Македонија
Потпишан договор за соработка за заштита на сведоци помеѓу МВР и Меѓународниот Кривичен Суд

„Потпишувањето на Договорот за соработка во областа на заштита на сведоци помеѓу Министерството за внатрешни работи на Република Северна Македонија и Меѓународниот кривичен суд претставува продолжување на чинот на поддршка на Судот во борбата против најтешките форми на кривични дела. Дотолку повеќе што Република Северна Македонија го има потпишано Римскиот статут во 1998 година и ратификувано во 2002 година, со кој е основан Меѓународниот кривичен суд, чија улога е фокусирана во борбата против најтешките форми на кривичните дела – геноцид, злосторства против човештвото, воени злосторства и агресија“.
Ова, меѓу другото, го истакна министерот за внатрешни работи Оливер Спасовски, при денешното потпишување на Договорот за соработка во областа на заштитата на сведоци меѓу МВР на РСМ и МКС со седиште во Хаг (Холандија), а претставуван од Секретарот на оваа меѓународна правна инстанца г. Питер Луис, во Клубот на пратениците во Скопје.
Заштитата на најранливите категории на лица, односно жртвите и сведоците кои сакаат да помогнат во расветлувањето на кривичните дела и во изнесувањето на нивните сторители пред лицето на правдата е определба на секое демократско општество, истакна министерот Спасовски, додавајќи дека МВР активно се вклучува во таа глобална борба против овие форми на кривични дела, кои преставуваат сериозна закана за човештвото, безбедноста и интегритетот на луѓето и заедниците.
Всушност со овој договор се воспоставува правна рамка за соработка меѓу надлежните органи при МВР и Секретаријатот на МКС на оперативно ниво, а околу конкретизирање на мерките за заштита и безбедносните активности, преку релокација на жртви, сведоци и други лица кои се изложени на ризик поради дадено сведочење во склоп на постапките во Судот.
„Министерството за внатрешни работи на Република Северна Македонија ја има воспоставено и ја практикува меѓународната соработка во областа на заштита на сведоци врз основ на договори за полициска соработка, договори за соработка во областа на заштита на сведоци или врз основ на реципроцитет. Досегашното полициско искуство со земјите кои имаат релоцирано лица на наша територија е исклучително позитивно, со доследно и максимално почитување на довербата, професионалноста и утврдените одредби од склучените договори. Убеден сум дека, со потпишувањето на овој договор, Одделението за жртви и сведоци при Меѓународниот кривичен суд ќе ја прошири својата соработка со нашата Единица за заштита на сведоци, ќе ги препознае и применува овие принципи на соработка во оваа исклучително специфична и чувствителна област на полициско работење“, потенцираше министерот Спасовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЕВН Македонија и СОС Детско село ја прошируваат соработката за поддршка на младите

ЕВН Македонија и СОС Детско село потпишаа меморандум за соработка за поддршка на деца и млади во социјален ризик. ЕВН ќе обезбеди стипендии за овие млади со цел продолжување на средното или високото образование како и финансиска поддршка на програмите на СОС Детско село за зајакнување на капацитетите и одржливоста. Покрај тоа, стипендистите ќе имаат можност да реализираат практикантска работа и менторска програма во просториите на ЕВН, со што ќе им се помогне да ја градат својата професионална иднина.
„Ова партнерство е одраз на нашата посветеност кон општеството. Инвестирањето во образованието и развојот на младите е најдобрата инвестиција за иднината.“ нагласи Претседателот на Управниот одбор на ЕВН Македонија, г-дин Волфганг Маиер.
„Партнерството со ЕВН Македонија се совпаѓа со нашата стратегија за воведување национална програма за млади од ранливи категории. Oва е само почеток на една успешна соработка која ќе придонесе кон посигурна иднина за младите поддржани од СОС Детско село.“ кажа директорката на СОС Детско село, Јулијана Накова Гапо.
„Ја искажуваме нашата искрена благодарност кон ЕВН што ја овозможи оваа соработка и се надеваме дека многу други австриски компании во иднина ќе го следат примерот за поддршка на СОС Детско село и неговата мисија во Северна Македонија.“ рече австрискиот заменик амбасадор, г-дин Матијас Хуменбергер.
Преку меморандумот се официјализира поддршката за програмите на СОС Детско село, каде што се опфатени образовните интереси, како и здобивањето на потребни искуства и вештини насочени кон професионален и личен развој на младите.
Македонија
Уставен оформи предмет за вториот протокол меѓу Македонија и Бугарија

Уставниот суд оформи предмет по иницијатива на Лилјана Поповска, со која се оспорува Протоколот од вториот состанок на Заедничката меѓувладина комисија со Бугарија, потпишан на 17 јули 2022 година во Софија.
Судот соопшти дека е во тек претходна постапка за прибирање на податоците и известувањата потребни за донесување одлука.
Во иницијативата се наведува дека Протоколот е во спротивност со член 8 став 1 алинеја 1, 2 и 11 од Уставот, како и со повеќе одредби од Законот за склучување, ратификација и извршување на меѓународни договори, бидејќи не бил ратификуван во Собранието, ниту објавен во уставниот рок во „Службен весник“. Се додава и дека документот има несоодветна форма и содржина, излегува надвор од рамките на правен акт и произведува штетни дејствија врз идентитетските прашања за македонскиот народ, јазик и држава.
Подносителката бара поништување на Протоколот, повикувајќи се и на Виенската конвенција за договорното право, со образложение дека е спротивен на императивните норми на меѓународното право. Таа истакнува дека во Македонија процедурата била нетранспарентна, за разлика од Бугарија, каде парламентот расправал за текстот пред неговото потпишување.
Протоколот беше потпишан од страна на тогашниот министер за надворешни работи Бујар Османи и неговата колешка Теодора Генчовска во Софија. Османи го презентираше објаснувајќи дека е реципрочен. Генчовска изјави дека Бугарија и натаму не го признава македонскиот јазик.
Македонија
Стејт департментот: Нема значителни промени во состојбата со човековите права во Северна Македонија

Во најновиот извештај на Стејт департментот на САД за човековите права за 2024 година се наведува дека во Северна Македонија не се забележани значителни промени во состојбата со човековите права.
Документот идентификува повеќе клучни прашања, меѓу кои ограничувања на слободата на изразување и медиумите, насилство и закани врз новинари, зголемено вознемирување новинарки, стратешки судски тужби против медиумски работници и предизвици за уредничката независност поради политички и бизнис-притисоци.
Во извештајот се посочува дека измените на Законот за аудио-визуелните медиумски услуги, кои овозможуваат рекламирање кампањи со висок јавен интерес, платени од Владата преку комерцијални радиодифузери, предизвикале загриженост за можен клиентелизам.
Се наведува и дека Владата презела веродостојни чекори за заштита на правата на работниците, синдикално организирање и соработка со УНХЦР за бегалци и лица без државјанство.
Целот извештај на ЛИНКОТ.