Македонија
Османи во прва официјална посета на Казахстан
Министерот за надворешни работи, Бујар Османи, се сретна со министерот за надворешни работи на Казахстан, Мухтар Тлеуберди, како и со претседателот на земјата, Касим Жомарт Токаев.
Во фокусот на разговорите беа потенцијалите за унапредување на економската соработка меѓу двете земји, со посебен акцент на зголемување на трговската размена и инвестицискиот потенцијал.
![]()
„Билатералните односи меѓу двете земји создаваат далеку поголеми потенцијали за економска соработка, што претставува директен интерес и на двете влади, и на бизнисите, како и на граѓаните на двете земји. Наша обврска е да преземеме активности за да им овозможиме на бизнисите да го препознаат и искористат овој потенцијал искористувајќи ги притоа сите можности на дипломатијата за остварување на овие цели“, истакна Османи при потпишувањето на акцискиот план за соработка меѓу двете министерства за надворешни работи за периодот 2021-2023 година. Покрај акцискиот план, на средбата беше потпишан и протокол за размена на инструментите за ратификација на договорот меѓу Република Северна Македонија и Република Казахстан за трансфер на осудени лица.
Се разговараше и на темата за продлабочена регионална соработка меѓу регионот на Југоисточна Европа и регионот на Централна Азија. Со оглед на географската, инфраструктурната и политичката поставеност, соговорниците изразија подготвеност за унапредување на севкупната соработката меѓу Скопје и Нур Султан како потенцијални хаб-центри за воспоставување подлабока соработката меѓу двата региона, како директен интерес и за двете земји и за двата региона.
На средбите беше поздравена и соработката во областа на мултилатералата, со посебен фокус кон претстојното претседателство на Република Северна Македонија со ОБСЕ во 2023 година. Домаќините ги понудија своите искуства од претседателствувањето со организацијата во 2010 година, а тема на разговор беа и актуелните предизвици и формирањето на приоритетите на претстојното претседателство во 2023 година.
За време на средбите соговорниците разменија мислење и за актуелните меѓународни предизвици, при што посебен акцент беше ставен на последните случувања и состојбите во Авганистан. Соговорниците изразија загриженост за актуелната состојба во земјата, како и подготвеноста на двете земји преку своите активности да продолжат со поддршката на граѓаните на Авганистан и од хуманитарен аспект, како и во создавањето безбедна и стабилна држава.
Посетата на Казахстан претставува прва официјална посета на ниво на министри за надворешни работи од воспоставувањето дипломатски односи меѓу двете земји и таа беше искористена за официјално да биде пуштена во употреба новата амбасада на Република Северна Македонија во Нур Султан. Притоа домаќините изразија посебен интерес за отворање амбасада на Казахстан во Скопје веќе в година како почетна точка за реализација на амбициозните планови за соработка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски за Денот на наставата на турски јазик: Образованието на мајчин јазик е педагошка потреба
Премиерот Христијан Мицкоски денеска упати честитка по повод Денот на наставата на турски јазик, посочувајќи дека овој ден нè потсетува дека образованието на мајчин јазик е педагошка потреба, но и длабока цивилизациска вредност и уставна определба.
-Преку јазикот се пренесуваат знаењето, културната меморија и чувството на припадност, а преку училиштето тие вредности се претвораат во заедничко богатство на државата, наведе Мицкоски.
Премиерот посочува дека наставата на турски јазик е дел од нашето историско и општествено наследство и придонесува кон градење образовен систем заснован на почит, еднаквост и меѓусебно разбирање.
-Како Влада, ја разбираме одговорноста да обезбедиме услови во кои секое дете ќе има пристап до квалитетно образование, без разлика на мајчиниот јазик. Инвестирањето во образованието и во наставата на мајчин јазик е инвестирање во довербата, во заедништвото и во иднината на државата. Честит Ден на наставата на турски јазик, додава премиерот во објава на Фејсбук.
Македонија
МВР апелира до возачите да внимаваат поради маглата
Министерството за внатрешни работи (МВР) денеска упати апел до сите учесници во сообраќајот крајно внимателно да ги управуваат своите возила во услови на намалена видливост, како и воопшто да не седнуваат зад воланот доколку консумирале алкохол на предновогодишни забави и семејни веселби.
Оттаму информираат дека на територијата на Секторот за внатрешни работи (СВР) Скопје во периодот од 15 до 20 декември биле констатирани 53 сообраќајни несреќи и дека сообраќајните контроли на полицијата продолжуваат со несмален интензитет.„Апелираме и до учесниците во патниот сообраќај да бидат внимателни и во целост да ги почитуваат сообраќајните правила и прописи, задолжително да поседуваат зимска опрема и да не седнуваат зад воланот под дејство на алкохол. Апелираме до граѓаните да ги почитуваат законските прописи и да соработуваат со полицијата. Сите нарушувања на јавниот ред и мир да ги пријават во полициска станица или преку телефонските броеви 192 или 112“, велат од МВР.
Од Министерството се осврнуваат и на активностите што се преземаат против употребата на пиротехнички средства. Мерките, велат, се спроведуваат со засилена динамика, имајќи го предвид фактот дека употребата на овие опасни средства е карактеристична за периодот околу Нова година.
Целта, додаваат оттаму, е да се зголеми свеста кај младите, но и кај нивните родители, дека петардите не се играчки, туку опасни средства кои можат да нанесат ненадоместливи и трајни последици по здравјето.
Македонија
Кисела Вода со прочистувачи ќе го чисти воздухот во градинките
Во градинките на територијата на општина Кисела Вода се поставуваат прочистувачи за воздух. Градоначалничката на Општина Кисела Вода, Бети Стаменкоска Трајкоска, ја посети градинката „Синоличка“ при ЈДГ „Весели цветови“, една од градинките каде што веќе се поставени прочистувачи.
Како што соопшти Општина Кисела Вода, при посетата, таа разговарала со вработените за значењето на оваа мерка, која директно придонесува за подобрување на условите за престој, како и за заштита на здравјето и благосостојбата на најмладите.
Покрај во градинките, прочистувачи за воздух се поставени и во спортската сала во ООУ „Невена Георгиева Дуња“, како и во ПОУ „Кузман Јосифовски – Питу“.

-Оваа активност е дел од пошироката стратегија на Општина Кисела Вода за создавање почиста и поздравa животна средина, особено во објектите каде што секојдневно престојуваат деца и млади. Општина Кисела Вода и претходно презеде низа конкретни чекори во оваа насока, посочуваат од Општината.
Оттаму додаваат дека прочистувачи за воздух биле поставени во сите училници во сите основни училишта на територијата на општината, како и во поголемите паркови, со цел да се подобрат условите за престој и секојдневно функционирање на граѓаните.
-Грижата за здравјето на нашите најмлади е еден од нашите највисоки приоритети. Со поставувањето на пречистувачи за воздух во градинките, училиштата и спортските објекти, создаваме поздрави услови за престој и развој на децата. Ова е дел од стрстегијата на Општина Кисела Вода за почиста животна средина и за подобар квалитет на живот за сите наши сограѓани, заложба од која нема да отстапиме, изјави градоначалничката Стаменкоска Трајкоска.

