Македонија
Разбиена група која крадела и во странство продавала македонско културно наследство

Основното јавно обвинителство за гонење организиран криминал и корупција, по неколкумесечна предистражна постапка, донесе наредба за истрага против осум лица, кои се занимавале со нелегална трговија со македонско културно наследство.
Како што информираат од Обвинителството, двајца од нив, кои во случајот ќе се водат како првообвинети, во периодот од мај минатата година до денес, со цел да стекнат противправна имотна корист, создале група, на која ѝ се придружиле и другите шестмина.
Осомничените одделно и заедно присвојувале и продавале предмети заштитени како културно наследство и природни реткости.
Употребувајќи сонди и детектори за метал, без дозвола од надлежен орган, испитувале локалитети на целата територија на државата.
Како ориентација користеле сателитски снимки, карти и рачно напишани текстови и преданија, а потоа со употреба на хилти, копачи и други градежни алати и градежна механизација правеле археолошки ископувања и минеролошко петрографски истражувања.
Откриените артефакти, иако знаеле дека потекнуваат од извршено кривично дело, ги присвојувале и ги прикривале на непознати безбедни локации или во своите домови.
Потоа стапувале во контакт со непознати лица припадници на групата, кои биле по потекло од Грција, Турција, Албанија, Хрватска, Србија и од САД и како на заинтересирани купувачи им ги продавале добрата по однапред договорена сума.
Купувачите артефактите ги изнесувале надвор од границите на Македонија, со што трајно го оштетиле археолошкото, историското, музејското и уметничкото истражување на државните научни институции и ѝ нанеле непроценлива штета на државата.
Осумтемина се осомничени дека со преземените дејства, освен злосторничко здружување, сториле и уште три други кривични дела: присвојување добра под привремена заштита или културно наследство или природни реткости, изнесување во странство добра под привремена заштита и прикривање.
Карактеристично за овие групи, освен што недозволено користат детектори за метал, сонди и други алати за скенирање на длабочина, со себе недозволено држат и оружје, па, така, некои од обвинетите сториле и кривично дело неовластено изработување, држење, посредување и тргување со оружје.
Групата оперирала на регистрирани и нерегистрирани археолошки локалитети, и тоа: Вртекица, Сливица, Герман, Белица, Горна Јаболчица – Кичевско, Долно Јаболчиште – Велешко, Мочурлива Вода, Чатал Камен, Туњ, Чиндиро Кале, Медов Дол, Градиште – Црно Езеро, Ломница, Ченгово Кале, Бајрамова Круша, Ивањевци, Болдовенци, Журче – Крушевско, Ловор, Лопатица и на други локации.
Во денешната акција спроведена од страна на МВР, под раководство на предметниот обвинител, при претрес на домовите на осомничените пронајдени се артефакти и предмети од културно наследство со непроценлива вредност, сопственост на државата, како и природни реткости и други скапоцени предмети прибавени со кривично дело и тие ќе бидат предадени на идентификација.
Воедно, приведени се сите осомничени и во текот на денешниот ден ќе бидат изведени пред судија на претходна постапка при Основниот кривичен суд Скопје.
Надлежниот обвинител, ценејќи дека се исполнети законските услови, до судија на претходна постапка ќе достави предлог за определување притвор за шестемина осомничени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Четворица пациенти со тешки телесни повреди се примени на хируршките клиники во Скопје

Четворица пациенти со тешки телесни повреди беа примени денеска на хируршките клиники во Скопје по вооружена пресметка на улиците во Тетово.
Како што соопшти Министерството за здравство на КАРИЛ е примен 32-годишен пациент со прострелна рана во предел на граден кош, тешка телесна повреда. На Детска хирургија е примено 12-годишно дете со прострелна рана во предел на десна натколеница. На Торакална хирургија е примен 37-годишен пациент со прострелна рана во предел на граден кош. На Трауматологија е примен 60 годишен пациент со скршеница на десна потколеница.
Сите пациенти, нагласува МЗ, се згрижени и им се укажува соодветна медицинска помош.
Едно лице е почина, а повеќе беа ранети во вооружена престрелка која се случила денеска напладне во Тетово. Од МВР соопштија дека во 12:30 часот на крстосница од улица ,,Илинденска” со улица ,,Благоја Тоска” во Тетово се случила вооружена пресметка помеѓу лица од две возила, при што се случила и сообраќајна незгода по што двете возила го напуштиле местото, од кои едното се упатило кон улица „113“, а додека другото во непознат правец.
-Од добиени сознанија од граѓани и очевидци на местото на настанот, добиена е информација дека возилото кое што се упатило кон ул.” 113″ дека се работи за патничко возило ,,форд фиеста” со тетовски регистарски таблички. Од извршената проверка било констатирано дека се работи за одјавени регистарски таблички од истото возило, сопственост на лицето Е.М.(19) од с.Гајре, тетовско. При преземање мерки, на крстосницата од улица ,,Благоја Тоска” со улица „107″ било пронајдено патничко возило ,,фолксваген голф” со тетовски регистарски таблички, сопственост на Ф.Р.(46) од Тетово, додека во возилото пронајдено е едно починато лице со прострелни рани од огнено оружје. За настанот е формиран тим со кој раководи дежурен јавен обвинител при ОЈО-Тетово и увидна екипа од СВР Тетово, се наведува во полициското соопштение.
Според МВР, во Клиничка Болница -Тетово биле пренесени три лица со повреди од кои едно малолетно девојче од Тетово со повреди од огнено оружје која е задржана на опсервација, а другите две лица О.О.(34) и Р.Т. со прострелни рани, како итни случи се пренесени во Комплексот клиники “Мајка Тереза” во Скопје. Во престрелката од возилата повреден е и еден пешак А.С.(60) од Тетово, кој бил случаен минувач и бил пренесен во клиниките во Скопје.
Во моментот полицијата врши увид и се преземаат мерки за расветлување на мотивите и околностите околу вооружената пресметка која предизвика сериозни последици по животите и здравјето на лица во Тетово.
Македонија
Попладнево избувна голем пожар кај ресенското село Долно Дупени

Попладнево избувна голем пожар кај ресенското село Долно Дупени, во непосредна близина на Преспанското Езеро. Благодарение на брзата реакција на екипите на Територијалната противпожарна единица Ресен, викендиците и куќите од селото се спасени од огнената стихија. Моментално, огнот се движи кон непристапен терен, каде што гаснењето е отежнато.
Два ер трактори на Дирекцијата за заштита и спасување веќе се вклучени во акцијата, а поради високите температури, полициски хеликоптер ќе се приклучи во 16:30 часот. На терен се и жители од селото, кои помагаат на пожарникарите во локализацијата на пожарот.
Ситуацијата е под контрола во делот каде што има објекти. Нема опасност по куќите и викендиците, но борбата продолжува на непристапниот планински терен. Авијацијата ни помага значително, а апелирам до сите граѓани да бидат внимателни и да не предизвикуваат нови пожари – изјави директорот на ДЗС, Стојанче Ангелов.
Македонија
ДСЗИ ќе врши вонреден надзор откако пациентка на 30 години почина во болница

Министерството за здравство инфомира дека иницира инспекциски надзор до Државниот санитарен и здравствен инспекторат во врска со случајот со починатата пациентка во Инфективното одделение во Општата болница во Тетово.
„Јавноста ќе биде навремено известена по завршувањето на постапката за утврдување на фактичката состојба. Министерството за здравство останува посветено на транспарентноста, одговорноста и обезбедување на квалитетна здравствена заштита за сите граѓани“, се вели во соопштението од МЗ.
МВР претходно информираше дека денеска во 03:20 часот во СВР Тетово, Ј.С. од село Копанце, тетовско, пријавил дека на Инфективно одделение во Клиничка болница Тетово била хоспитализирана С.С. (30) од с.Копанце, член од неговото семејство и набргу починала.
„Според пријавеното, таа била примена на болничко лекување, претходниот ден во 19.00 часот и наводно, според негово кажување, не ѝ била укажана соодветна лекарска помош, по што починала. Полициски службеници од СВР Тетово излегле на местото и по однос на пријавата бил формиран тим за испитување на настанот, кој ќе го води дежурен јавен обвинител во содејство со екипа од СВР Тетово“, се вели во соопштението од МВР.