Европа
Моравјецки: ЕУ ни стои со пушка на главата

Полскиот премиер Матеуш Моравјецки ја обвини Европската Унија дека ѝ поставува барања на Варшава ставајќи ѝ пушка на главата, а во исто време го повика Брисел да ги повлече заканите за правни и финансиски санкции доколку сака да ја реши кризата со владеењето на правото во таа земја.
Говорејќи за „Фајненшл тајмс“, Моравјецки рече дека секој потег за намалување на кохезионите фондови ќе биде пречекан со силна одмазда.
„Сметаме дека ова е веќе дискриминаторски пристап и диктат од Брисел. Но, ако ова стане уште полошо, ќе треба да размислиме за нашата стратегија“, рече Моравјецки.
Тој исто така рече дека минатонеделните разговори со лидерите на ЕУ, вклучително и со германската канцеларка Ангела Меркел, францускиот претседател Емануел Макрон и претседателката на Европската комисија, Урсула фон дер Лаен, во кои тој го претставил главниот аргумент на Варшава дека ЕУ ги надминува своите законски надлежности, биле многу задоволителни.
Во обид да ги намали тензиите во долготрајниот спор, кој предизвика страв од излегување на Полска од ЕУ, Моравјецки вети дека ќе го распушти дисциплинскиот судски совет до крајот на годината за кој Европскиот суд на правдата утврди дека е незаконски, пишува „Фајненшл тајмс“.
Сепак, полскиот премиер предупреди дека доколку Европската комисија почне, како што рече, трета светска војна со скратување на ветените пари за Варшава, тој ќе ги брани правата на Полска со сето оружје што е на располагање.
Комисијата ѝ се закани на Полска со санкции откога највисокиот суд во земјата овој месец пресуди дека клучните елементи од правото на ЕУ се некомпатибилни со државниот устав.
Пресудата доведе до голема ескалација во правната битка во врска со промените во полскиот судски систем, кои, според владејачката Партија на правото и правдата на Моравјецки, се неопходни за зголемување на ефикасноста.
Официјален Брисел тврди дека ваквата пресуда ги загрозува независноста на судството и основните правни принципи на ЕУ, а некои членки на Унијата и делови од Комисијата веќе побараа усвојување нов механизам за условување преку кој би можеле да бидат загрозени десетици милијарди евра од годишните средства на ЕУ неменети за Варшава.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Фото+видео) Опасна бура во Словенија: паѓаше град со големина на јајце, издадено портокалово предупредување

Словенија е погодена од силни бури придружени со силни налети на ветер, поројни дождови и град.
Сообраќајот во земјата е забавен, а Агенцијата за заштита на животната средина издаде портокалово предупредување за целата територија.
Од агенцијата посочуваат дека поради дождот може да дојде до задржување на вода и зголемување на реките.
На објавите на социјалните мрежи се гледа дека паѓал град со големина на јајце.
Според објавите и коментарите, најлошото било околу Шемпетер во долината Савиња.
Како што јавува ТВ Словенија, во текот на вечерта бурата постепено ќе ослабне , најдоцна на истокот од земјата.
Бура пристигнува и во Хрватска
Силна бурна ќелија, која пристигна преку брегот од Италија, се движи кон внатрешноста на Хрватска, придружена со врнежи од дожд, силни налети на ветер и локален град.
Водна пијавица е снимена над морето во близина на Умаг. Се очекува активноста на бурата дополнително да се интензивира во наредните часови.
Управата за заштита на животната средина издаде портокалова тревога за регионите Риека, Карловац и Загреб поради локално можни грмотевици со привремено силни до бурони ветрови, а можна е и појава на град.
Европа
Колона долга околу 700 километри забележана на автопат во Франција

Колона долга речиси 700 километри е забележана денеска на автопат во Франција, додека вкупната должина на сите колони на патиштата во земјата изнесуваше 1.051,6 километри во време на зголемен сообраќаен интензитет поради летните одмори и смената на туристи, што колоквијално се нарекува „Црна сабота“.
Како што извести BFM TV, сообраќајот на патиштата во Франција дополнително бил забавен поради две сообраќајни несреќи на автопатот кон Медитеранот и Атлантскиот Океан.
Според податоците на Bizon Futé, француската агенција за следење на состојбата на патиштата, до 7 часот утрово колоните биле подолги од 200 километри, а до 10 часот веќе надминале 570 километри.
Како што беше соопштено, гужвите се во согласност со прогнозите на агенцијата, која предупреди на „исклучително тешки сообраќајни услови“ за оваа сабота, а врвот на метежот се очекува околу пладне.
Сообраќајот во правец кон Алпите исто така е интензивен и загушен, со задржувања од час и 45 минути во тунелот Мон Блан во правец кон Италија
Европа
Финска, Норвешка и Шведска под жештина невидена од 1961 година

Земјите од Северна Европа, познати по својата студена клима, се соочуваат со интензивни топлотни бранови, со температури над 30 степени Целзиусови во подолг временски период.
Во норвешкиот дел од Арктичкиот круг, метеоролошките станици регистрирале температури над 30 степени Целзиусови дури 13 дена во јули, додека Финска имала три последователни недели со температури од 30 степени, пишува денес британскиот „Гардијан“.
Според научниците, тоа е најдолгиот период според историските податоци од 1961 година, а трае 50 проценти подолго од претходниот рекорд.
„Топлотниот бран е сè уште во полн ек, со максимални температури денес околу 32-33 степени. Дури и арктичките региони забележаа три недели со температури над 25 степени и може да ги соборат своите августовски температурни рекорди утре“, изјави Мика Рантанен, климатолог во Финскиот метеоролошки институт, во објава на социјалните мрежи.
Норвешкиот метеоролошки институт соопшти дека температури над 30 степени се регистрирани 12 дена во јули во најмалку една станица во трите најсеверни покраини на Норвешка.
Во Шведска, метеоролозите, исто така, регистрираа продолжени топлотни бранови во неколку северни градови, при што метеоролошката станица во Хапаранда регистрираше температури од 25 степени или повеќе 14 дена по ред.
Овие топлотни бранови, кои ја погодија северна Европа кон средината на јули, беа предизвикани од топлите води покрај северниот брег на Норвешка, кои ги покачија температурите во нордиските земји за осум до 10 степени над сезонските норми.
Поради интензивен топлотен бран, лизгалиште на мраз во северна Финска ги отвори вратите за луѓе кои бараат засолниште од жештината, откако локалните болници беа преполни, а сточарите предупредија дека нивните ирваси се на работ на смртта од жештината.