Македонија
Намален бројот на новодијагностицирани пациенти со лимфом во Македонија

Секоја година на 15 септември на глобално ниво се одбележува Светскиот ден за подигнување на свеста за лимфомот. Свесноста за лимфомот и препознавањето на симптомите се од суштинско значење за раното откривање.
Кон одбележувањето на овој ден во ек на ковид-пандемијата се приклучува и ЈЗУ Универзитетска клиника за хематологија – Скопје со апел до населението за сериозноста на лимфомот како заболување и потребата за неговото навремено препознавање и лекување.
„Многу е важно да им помогнеме на граѓаните да ги препознаваат симптомите на лимфомот и да побараат навреме помош од лекар. Зголемен, безболен, поткожен лимфен јазол е симптом што не треба да се занемарува ниту од пациентите ниту од здравствените работници. Дополнително, намалена енергија, треска, температура, чешање по телото, намалување на телесната тежина, се исто така симптоми што не треба да се игнорираат. На овој ден испраќаме апел до граѓаните навремено да се јавуваат кај своите матични лекари кога ќе забележат некоја од овие состојби. Да не дозволат состојбата поради Ковид-19 да ги одврати од посетата кај матичниот лекар затоа што физичкиот преглед на лимфниот јазол е клучен чекор во откривањето на ова заболување. Исто така, апелираме до матичните лекари редовно да ги прегледуваат своите пациенти со палпација на лимфните јазли затоа што раното дијагностицирање и соодветниот третман на ова хематолошко малигно заболување има клучно значење за излекување и успешен клинички исход од третманот. Доколку рано се дијагностицира и навремено се третира, пациентите добиваат шанса за долг, квалитетен и среќен живот“, изјави проф. д-р Ирина Пановска-Ставридис, директор на ЈЗУ Клиника за хематологија – Скопје.
Во нашата земја во 2019 година беа дијагностицирани 150 пациенти со лимфом, во 2020 година до август биле откриени 74 пациенти со ова заболување, а во оваа 2021 година само кај 52 пациенти е дијагностициран лимфом. Овие бројки бележат пад на новодијагностицирани пациенти со не-Хочкинов лимфом од 38 % во споредба со истиот период од 2020 година. Од почетокот на пандемијата па до денес забележуваме континуирано опаѓање на бројот на новодијагностицирани пациенти. Но, за жал, овој опаѓачки тренд не значи дека нема новозаболени пациенти, туку дека луѓето со симптоми поради пандемијата и стравот од зараза, не посетуваат навремено доктор, а со тоа ја пролонгираат раната детекција, која е од огромна важност кај малигните заболувања.
Најдобриот начин да се детектира во рана фаза болеста, кога шансите за излекување се најголеми, е преку заедничката соработка на пациентите и докторите. За таа цел, Клиниката за хематологија во Скопје отвори и електронската амбуланта, со која се поедноставува комуникацијата помеѓу матичните лекари и хематолозите.
Меѓу другото, и со цел да се заштити оваа група пациенти, која е под зголемен ризик од инфекција, развој на тешка болест и смртен исход, Универзитетската клиника за хематологија – Скопје препорачува кај овие лица да се спроведе и вакцинација против Ковид-19.
Приближно 1 од 50 лица има ризик да заболи од оваа болест во текот на својот животен век. Затоа, потребно е да се подигне свесноста за лимфомот како најчестата форма на хематолошка малигна болест.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.