На денешната прес-конференција СДСМ Скопје укажа дека Данела Арсовска ѝ должи одговор на јавноста – каде е имотот што го стекнала како менаџер во претпријатија за кои тврди дека успешно ги менаџирала и каде е имотот од нејзините семејни фирми од „Расадник“, стекнат по катастрофално менаџирање на скопската сала, која пропаѓа?

„Ова е пропаднатата спортска сала „Расадник“, изградена со наши пари – пари на скопјани собрани преку самопридонес. Данела Арсовска со денови се закануваше со тужби кога некој ќе ѝ поставеше прашање за лошото менаџирање на салата ‘Расадник’. Но, притисната од новинарски прашања, Арсовска вчера најпосле призна дека менаџирала со скопската сала ‘Расадник’. Арсовска призна дека и последниве 20 години била менаџер во многу претпријатија тврдејќи дека секаде до моментот додека била менаџер тие биле успешни претпријатија!“, беше истакнато на прес-конференцијата.

Од таму додаваат дека во периодот на нејзиното менаџирање салата престанала да биде центар на спортот и станала, како што велат, центар за свадби и крштевки.

„Данела Арсовска ја добила спортската сала ‘Расадник’ за „џабарлак“ од ВМРО-ДПМНЕ и ја раскрчмила. Кај не плаќала струја, оставила и долг од 130.000 евра кон јавното претпријатие. Тоа е доказ дека Данела Арсовска не знае да менаџира со јавните објекти на скопјани, дури и кога не плаќа кирија и струја! Ако е точно дека била 20 години успешен менаџер во многу претпријатија, зошто Арсовска нема споменато во својата биографија ниту едно од тие претпријатија што ги менаџирала?“, прашуваат од градската организација на СДСМ.

Додаваат дека Арсовска со денови се обидувала да скрие дека била менаџер на салата „Расадник“.

„Арсовска со денови го криеше и своето моминско презиме Јовановска и не го признаваше фактот дека во 2002 токму како Даниела Јовановска, директорка на фирмата ‘Империјал Данела“, склучила договор за закуп на салата ‘Расадник’ на 25 години за „џабарлак“ – за само илјада евра месечно. Арсовска уште ги крие семејните фирми со седиште во салата ‘Расадник’, кои профитирале, додека салата ‘Расадник’ се упропастувала како спортски објект. Таа сѐ уште крие дека токму како Даниела Арсовска била обвинета за кражба на струја во салата ‘Расадник’, дека нејзините семејни форми имаат долгови кон Јавното претпријатие. Арсовска сѐ уште крие за поврзаноста на семејните фирми од салата ‘Расадник’ со хотелите ‘Империјал’ и ‘Ројал, каде што била менаџер“, беше посочено на прес-конференцијата.

„Арсовска крие и за фирмата ‘Ројал груп’ од ‘Расадник, која донирала за црквата на Груевски, исто како и Даниела Арсовска. Арсовска крие и дека ‘Ројал груп’ претходно се викала ТЕМ МК и дека како менаџер на таа фирма нудела на продажба автобуси. Арсовска крие колку им должи на ВМРО-ДПМНЕ и Груевски, бега од новинарски прашања, бега од дебати, како што бегаа Никола Груевски и Коце Трајановски. Зошто Арсовска продолжува да го крие сето ова ако била успешен менаџер како што тврди? Зошто Арсовска крие дека ја ставила мајка си на државна функција по предлог на Сојузот на стопанските комори, со хонорар од 10.000 денари од состанок?“, потенцираа од СДСМ Скопје.

Според нив, Арсовска крие и манипулира колку би чинеле кинеските автобуси што ги рекламира, не кажува и колку би ги чинел скопјани бесплатен јавен превоз со 250 автобуси. Арсовска, велат од СДСМ Скопје, ја крие и локацијата на мегапарковите што ги ветува, големи колку Градскиот парк.

„Скопје не заслужува градоначалник што толку крие. Скопје не заслужува градоначалник шот крие дека има бугарско државјанство и лична карта и поврзаност со бугарски капитал. Скопје не заслужува градоначалник што не знаел да ја менаџира спортската сала ‘Расадник’, изградена со самопридонес во исто време и со истите фондови како и спортскиот центар ‘Треска. Скопјани знаат што се случи со езерото Треска, а сега знаат што се случило и со пропаднатата сала ‘Расадник’. Наместо да крие, да бега од новинарите и дрско да ја манипулира јавноста дека била успешен менаџер на фирми, Арсовска ѝ должи на јавноста одговор каде е имотот што го стекнала како менаџер во претпријатија за кои тврди дека успешно ги менаџирала“, беше нагласено на прес-конференцијата од градската организација на СДСМ.