Праведниот и траен мир мора да ја вклучува Украина, изјави денеска портпаролката на Европската комисија, Паула Пињо.

„Да резимираме, ништо за Украина без Украина, знаеме дека секој праведен и траен мир мора да ја вклучи Украина“, рече Пињо на прес-конференција.

Таа нагласи дека безбедноста на Украина е безбедност и на ЕУ и дека Унијата инсистира на позицијата за независност, суверенитет и територијален интегритет на Украина.

Портпаролката за надворешна политика, Анита Хипер, пак, изјави дека агресијата не смее да се наградува и дека секој мир мора да биде одржлив бидејќи лошиот договор води до нова војна.

„Важно е да се има предвид дека Русија е агресорот, тука и не може да биде наградена за агресија, а кога станува збор за какви било мировни договори, тие мора да бидат одржливи; лошиот договор ќе доведе до нова војна“, рече Хипер.

НАТО ја тестира својата способност за брзо распоредување во Источна Европа, без директна помош од САД, а Вашингтон го менува својот пристап кон европската одбрана и војната во Украина, пишува АП.

Шестнеделната вежба се одржува во Бугарија, Романија и во Грција. Во вежбата учествуваат речиси 10.000 војници од девет земји, што претставува најголема планирана операција на НАТО оваа година.

Steadfast Dart 25 is underway!

In January and February 2025, #NATO will showcase its strength and readiness during exercise #SteadfastDart25.

Bringing together air, land, maritime, and special operations forces, the exercise highlights NATO’s multi-domain capabilities and its… pic.twitter.com/ycOxJicRkV

— NATO Rapid Deployable Corps Italy (@NRDCITA) January 25, 2025

Отсуството на американски сили доаѓа во време кога европските земји се обидуваат да ја зголемат својата воена самодоволност поради загриженоста за посветеноста на администрацијата на Трамп за колективна одбрана и нејзините барања за зголемување на европскиот воен буџет, наведува АП.

🇹🇷 TCG Yzb. Güngör Durmuş, TCG Ayvalık and 🇫🇷 FS Capricorne, assigned to #SNMCMG2, conducted mine countermeasures operations during Exercise Steadfast Dart 25.

These operations aim to ensure the safety of maritime routes and strengthen cooperation among allied forces.… pic.twitter.com/I7rIFqit4v

— NATO Maritime Command (@NATO_MARCOM) February 13, 2025

Американскиот претседател Доналд Трамп вчера ја објави својата намера директно да преговара со Русија. Американскиот секретар за одбрана, Пит Хегсет, на својата прва средба со колегите од НАТО во Брисел ги повика европските земји драстично да ги зголемат своите воени трошоци и да преземат несразмерен дел од финансирањето за помош на Украина.

Грчките и шпанските маринци денеска водеа воена демонстрација на амфибиски напад во близина на централниот грчки град Волос, што ја означи првата оперативна употреба на новите Сојузнички сили за реакција (АРФ) на НАТО.

Украина и Европа не смее да бидат исклучени од идните мировни преговори за ставање крај на војната во Украина, изјави украинскиот министер за надворешни работи, Андриј Сибиха, во интервју за „Монд“ објавено денеска.

Европските лидери сакаат место на масата во мировните преговори за Украина откога американскиот претседател Доналд Трамп директно разговараше со рускиот претседател Владимир Путин и им нареди на највисоките американски претставници да почнат разговори за ставање крај на војната во Украина.

„Не можете да зборувате за Украина без Украина, ниту за Европа без Европа“, рече Сибиха.

Додаде дека украинското членство во НАТО е најевтиниот начин трансатлантската алијанса да ја гарантира украинската безбедност и дека не треба да има компромиси, кои би му наштетиле на територијалниот интегритет и суверенитет на Украина.

„Ние сакаме сеопфатен договор. Тоа е во интерес на САД. Со лидерството на Трамп, со силна европска посветеност и европско единство, имаме можност да му дадеме нов момент на овој процес. Но, колку што знам, нашите американски сојузници сè уште не ги финализирале своите планови“, додаде тој.

„Сите наши сојузници рекоа дека патот на Украина кон НАТО е неповратен. Таа можност е во нашиот устав. Тоа е во наш стратешки интерес“, рече Сибиха.

Путин и Трамп разговараа телефонски повеќе од еден час во средата. Трамп тогаш најави почеток на преговорите и рече дека не е практично Украина да добие членство во НАТО.

Одлуката на Трамп ги шокира европските престолнини, кои инсистираат да играат централна улога во мировните преговори бидејќи веруваат дека секој договор ќе има последици врз нивната безбедност.

Трамп рече дека Путин сака војната да заврши и дека разговарале за постигнување прекин на огнот во не толку далечна иднина.

„Тој сака да заврши. Не сака прекин, а потоа борбите да продолжат шест месеци подоцна“, им рече Трамп на новинарите во Овалната соба.

„Мислам дека сме на пат кон постигнување мир. Мислам дека претседателот Путин сака мир, претседателот Зеленски сака мир и јас сакам мир. Само сакам да видам како луѓето престануваат да се убиваат“, додаде тој.

Кремљ објави дека Путин и Трамп се договориле да се сретнат и дека Путин го поканил Трамп да ја посети Москва. Трамп рече дека нивниот прв состанок веројатно ќе се одржи набргу во Саудиска Арабија.

Во објава на својата платформа за социјалните медиуми Трамп истакна дека државниот секретар, Марко Рубио, директорот на ЦИА, Џон Ретклиф, советникот за национална безбедност, Мајкл Валц, и пратеникот за Блискиот Исток, Стив Виткоф, ќе ги водат преговорите за ставање крај на војната.