„Дрисла“ повеќе не го труе Скопје, инвестиравме во здравјето на граѓаните, изјави градоначалникот на град Скопје, Петре Шилегов.

„Денес, говориме за ‘Дрисла’ – депонијата што девет години беше симбол на криминалот на ВМРО-ДПМНЕ, најопасен загадувач на воздухот во Скопје и опасност за здравјето на граѓаните. Скопската депонија беше извор на загадување, каде што се гореше и складира опасен отпад, а нејзината криминална продажба и управување го доведуваа здравјето на скопјани во ризик. Ова е минато и благодарение на нашите напори ја вратиме ‘Дрисла’ во владение на град Скопје“, рече Шилегов.

Со тоа, додаде тој, почнавме да инвестираме по девет години никакво вложување во депонијата, спречивме горење и складирање опасен отпад, нешто што, како што рече, за ВМРО-ДПМНЕ претходно беше главен бизнис.

Според Шилегов, девет години немало ниту една инвестиција. „Ние за една и пол година успеавме да набавиме нов стерилизатор за третман на медицински отпад од познатата италијанска марка ЦИСА – иновативен систем целосно автоматизиран со висока технологија и квалитет. Со набавката на стерилизаторот се стави крај на неодговорното и несовесно постапување со медицинскиот отпад, односно неговата несоодветна обработка, што потоа завршуваше на „Дрисла“ како обичен отпад, што претставуваше потенцијална опасност за животната средина и за здравјето на луѓето“, рече Шилегов.

„Системот за третман на медицински отпад е опремен со шредер, што го намалува до 80 % неговиот волумен, со сува вакуум-пумпа, што придонесува за заштеда на потрошувачката на вода и до 98 %, како и со систем за заштеда на енергија, кој истовремено обезбедува и еколошка безбедност и не дозволува воздухот што го испушта стерилизаторот да ја загадува околината“, додаде Шилегов.

Тој исто така рече дека градежните машини со кои располага и кои се во сопственост на претпријатието се комплетно сервисирани во сервисот на претпријатието и се повторно вратени во употреба.

„Старите и дотраени теренски возила се заменети со нови 3 теренски возила, неопходни за непречено движење по пристапните патишта до депонијата, кои се тешко проодни со лесни моторни возила. По десет години, комплетно се отворени и дренажните канали околу целата депонија“, рече Шилегов.

За редовно мерење на амбиенталниот воздух, додаде тој, набавена е нова мерна станица за амбиенталниот воздух со автоматско ажурирање на податоците на една минута, воведен е нов софтвер за дигитализација на деловните процеси и на процесите за третман на отпадот на депонијата во согласност со европските стандарди и поставен е нов систем за видеонадзор, со што целата површина на депонијата е комплетно покриена со камери.

„Денес, граѓаните на Скопје може да бидат спокојни дека ‘Дрисла’ повеќе не го труе Скопје. Во ‘Дрисла’ се работи законски, не согорува опасен увезен отпад како во времето на ВМРО-ДПМНЕ и со тоа здравјето на граѓаните повеќе не е во ризик“, нагласи Шилегов.

Тој најави дека „Дрисла“ во следниот период добива голема инвестиција, со што ќе се реши еден од најгорливите проблеми – дивите депонии од градежен шут, кои, за жал, ги создаваат несовесните граѓани.

„Имено, ‘Дрисла’ првпат ќе почне со третирање и преработка на интертен отпад – градежен шут. Така, наместо да се плаќа за депонирање на шутот, кој сега ги мотивира некои да го исфрлаат на диво и да ја загадуваат природата, тоа ќе може да го прават бесплатно во депонијата, која ќе го преработува и од него ќе произведува градежни материјали“, најави Шилегов.

„’Дрисла’ беше симбол на корупцијата и криминалот на претходната власт, извор на загадување и опасност за скопјани. За само четири години, ја претворивме во ефикасно претпријатие, каде што безбедно и одговорно се третира отпадот, без да се загрозува животната средина. Претпријатие што се развива и кое во следниот мандат ќе прерасне во модерен центар за третирање отпад по светски стандарди, со што ќе го решиме проблемот на дивите депонии во градот. На изборите в недела избираме дали сакаме овој развој и заштита на здравјето на граѓаните да продолжи или сакаме да ја вратиме ‘Дрисла’ на управување на истите тие што ја продадоа за криминални цели и свесно ги труеја градот и скопјани“, рече Шилегов.