Македонија
(Видео) Заев: Штип добива најмодерна пречистителна станица во регионот
Почна тестирањето на пречистителната станица во Штип како дел од повеќенаменскиот капитален проект – хидросистемот „Злетовица“.
Премиерот Заев истакна дека откако ќе заврши фазата на тестирање на сите аспекти на работата на пречистителната станица со ултрафилтрација во општина Штип, жителите на Штип ќе добиваат најквалитетна вода за пиење, произведена по светски стандарди.
„Супер модерната пречистителна станица за вода за пиење во општина Штип со најсовремена технологија – ултрафилтрација, ќе работи со капацитет од 300 литри во секунда, со што општина Штип ќе има најголемата станица од ваков тип во државата и соседните земји. За пречистителната станица во Штип беа издвоени околу 6 милиони евра, средства од граѓаните на нашата земја издвоени од буџетот на Владата на Република Северна Македонија. Оваа Влада, како и составот на Владата од претходниот мандат од 2017, континуирано работи на комплетирање на огромниот капитален проект ‘Хидросистемот ‘Злетовица’ како една од иницијативите за подобрување на условите за живеење на граѓаните во целата земја и за рамномерен регионален развој“, нагласи претседателот на Владата, Зоран Заев.
Тој додаде дека во таа насока во Североисточниот Регион се спроведуваат повеќе капитални проекти од базично значење, кои се силен потенцијал за развој на сите општини во овој дел од нашата земја.
„Привршуваат работите од првата фаза на ХС ‘Злетовица’ за водоснабдување и паралелно се работи на изведбата на системите за наводнување за речиси 4.000 хектари земјоделска обработлива површина во регионот како цел на втората фаза. Во последната, третата фаза, проектот ‘Хидросистем Злетовица’ ќе се комплетира со објекти за производство на електрична енергија со предвиден капацитет од 50 гигават-часа електрична енергија“, рече премиерот Заев.
Вицепремиерот Битиќи посочи дека рамномерното развивање на сите региони во земјата е високо на агендата на Владата, а проектот за нова пречистителна станица за пивка вода во Штип тоа го докажува.
„Граѓаните од овој регион беа сведоци дека иако веќе во 2012 година имавме на располагање ваков значаен објект, претходните влади и локални самоуправи не ги презедоа вистинските чекори за да се искористат функциите на ХС ‘Злетовица’ и да се обезбедат квалитетни услуги за граѓаните. Ние тоа, дефинитивно, го сменивме и правиме чекори кон максимизирање на потенцијалите на ХС ‘Злетовица’. Сакаме овој капитален проект да го ставиме во функција на граѓаните, за поквалитетен живот, но и самоодржливост на хидросистемот, кој треба да им служи на генерации граѓани“, нагласи вицепремиерот Битиќи во своето обраќање.
Градоначалникот на Штип, д-р Сашко Николов, потенцира дека Штип и штипјани, конечно, добиваат пристап до чиста и здрава вода за пиење.
„Капацитетот на новата станица за ултрафилтрација е доволен да ги задоволи сегашните потреби на Штип и штипјани за вода и во најкритичните периоди. Објектот и опремата за новата станица за ултрафилтрација се набавени со одобрени 3,6 милиони евра неповратна финансиска помош, средства добиени од Владата на Република Северна Македонија преку ресорното Министерство за земјоделство, шумарство и водостопанство и Управата за водостопанство“, истакна градоначалникот Николов и додаде дека со пуштањето во редовна употреба на станицата за ултрафилтрација општина Штип ќе ја има најголемата станица од ваков тип во државата и соседните земји.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Утре променливо облачно време со температура до 11 степени
Времето утре ќе биде променливо облачно со сончеви периоди. Претпладне ќе дува умерен до засилен ветер од северен правец (локално над 60 km/h), особено во источните делови и во Пелагонија, информира УХМР.
Минималната температура ќе биде во интервал од -3 до 5, а максималната ќе достигне од 3 до 11 степени.
Во Скопје, променливо облачно со сончеви периоди. Ќе дува умерен до засилен ветер од северен правец. Минималната температура ќе се спушти до 1, а максималната ќе достигне до 9 степени.
Во четврток утрото ќе биде ведро и студено, насекаде со негативни минимални температури. Во текот на ноќта кон петок и во петок ќе има нови врнежи, во пониските места од дожд, на повисоките од дожд и снег, а на планините од снег.
Потоа во деновите од викендот времето ќе биде променливо облачно и постудено со умерен до засилен северен ветер. Од понеделник дневната температура ќе биде во пораст.
Македонија
Уапсени осум возачи за возење без возачка, со забрана и под дејство на алкохол
Во текот на вчерашниот ден, полициски службеници на целата територија на државата лишија од слобода осум возачи, од кои седум за возење без возачка дозвола и еден со забрана за управување возило од Б категорија и под дејство на алкохол, соопшти МВР.
Двајца возачи во Скопје и по еден возач во Прилеп, Неготино, Тетово, Кочани и Делчево управувале возило без возачка дозвола. Додека еден возач во Виница управувал возило иако имале мерка забрана за управување моторно возило од Б категорија и под дејство на алкохол.
Лицата се приведени во полициска станица, а по целосно документирање на случаите ќе бидат поднесени соодветни кривични пријави.
„Апелираме до сите учесници во сообраќајот да ги почитуваат сообраќајните правила и прописи, да не управуваат возило без положен возачки испит или доколку имаат изречена мерка за забрана за управување или доколку се под дејство на алкохол и сите заеднички да придонесеме за побезбеден сообраќај“, велат од МВР.
Македонија
Општина Центар објави јавен повик за ангажирање лични асистенти за ученици со посебни образовни потреби
Општина Центар објави јавен повик за ангажирање лични асистенти за ученици со посебни образовни потреби во рамки на проектот „Образование за сите“, за учебната 2025/2026 година.
Право на пријавување имаат лица со најмалку завршено средно образование. Предност имаат кандидати со соодветно високо образование, претходно искуство во работа со деца со попреченост или лиценца за личен асистент, како и долгорочно невработени лица, млади до 29 години, лица над 50 години, самохрани родители и родители на деца со попреченост.
„Ангажманот на личниот асистент подразбира директна поддршка на ученикот во текот на наставниот ден. Поддршката вклучува помош при следење на наставата, движење низ училиштето, комуникација со соучениците и наставниците и други активности во согласност со индивидуалните потреби на ученикот“, вели градоначалникот Горан Герасимовски.
Избраните кандидати ќе бидат ангажирани како лични асистенти во основните училишта на територија на општината, со скратено работно време од 20 часа неделно, во период од четири месеци, почнувајќи од март 2026 година до крајот на актуелната учебна година.
За ангажманот е предвиден паричен надоместок во висина од 15.000 денари (нето) месечно.
Пријавувањето се врши во Архивата, барака 6, секој работен ден од 9 до 15 часот.
Јавниот повик трае пет работни дена од денот на неговото објавување и е достапен на општинската веб-страницата и на огласните табли во основните училишта на територија на општината.

