денот на независноста, во честитката изразува воодушевување за патот што го поминавме по потпишувањето на Охридскиот рамковен договор пред дваесет години.
„Вашиот успех и успехот на вашата земја за помирувањето, за кое сведочи и преспанскиот договор, служи како пример во регионот и пошироко. Франција и Европската Унија остануваат на ваша страна за стабилноста и за просперитетот на Северна Македонија и на Западен Балкан. Ние ги поддржуваме сите иницијативи што се во таа насока, особено ‘Преспа форумот за дијалог’“, пишува францускиот претседател. Во честитката претседателот Макрон ја изразува својата целосна поддршка за европската перспектива на Северна Македонија. „Франција е решена дека преговорите за членство треба да почнат следните месеци и ќе продолжи да спроведува напори за да се изнајде решение за билатералните спорови. Франција ќе биде внимателна за преговарачката рамка, која ќе биде усвоена, да ја одразува новата методологија за процесот за членство, која јас ја посакував, и ќе продолжи да ги унапредува и да ги поддржува суштинските реформи за европското приближување на Северна Македонија, особено во клучните области, како што е владеењето на правото, кои се во сржта на европските вредности“, се вели во честитката од францускиот претседател.
Претседателот на Соединетите Американски Држави, Џо Бајден, во име на американскиот народ ѝ го честита Денот на независноста на Северна Македонија, при што нагласува дека одбележувајќи ја оваа пригода, исто така се одбележуваат 25-годишнината од дипломатските односи и силното пријателство меѓу двете нации.
„Со гордост ја поздравивме Северна Македонија како 30-ти сојузник на НАТО минатата година,ж признавајќи дека Вашата земја даде витален придонес за безбедноста и стабилноста на регионот долго пред таа да ѝ се приклучи на алијансата. Како што Вашата земја продолжува да напредува – зголемување на просперитетот за сите Ваши граѓани, подобрување на владеењето на правото, зајакнување на Вашите демократски институции – САД остануваат Ваши силни и непоколебливи поддржувачи. Со нетрпение очекуваме да соработуваме со Северна Македонија на патот на спроведувањето на реформите што ќе ја обезбедат европската иднина на Вашата земја, вклучително и пристапувањето во Европската Унија“, пишува во честитката од американскиот претседател.
Кралицата на Обединетото Кралство на Велика Британија и Северна Ирска, Елизабета II, ја упатила следната честитка: „Ми претставува особено задоволство да Ви го честитам државниот празник, Денот на независноста, со најискрени желби и честитки за среќа и просперитет на народот на Република Северна Македонија“.
Кралот на Холандија, Вилем Александер, во писмото упатува честитки и желби за благосостојба на граѓаните на Северна Македонија.
„Додека го одбележуваме овој повод, морам во исто време да го признам предизвикот без преседан што тековната пандемија на Ковид-19 го претставува за сите нас. Ви посакувам, на Вашата Влада и на Вашите граѓани, сила, храброст и здравје, а сите ние продолжуваме со напорите за надминување на оваа криза“, стои во честитката од холандскиот крал.
Претседателот на Руската Федерација, Владимир Путин, во честитката посакува добро здравје и успеси, а на сите граѓани благосостојба и просперитет.
„Убеден сум дека развојот на конструктивната соработка помеѓу Русија и Северна Македонија би им одговарал на темелните интереси на нашите народи, би придонесувал за зајакнување на стабилноста и безбедноста на европскиот континент“, се наведува во честитката од рускиот претседател.
Претседателот на Република Турција, Реџеп Таип Ердоган, во име на турскиот народ и во негово лично име најсрдечно ѝ го честита Денот на независноста на Република Северна Македонија со желби за благосостојба и просперитет.
„Уверен сум дека нашите пријателски односи, кои својата сила ја добиваат од нашите историски врски и заеднички вредности и цели, ќе се продлабочат и ќе се развијат на секое поле “, пишува во честитката од турскиот претседател.
Претседателот на Република Чешка, Милош Земан, во писмото упатува срдечни честитки и посакува многу успех и траен просперитет по повод Денот на независноста на нашата држава.
„Задоволство ми е да Ве уверам дека Чешка ќе продолжи да биде еден од најпосветените поддржувачи за пристапување на Северна Македонија во Европската Унија“, пишува во честитката од чешкиот претседател.
Претседателката на Република Словачка, Зузана Чапутова, честитајќи го државниот празник, во писмото изразува задоволство дека односите помеѓу Словачка и Република Северна Македонија се долгорочно добри и пријателски.
„Ве уверувам дека Република Словачка и понатаму ќе продолжи во силната поддршка на амбициите на Вашата земја да стане член на Европската Унија и реформските напори во тој правец“, се вели во честитката од словачката претседателка.
Претседателот на Романија, Клаус Јоханис, во честитката упатува желби за мир, просперитет и напредок.
„Би сакал да ја искористам оваа пригода да ја повторам активната и постојана поддршка што ја дава Романија на европскиот пат на Република Северна Македонија и ефективно отворање што е можно побргу на преговорите за пристапување во Европската Унија“, пишува во честитката од романскиот претседател.
Претседателката на Република Грција, Катерина Сакеларопулу, во писмото упатува искрени честитки и желби за напредок и просперитет на Република Северна Македонија.
„Би сакала да ја потврдам доследната поддршка на Грција на европскиот пат на Северна Македонија во согласност, се разбира, со сите правила и принципи што го регулираат пристапувањето на секоја нова членка во Европската Унија“, се вели во честитката од грчката претседателка.
Претседателот на Република Бугарија, Румен Радевта, во писмото упатува најискрени честитки по повод 30-годишнината од независноста на Република Северна Македонија.
„Патот напред, без секакво сомнение, продолжува да бара категорична волја, отвореност, прагматизам, решителност и храброст, насочени кон развојот на билатералната соработка, како влог во подобра и безбедна заедничка европска иднина на граѓаните на Република Бугарија и Република Северна Македонија“, стои во честитката од бугарскиот претседател.
Претседателот на Република Србија, Александар Вучиќ, во писмото со честитки истакнува дека пријателските билатерални односи во актуелните предизвикувачки времиња покажуваат висок степен на солидарност и веродостојност.
„Уверен сум дека пријателските односи на Република Србија и Република Северна Македонија, втемелени на меѓусебно разбирање, ќе продолжат да се зајакнуваат во периодот што е пред нас“, пишува во честитката од српскиот претседател.
Претседателката на Република Косово, Вјоса Османи, упатувајќи честитки за Денот на независноста, посакува просперитет, здравје и среќа.
„Република Северна Македонија не е само наш сосед, туку и вистински пријател на нашата млада република. Ние сме посветени за натамошно зајакнување на односите меѓу нашите држави“, се вели во честитката од косовската претседателка.
Претседателот на Украина, Володимир Зеленским во телефонски разговор со претседателот Пендаровски упатил најсрдечни честитки по повод Денот на независноста и желби за напредок и просперитет на граѓаните на Северна Македонија.
Претседателот на Швајцарската конфедерација, Ги Пармелан, во честитката упатил желби за мирна и просперитетна иднина на граѓаните на Република Северна Македонија.
„Основани на доверба, долгогодишните и добри односи меѓу нашите две земји може да ни помогнат заедно да се справиме со големите глобални предизвици“, наведува во честитката претседателот на Швајцарската конфедерација.
Претседателот на Ирска, Мајкл Хигинс, упатил искрени честитки по повод нашиот национален ден.
„Нека претстојното време донесе мир, благосостојба и среќа за граѓаните во Република Северна Македонија“, стои во писмото од ирскиот претседател.
Претседателот на Република Естонија, Керсти Калјулаид, во честитката изразува надеж дека соработката меѓу двете земји ќе биде дополнително зајакната во областите од заеднички интерес.
„Ние остануваме цврсти поддржувачи на европските аспирации на Северна Македонија“, пишува во честитката од естонскиот претседател.
Генералниот гувернер на Австралија, Дејвид Хурли, во честитката упатува желби за натамошен просперитет и развој.
„Го изразувам моето уверување дека пријателските односи меѓу нашите две држави ќе продолжат да просперираат во годината што следува“, стои во честитката од генералниот гувернер на Австралија.
Претседателот на Република Ерменија, Армен Саркисијан, во писмото, упатувајќи честитки за Денот на независноста, им посакува добро здравје, успех и благосостојба на граѓаните на Северна Македонија.
„Ерменија придава значење на понатамошното унапредување на односите со Северна Македонија како на билатералните така и на мултилатералните платформи“, наведува во честитката ерменскиот претседател.
По повод 8 Септември, Денот на независноста, честитки до претседателот Пендаровски испратиле и поглаварот на Римокатоличката црква, папата Франциско, кралот на Шведска, Карл XVI Густаф, кралот на Саудиска Арабија, Салман бин Абдулазиз ал-Сауд, султанот на Оман, Хајтам Бин Тарик, претседателот на Египет, Абдел Фатах сл-Сиси, и претседателот на Шри Ланка, Готобаја Раџапакса.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Катерина Мирчовска именувана за нова директорка на болницата во Кочани

Катерина Мирчовска е именувана за нова директорка на болницата во Кочани, објави директорот на ФЗОМ, Сашо Клековски.
„Силно лидерство за болницата во Кочани!
Вчера за директорка на Општата болница Кочани е именувана Катерина Мирчовска, хирург. Веста помина штуро, со појаснување дека тоа е на барање на повредените од трагедијата за Кочани.
Катерина ја запознав низ работата за повредените од трагедијата во Кочани. Импресионира на прв впечаток. Полна со енергија, посветена, професионална, со големо срце, ги знае во детали сите најразлични потреби на повредените. Катерина се откажа од својот трансфер во ГОБ 8 септември Скопје за да се посвети на повредените“, објави Клековски на „Фејсбук“.
Тој додава дека Катерина е најдобар можен избор за водење на болницата во периодот на опоравување на повредените и ветува силно лидерство за болницата во овој критичен период.
Македонија
Меџити во Украина: Силно ја осудуваме руската агресија и бараме итно запирање на војната

Првиот вицепремиер и министер за животна средина и просторно планирање на Република Северна Македонија, Изет Меџити, денес учествуваше на Самитот „Украина – Југоисточна Европа“ што се одржа во Одеса, Украина.
Самитот, кој беше отворен од претседателот на Украина, Володимир Зеленски, претставува продолжение на претходните средби одржани во Атина, Тирана и Дубровник, со учество на високи претставници од земјите на Југоисточна Европа. Главната цел на самитот е поддршка за Украина и зајакнување на регионалната соработка и безбедноста.
Во своето обраќање, вицепремиерот Меџити изрази благодарност за гостопримството на украинските власти и ја реафирмираше непоколебливата поддршка од страна на Северна Македонија за суверенитетот и територијалниот интегритет на Украина.
„Обединети сме пред предизвиците кои го загрозуваат мирот, безбедноста и меѓународниот поредок. Силно ја осудуваме руската агресија и бараме итно запирање на војната“, – истакна тој.
Вицепремиерот Меџити ја нагласи и посветеноста на земјата за продлабочена регионална соработка и изградба на безбедна, мирољубива и демократска Европа.
Македонија
ВМРО-ДПМНЕ до Османи: Прво ставивте нож во македонскиот идентитет, а сега дрско сакате да држите лекции за наводен патриотизам

Бујар Османи, министерот кој го прифати францускиот предлог без да трепне, кој го претвори Министерството за надворешни работи во огранок на бугарското МНР и кој ги жртвуваше македонскиот идентитет, јазик и историја за фотосесија со европски бирократи, сега се јавува со патетични морални лекции, велат од ВМРО-ДПМНЕ.
„Ќе беше смешно, ако не беше трагично.
Османи зборува за „внатрешна кохезија“ откако со години активно работеше на нејзино разнебитување.
Тој кој не кажа ни збор кога Бугарија бараше да не постоиме како народ.
Тој кој ја потпиша капитулацијата наречена преговарачка рамка, со наведната глава и без консултација со народот.
Тој што направи параван од „европски вредности“ за да протне асимилација под европско знаме.
Ако некој ја злоупотреби политиката за криминали цели тоа беше ДУИ и Османи, кои држеа говори во кои повикуваа на „света борба за двојазичност”, но како безобразен параван за корупција, кражби и ограбување на сите граѓани: и Македонци, и Албанци, и Турци, Роми Срби, Власи, Бошњаци и останати.
Османи денес зборува за „популизам“ откако целата негова кариера е изградена на клиентелизам, поделби и трговија со националните интереси. И ни збор за тоа што токму тој беше прв што прифати Бугарите да бидат ставени во Уставот, без никаква гаранција за македонскиот народ.
Да му појасниме: Македонија не е ничиј туѓ дом, ама не е ни дом на политичари што ја распродаваат.
Граѓаните не ја заборавија шверцерската ноќ на 16 јули.
Не ја заборавија тишината со која дозволи да се гази врз сè македонско.
Не заборавија дека твојата „дипломатија“ заврши со тоа Македонија да не започне ниту еден кластер, ама затоа добивме бугарски клубови и закани за порекнување на нашето постоење.
Затоа, Османи, подобро молчи.
Историјата ќе те памети како министерот кој го прифати условот македонскиот народ да стане „производ на Коминтерната“. А народот ќе ти го врати со истиот јазик кој најдобро го разбираш“, пишува во соопштението.