Свет
Австралија ги олабавува мерките, а блокадите во Оукланд остануваат уште две недели

Илјадници деца во Сиднеј денеска се вратија на училиште по неколкумесечно учење од далечина, бидејќи најголемиот град во Австралија, поттикнат од зголемените стапки на вакцинација, продолжува да ги олеснува ограничувањата за Ковид-19.
Маските повеќе нема да бидат задолжителни во канцелариите, а повеќе луѓе ќе можат да се собираат дома и на отворено, откако сојузната држава Нов Јужен Велс, каде [to се наоѓа Сиднеј, достигна стапка на вакцинација од 80 проценти за лица над 16 години.
„ Ова не е готово, има уште долг пат, рече денеска премиерот на Нов Јужен Велс, Доминик Перо, повикувајќи ги луѓето строго да ги почитуваат преостанатите здравствени прописи.
Нов Јужен Велс денеска пријави 265 нови случаи на коронавирус, што е најнизок дневен скок во последните 10 недели и значително под максималниот број од 1.599 регистрирани во почетокот на септември. Соседна Викторија пријави 1.903 нови случаи, што е зголемување од 1.838 претходниот ден. Главниот град на таа земја, Мелбурн, е на пат да започне да излегува од блокадата во која беше речиси девет месеци, бидејќи вакцинацијата се приближува до стапката од 70 проценти.
Некои австралиски држави, кои немаат пријавени случаи на вирус, соопштија дека ќе ги држат затворени внатрешните граници од страв дека повторното отворање може да го совлада нивниот здравствен систем. Спротивно на тоа, федералната влада соопшти дека од утре ќе издаде пасоши за вакцинација за меѓународни патувања, клучен чекор во плановите да им се овозможи на австралиските граѓани да патуваат во странство од следниот месец.
Со приближно 145.000 случаи на коронавирус и 1.543 смртни случаи, изложеноста на Австралија на пандемијата на коронавирус беше релативно ниска.
„Блокадата ќе остане во сила уште две недели во најголемиот град на Нов Зеланд, Окленд, поради борбата против епидемијата на делта-сојот#, изјави премиерката на Нов Зеланд, Џасинда Ардерн.
Нов Зеланд се бори со епидемија на делта-сојот што се прошири надвор од Окленд и соседните региони, и покрај острите мерки и затворање на границите. Ардерн посочи дека нема да има промена во социјалните ограничувања што беа во сила во Окленд во изминатите 62 дена.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Нетанјаху: Наредив веднаш да почнат преговори за ослободување на заложниците

Премиерот на Израел, Бенјамин Нетанјаху, изјави дека дал инструкции веднаш да започнат преговори со цел ослободување на сите заложници во Газа, додека истовремено се работи на одобрување на владин план за преземање контрола над градот Газа.
Во кратка видео-порака снимена во делот на Газа под контрола на јужната команда на израелската војска, Нетанјаху не наведе кому му дал наредба и избегна да коментира дали Израел ќе го прифати предлогот за ослободување на заложниците во фази, кој Хамас го прифати во понеделникот, пренесува „Тајмс оф Израел“.
„Се наоѓаме во фаза на одлучувачка победа. Денес дојдов во Газа за да ги одобрам плановите кои ми ги претставија израелските одбранбени сили (ИДФ) за преземање контрола над градот Газа и пораз на Хамас“, порача Нетанјаху.
Премиерот додаде дека дал инструкции за моментално започнување на преговорите за ослободување на сите заложници и завршување на војната под услови прифатливи за Израел.
„Двете работи, пораз на Хамас и ослободување на сите заложници, одат заедно“, истакна Нетанјаху, додавајќи дека високо ја цени мобилизацијата на резервистите и редовната војска за оваа мисија од витално значење.
Семејствата на заложниците ги одбија овие тврдења, укажувајќи дека Хамас не ослободи ниту еден заложник откако Израел во март се откажа од претходниот предлог за спогодба за заложници. Тие исто така сметаат дека понатамошното ширење на воените операции во градот Газа, каде се верува дека се задржани дел од заложниците, ќе ги изложи нивните најблиски на ризик, пренесува „Тајмс оф Израел“.
Свет
Британски гејмер бил сведок на убиство на пријателка од Финска додека играл онлајн игра

Британски гејмер бил сведок на страшно злосторство кога неговата онлајн пријателка (32) била смртно избодена во својот дом во Финска, а тој оддалечен повеќе од 1500 километри слушал без можност да спречи. Нападот се случил додека двајцата играле видео игра, јавува „Сан“.
Според полицискиот извештај, непознатиот Британец играл онлајн со пријателката околу 22 часот кога изненадно слушнал звук од скршен прозорец. Во паника ја прашал дали ги заклучила вратите, но веднаш потоа слушнал како убиецот на фински разговара со жртвата.
Британецот, немоќен да помогне, на 23 април во 5 часот наутро локално време, испратил е-пошта до финската полиција. Полицијата следниот ден го пронашла безживотното тело на жената во дневната соба и веднаш започнала истрага.
Истражувањето покажало бизарен ред на настани. По бруталното убиство, убиецот се упатил педесетина километри северно до градот Јува и запалил штала. Сосед го забележал пожарот и излегол надвор, а десетина минути подоцна бил сведок на страшна глетка– маж со рацете раширени излегол од изгорениот објект. Итната помош брзо стигнала и го пренела во болница, но мажот починал од тешките изгореници.
Криминалистичката инспекторка Марфа Раипела изјавила дека извршителот не бил познат на полицијата и дека случајот не се третира како терористички чин. Утврдено е дека ден претходно се преселил од својот дом во Иматра до Пумалу, каде што немал договорена средба со никого. Мотивот за ова дело останува непознат.
Полицијата верува дека жртвата била случајно избрана, поради тоа што нејзината куќа била лесно достапна и единствена со вклучено светло во тој момент. Со оглед на тоа што единствениот осомничен починал, случајот е официјално затворен.
Свет
Лавров: Распоредувањето европски војници во Украина е неприфатливо

Рускиот претседател Владимир Путин е подготвен да се сретне со украинскиот претседател Володимир Зеленски, но прво мора да се решат некои прашања, вклучувајќи го и тоа дали украинскиот лидер има легитимитет за потпишување договор, изјави денес рускиот шеф на дипломатијата Сергеј Лавров.
Путин и американскиот претседател Доналд Трамп се сретнаа минатата петок на Аљаска на првиот руско-американски самит во повеќе од четири години, и двајцата лидери разговараа за тоа како да се заврши војната во Украина.
На прашањето на новинарите дали Путин е подготвен да се сретне со Зеленски, Лавров рече дека рускиот претседател повеќепати изјавил дека е подготвен да се сретнат.
„Нашиот претседател повеќепати изјави дека е подготвен да се сретне, вклучително и со Зеленски. Но, сите прашања кои бараат разгледување на највисоко ниво мора да бидат добро разработени, а стручњаците и министрите ќе подготват соодветни препораки.“
Лавров рече дека пред потпишување на идните договори треба да се „реши прашањето за легитимитетот на лицето кое ги потпишува тие договори од украинската страна“.
Путин повеќепати го изразил сомнежот во легитимитетот на Зеленски затоа што неговиот мандат требаше да заврши во мај 2024 година, но поради војната не беа одржани нови претседателски избори. Киев тврди дека Зеленски и понатаму е легитимен претседател.
Руски официјални лица велат дека се загрижени дека евентуален иден претседател, ако Зеленски потпише договор, би можел да го оспори тој документ со образложение дека мандатот на Зеленски технички е завршен.
Лавров исто така ги обвини европските лидери дека се обидуваат да го поткопаат напредокот постигнат на минатонеделниот самит САД-Русија на Аљаска за можен мировен договор во Украина.
Европските сојузници на Киев, според Русија, се обидуваат да го свртат вниманието од решавањето „на основните причини“ за војната, рече тој.
Тој повтори дека Русија е загрижена за начинот на кој се води европската дискусија за безбедносните гаранции за Украина без учество на Москва.
Лавров рече дека распоредувањето европски воен контингент во Украина би било неприфатливо за Москва.
„Странска интервенција на дел од украинската територија (…) би била целосно неприфатлива за Русија“, рече Лавров по разговорот со индискиот колега во Москва.
Лавров ја обвини Украина дека не сака праведно и трајно решение на конфликтот.