Американскиот претседател Барак Обама изјави во неделата дека во текот на седмицава ќе го изнесе својот план за пресметка со џихадистите од Исламската држава, за која вели дека може да стане закана и за САД.

Според најавата, челникот на САД во среда треба да одржи говор во кој ќе го изложи својот план, откако претходно во вторник Барак Обама ќе се сретне со челниците на фракциите во Конгресот за да ја побара нивната поддршка за својата стратегија за справување со радикалната сунитска групација Исламска држава која се одликува со особена свирепост во пресметката со противниците.„Сакам американскиот народ да го разбере карактерот на заканата и како ќе ја решиме, и дека треба да верува оти ќе можеме да ја решиме. Следната фаза е да се прејде во напад“, изјави Обама во интервјуто за американската телевизиска мрежа NBC, кое беше емитувано во неделата.Според Обама, Исламската држава со текот на времето може да прерасне во закана за САД, иако засега не е така. „Сакам на сите да им биде јасно дека засега немаме информации за закани кон татковината“, рече. Меѓутоа, имајќи предвид дека Исламската држава привлекува илјадници странски борци од Западот, кои би можеле „непречено“ да допатуваат во САД, Обама истакна дека „со текот на времето, тоа може да претставува сериозна закана за татковината“.Притоа Обама го исклучи испраќањето на американските копнени сили во Ирак или во Сирија, велејќи дека тоа „не е исто како Ирачка војна“.За меѓународната коалиција која започна да ја собира на минатонеделниот самит на НАТО во Велс, Обама рече дека тоа ќе биде „како антитерористичката кампања кој ја водиме последните, пет, шест, седум години“. „Ќе бидеме дел од меѓународната коалиција, изведувајќи воздушни напади за да го поддржат дејствувањето на земјата на ирачките и на курдските сили“, додаде.Јадрото на коалицијата го чинат САД и уште девет држави. „Систематски ќе ги кастриме нивните капацитети. Ќе ја намалиме територијата којашто ја контролираат. И на крајот ќе ги победиме“, порача Обама.Обама не одговори директно дали ќе ги одобри воздушните напади врз позициите на џихадистите во Сирија. Претходно зборувајќи за оваа тема американскиот претседател рече дека Вашингтон доколку прибегне на овој чекор нема да го консултира Дамаск, кој, пак, соопшти дека американските напади мора да бидат во координација со владата на претседателот Башар ал-Асад, кој инаку е трн во окото на Западот како регионален сојузник на Русија, и три ипол години ги поддржуваат сунитските бунтовници кои се обидуваат да го соборат. „Стратегијата за Ирак и за Сирија се состои во тоа што ќе ги прогонуваме припадниците на Исламската држава каде и да се наоѓаат“, додаде.Обама истакна дека САД очекуваат од сунитските арапски држава во регионот, вклучително и Саудиска Арабија, Јордан, Обединетите Арапски Емирати, како и Турција, да се придружат во помошта за справување со џихадистите. „Мислам дека ви е (…) можеби првпат апсолутно јасно дека проблемот за сунитските држави во регионот, од кои многу се наши сојузници, не е само Иран (кој не е арапска земај и во кој се доминантни шиитите). Ова не е само сунитско-шиитско прашање“, реќе американскиот претседател./крај/мф/сн

Извор: NBC News