Денеска во Буенос Аирес се одржа првата седница од судењето на лекарскиот тим за смртта на легендарниот Диего Марадона. На почетокот обвинителот Патрисио Ферари ги шокира присутните. Обвинителот покажа фотографија од Марадона во моментот на неговата смрт, која предизвика силни емоции кај семејството и кај присутните.

„Вака умре Марадона“, рече Ферари додека ја држеше фотографијата, нагласувајќи дека тешката здравствена состојба на Марадона е очигледна и дека никој од обвинетите не може да тврди дека не знаел за состојбата на Марадона.

Неговите ќерки Далма и Џанина се расплакаа, а подоцна ги утеши нивната сестра Јана. Драматичната сцена беше емитувана во живо на Јутјуб каналот на Врховениот суд на провинцијата Буенос Аирес и брзо се рашири низ социјалните мрежи.

"Así murió Diego Maradona"
durante el juicio la querella mostró una foto del 10, que recorre el mundo, estaba hinchado pic.twitter.com/TBIL9y1hBH

— 𝗔𝗡𝗚𝗘𝗟 fan (@AngeldeBrit_ok) March 11, 2025

Осум лица се на обвинителна клупа, вклучувајќи лекари и медицински сестри кои се грижеа за Марадона во неговите последни денови. Меѓу нив е и неврохирургот Леополдо Луке, кој му бил доктор на Марадона.

Пристигнувањето на медицинскиот персонал во судската зграда во Сан Исидро, предградие на Буенос Аирес, наиде на негодување од луѓето кои се собраа пред зградата и извикуваа „убијци“.

Тензиите беа уште поголеми поради реакцијата на поранешната сопруга на Марадона, Вероника Оједа, која се судри со еден од обвинетите, психијатарот Агустин Косачов. Неколку часа пред судењето, ќерката Далма во телевизиско интервју изјавила дека бара правда и ја повторила теоријата за заговор на моќници кои сакале Марадона да умре.

„Сакаме овие луѓе да кажат кој ги вработил, кој ги плаќал, кој управувал со куќата“, рече Далма.

Обвинителот Ферари во воведниот збор истакна дека по една година истрага е изготвено цврсто обвинение без противречности, врз основа на докази. Според Ферари, постојат силни докази дека обвинетите се одговорни за смртта на Марадона за време на неговото домашно лекување од 11 до 25 ноември 2020 година, во она што се нарекува „куќа на ужасите“.

Обвинителот заклучи дека „семејството и аргентинскиот народ заслужуваат правда“.

Марадона почина на 25 ноември 2020 година, на 60-годишна возраст, поради кардиореспираторна криза во неговата резиденција во Тигре, ексклузивно предградие северно од Буенос Аирес, каде што се опоравуваше од операцијата за отстранување на хематом на главата.

Аргентинскиот фудбалер Франко Васкез (36) од италијанскиот второлигаш Кремонезе е суспендиран на следните 10 натпревари поради расизам, соопшти Дисциплинската комисија во Серија Б.

„Одлуката е донесена по читањето на извештајот направен по завршувањето на натпреварот, како и дополнителениот извештај што го побарал Федералното обвинителство, од кое се гледа дека Васкез на крајот од мечот против Бари упатил навреда во која изразува расна дискриминација кон противничкиот играч Емил Мехди Дорвал“, се наведува во образложението на санкцијата.

Натпреварот Бари – Кремонезе (1:1) се одигра на 15 февруари.

Васкез (36) е убедливо најдобриот играч на Кремонезе во актуелниот шампионат, со девет гола на 26 натпревари. Кремонезе е четврти во Серија Б, на девет девет кола до крајот на сезоната има 45 бодови и отворен пат за пласман во плеј-офот за пополнување на Серија А.

Рафаел Леао многу лесно би можел да го напушти Милан на крајот на сезоната. Тоа го поткрепуваат и претходните разговори меѓу неговите менаџери со други клубови.

Милан игра многу слабо оваа сезона. Тие се на деветтото место во Серија А и ништо не функционира како што треба во тимот од северна Италија.

Менаџерите на португалскиот крилен напаѓач веќе разговарале со претставници на други клубови. Овде се споменуваат Челзи и Барселона.

„Сините“ веќе некое време се заинтересирани за Леао, а во зделката може да биде вклучен и Жоао Феликс, кој моментално е на позајмица во Милан. Ова во овој момент не изгледа како паметен избор за Милан, но ако Леао реши да замине, тогаш Милан ќе мора да го пушти.

Од друга страна, и Барса неодамна покажа интерес и се распрашува за цената што Милан ја бара за Португалецот.

Рафа Леао во Милан е од 2019 година, а договорот со Росонерите му истекува на крајот од сезоната 2027/28.