Македонија
АО Траума курс – Основни принципи на оперативното лекување на скршениците
Викендов на 22-23 октомври во хотелот „Александар Палас“ во Скопје, по четврти пат во земјава се одржува меѓународен семинар за хирурзи-трауматолози и ортопеди според програмата за едукација на меѓународната АО фондација.
Курсот се одржува под наслов АО Траума – “Поврeди на скочниот зглоб и стапалото”, а претседавач на курсот е професор д-р Игор Кафтанџиев од Клиниката за трауматологија при Медицинскиот факултет во Скопје.
На курсот ќе се одржат предавања од страна на реномирани хирурзи и предавачи од Австрија, Хрватска, Словенија, Грција и Северна Македонија. Учесници на курсот ќе бидат триесетина млади хирурзи, трауматолози и ортопеди и специјализанти од истите области од земјата кои со предавачите ќе имаат можност да водат дискусии за предавањата, но и за медицинските случаи кои ќе бидат презентирани во тек на семинарот. АО Траума семинарот како што е вообичаено ќе биде следен и од делегација на АО Фондацијата.
АО Фондацијата е непрофитна организација предводена од интернационална група на хирурзи специјалисти од областа на траума и ортопедија. AO фондацијата е формирана 1958 година со седиште во Давос, Швајцарија, а во тек на последните децении ги дефинира стандардите во лекувањето на повредените. Во неа членуваат над 16.000 хирурзи и научници од повеќе од 100 земји во светот. Фондацијата е посветена на едукација, истражувања и развој од областа на трауматологија и ортопедија, но и практичната примена на сите тие искуства, оперативни техники и импланти, сè со цел да се постигне најдобра здравствена грижа за пациентите. Одржувањето на различни курсеви и семинари на кои хирурзите ги учат најсовремените принципи во лекувањето на повредите на мускуло-скелетниот систем е една од основните активности на фондацијата. Особено е важно да се истакне дека системот на едукација е идентичен на ниво на целата АО фондација, што значи насекаде во светот се применуваа ист систем на учење и практична едукација.
Сите досега одржани настани, како настанот кој претстои се подржани од локалниот дистрибутер на светската компанија „Де Пју Синтес“, која е официјален индустриски партнер на АО фондацијата. Со тоа практично се продолжува практиката за постојано вложување во едукацијата на трауматолозите и ортопедите.
Одржувањето на овие меѓународни настани во Северна Македонија е резултат на повеќегодишна и богата соработка на македонските трауматолози со АО фондацијата, преку нивно учество на различни АО курсеви во странство, но и активноста на претседавачот на курсот, Проф. Др. Игор Кафтанџиев како предавач на многубројни вакви курсеви во странство, како и ентузијазмот и посветеноста на Ас. Д-р Марко Спасов во организацијата на овие настани во нашата држава.
Одржувањето едукативни настани според програмата на АО фондацијата во нашата држава веќе станува традиција. Имено, во 2017 година беше одржан првиот ваков семинар и истиот беше посветен на повредите на горниот екстремитет. Истовремено со одржувањето на првиот семинар, беше формиран и македонскиот огранок на АО фондацијата, а за претседател беше избран професор д-р Игор Кафтанџиев. Со формирањето на овој огранок, нашата држава стана дел оваа светска организација, единствена од ваков вид. На овој начин, се отвориа бројни можности за едукација на младите хирурзи од нашата држава и во странство, со учество на семинари и курсеви, како и стипендии за посета на реномирани болници во други држави. На формирањето на огранокот му претходеше повеќегодишна соработка со странски колеги кои се дел од фондацијата и учество на едукативни настани во странски држави.
Во 2018 година следеше семинар посветен на повредите на долниот екстремитет, а во 2019 година за прв пат во нашата држава беше одржан тридневен курс на тема „Основни принципи на оперативното лекување на скршениците“, според чија програма, покрај предавањата и дискусиите на случаи, беа одржани и повеќе сесии на кои учесниците имаа можност на пластични модели на коски, со употреба на вистински инструменти и импланти (сретства за фиксација, остеосинтеза на скршениците) практично да ги применат принципите на остеосинтеза. На овие настани, посетеноста на учесници и предавачи од странство беше на завидно ниво. Во 2017 година учествуваа предавачи од 6 држави, а учесници од 3 држави; во 2018 година имаше предавачи од 3 држави и 46 учесници од 5 држави; во 2019 година предавачите беа од 3 странски држави и имаше 45 учесници од дури 13 различни држави, со што може да се каже дека овие едукативни настани што се одржуваат во нашата земја стануваат препознатливи во Европа.
Во 2020 година беше планирано да се одржи курс за напреднатите принципи на оперативното лекување на скршениците, но поради КОВИД -19 пандемијата истиот не можеше да се одржи.
Оваа година, сепак беше одлучено да се направи напор и да се одржи предвидениот едукативен настан, но бројот на учесници и предавачи мораше да се ограничи во согласност со препораките за спречување на пандемијата со КОВИД-19 и важечките протоколи. Според плановите, во 2022 година треба да се одржи курсот за напредните принципи на оперативно лекување на скршениците, а во 2023 година во нашата држава треба да се одржи мастер семинар и собрание на претставници на АО траума од МИД регионот ( 23 земји од средна Европа, членки на АО Траума Европа).
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Досега подигнати се над 45 илјади ваучери за електронски уреди за студенти
Премиерот Христијан Мицкоски денеска исткна дека се подигнати над 45 илјади ваучери од 15.300 денари за студентите на додипломски студии за набавка на електронски уред – лаптоп, таблет или персонален компјутер. Посочи дека искористеноста е околу 99 проценти.
За ваучер од 250 евра од ноември до декември можеа да аплицираат студенти до 29 години, кои имаат запишано семестар во учебната 2025/2026 на додипломски студии на државните или приватните факултети.
– Отприлика 45.000 – 45.600 ваучери се подигнати, а околу 99 проценти и повеќе се искористени. Околу 44.5 илјади се искористени. Како Влада изминативе 20-ина месеци сме ги регулирале сите односи со сите структури од општеството на кои Владата треба да им излезе во пресрет – на студентите им се покачени стипендиите, се реновираат студентските домови и ученичките домови, се обезбедуваат 15.300 денари за електронски уреди. Дали тоа е доволно? Не. Можеби треба повеќе, но толку можеме во моментов. Порано ни тоа не било. За сите, без да ограничиме дали се студенти на државни или на приватни универзитети. Пораснаа пензиите линеарно, сега во април 7 илјади денари, нешто што досега не било овозможено, рече Мицкоски по пуштањето во употреба на реконструираната гимназија „Кирил Пејчиновиќ“ во Општина Тетово.
Премиерот нагласи дека комуникацијата на Владата со сите целни групи е на високо ниво и досега, рече, немало толку голема испорака од ниту една Влада,
-Буквално со сите целни групи со кои Владата комуницира и со кои држи релација, навистина имаме односи кои никогаш порано не биле на толку високо ниво и немало толку голема испорака со ниту една Влада. Оваа Влада тоа го направи за само 20 месеци. Дали е доволно? Не. Треба повеќе? Треба. Се сложувам, секогаш треба повеќе. Но, дали е подобро од порано? Можам да кажам дека неколку пати е подобро, рече Мицкоски.
Македонија
Во текот на ноќта и утре повремени врнежи од дожд
Под влијание на циклонска активност во текот на ноќта и утре ќе има повремени врнежи од дожд, а на планините од снег.
Како што соопшти УХМР, пообилни врнежи ќе има во југоисточните делови од земјата – над 20 литри на квадратен метар. Поради спуштање на постудена воздушна маса од север, врнежите ќе преминат во снег во повисоките, како и во некои од пониските места.
Во Скопје во текот на ноќта и утре ќе има повремени врнежи од дожд. На околните планини врнежите ќе бидат од дожд и снег.
Македонија
По 8.000 денари за секое бебе во општина Аеродром
Секое семејство со живеалиште во Општина Аеродром кое во текот на 2026 година добило новороденче или посвоило дете до една година, ќе добие еднократна парична помош во износ од 8.000 денари.
-Оваа мерка е наменета како практична поддршка за семејствата, особено во првите месеци од грижата за детето. Општина Аеродром останува посветена на семејствата и на децата, со љубов и внимание кон најмалите, создавајќи средина каде што тие можат да растат среќни, сигурни и поддржани, соопшти Општина Аеродром.

