Македонија
Андоновски: Шилегов не потпишал налози за да се исплатат плати на вработените во градските претпријатија
Негрижата на поранешниот градоначалник Петре Шилегов кон сите, но најмногу кон вработените во Градот Скопје и градските претпријатија, има свој ефект и по неговото заминување од функцијата, обвини Стефан Андоновски, член на ИК на ВМРО-ДПМНЕ.
Тој додаде дека поранешниот градоначалник си заминал од функцијата, без да ги потпише решенијата за субвенционирање на платите во градските јавни претпријатија.
„ Петре Шилегов не потпишал налози за да се исплатат плати на вработените во градските претпријатија. Стотици вработени останаа со задоцнети месечни примања затоа што на Петре Шилегов му било тешко да ги исплати платите.
Шилегов го остави градот во хаос, а вработените во јавните претпријатија под Град Скопје без плати. Освен што овие претпријатија се направени загубари во последните 4 години, сега и вработените не можат да ја земат својата плата поради неодговорниот однос на претходниот градоначалник.
Петре Шилегов имаше време од една недела по изборите, но наместо да подели редовни плати на вработените, времето го потроши за да потпишува договори од 240 илјади евра да го осветлува Скопје со светилки во време на енергетска криза.
Петре Шилегов имаше време од една недела по изборите, но наместо да подели редовни плати на вработените, го потроши времето да додели награди на Венко Филипче и на Денко Малески. На првиот, затоа што најкатастрофално се справува со корона-пандемијата. А на вториот затоа што смета дека Македонците и Бугарите се еден ист народ.
Вработените треба да бидат спокојни. Новото раководство на градот Скопје во најкраток можен рок ќе го разреши оставениот проблем од претходниците. Вработените во претпријатијата ќе можат да сметаат на целосна исплата на нивните плати и надоместоци“, порача Андоновски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Акредитирани 1078 домашни и 770 странски набљудувачи за изборите
За вториот круг од претседателските избори и парламентарните избори на 8 мај акредитирани се вкупно 1999 набљудувачи, преведувачи и странски новинари. Најмногу акредитирани се домашни набљудувачи – 1078. Изборите ќе ги следат и 770 странски набљудувачи за чии потреби се ангажирани и 85 преведувачи.
За известување од изборите, акредитирани се 66 странски новинари, меѓу кои и од Ројтерс, Асошиејтед прес, Ал Џезира и Франс прес.
Најмногу домашни набљудувачи акредитирало Здружението за развој на општествено – социјални иновации „ВАКЕ УП“ Скопје – 752, потоа Фондација Ромите за демократија – 151, Цивил – 82, Центарот за безбедносни истражувања – 46, Институтот за меѓународни односи и стратегии Охрид – 20, Националниот ромски центар Куманово – 14, Здружението за промоција и развој инклузива Куманово – 12 и Македонскиот центар за културен развој – еден набљудувач.
Специјалната мисија за проценка на изборите на ОБСЕ/ОДИХР има акредитирано 410 набљудувачи, 14 експерти и 31 преведувач, најмногу од странските набљудувачи. Парламентарното собрание на ОБСЕ (OSCE PA) има акредитирано 138 набљудувачи, Амбасадата на Соединетите американски држави во Скопје – 68 набљудувачи и 33 преведувачи, Парламентарното собрание на Советот на Европа – ад хок комисијата за набљудување на претседателските избори во Република Северна Македонија – 33 набљудувачи и 20 преведувачи, Иницијативата за дијалог и демократија Силба 30, Централната изборна комисија – Република Косово – 13, Европскиот парламент – 12 и други.
Македонија
Бојан Јовановски: Повикан сум на информативен разговор во полиција, ова е директен притисок и обид за цензура
Бојан Јовановски – Боки 13 соопшти дека денеска во 10 часот е повикан на информативен разговор во П.С Кисела вода (Пролече) во врска со пријава за загрозување на безбедност согласно член 144 од КЗ.
„Ова го чувствувам за директен притисок и обид за цензура од страна на засегнатите лица во врска со мојот настап кај „Лазаров“!“, објави Бојан Јовановски.
Јовановски претходно вчера објави дека веќе неколку дена е цел на закани и притисоци со цел да го откаже второ гостување на поткастот.
Македонија
Доаѓа нестабилно време со пороен дожд и грмежи
Во попладневните часови ќе има изолирана појава на нестабилност со краткотраен пороен дожд и појава на грмежи. Потоа од среда до петок под влијание на влажни бранови во поголем дел од земјава ќе биде нестабилно со пороен дожд и грмежи. Локално процесите ќе бидат поинтензивни во форма на невреме со пообилен дожд за кратко време и засилен ветер. Дневните температури од четврток ќе бидат во опаѓање.
Во Скопје времето ќе биде стабилно и релативно топло. Од среда во попладневните часови ќе биде променливо облачно и нестабилно со повремени врнежи од дожд и грмежи. Во делови од котлината ќе има услови за појава на невреме со пообилен пороен дожд за кратко време и засилен ветер.
Препорака: Во случај на појава на електрични празнења се препорачува поголема внимателност, да не се престојува на отворен простор и под осамени дрвја.