Македонија
Даути: Институциите да преземат соодветни мерки со цел владеење на законите

Адвокатот Мерџан Даути ги повика институциите да преземат соодветни чекори со цел почитување на законите откако судот денеска ги одби сите барања за произнесување на одбрната во предметот ТНТ.
„Како што најавив, обвинителот Бурим Рустеми, денеска, на главната расправа на 16.11.2021 година, на судскиот случај познат за јавноста ТНТ, се произнесе во врска со доказите на одбраната и не даде согласност за да се прочитаат доказите на одбраната, иако сѐ уште не се прочитани и изведени доказите предложени од стана на поранешното СЈО.
Во оваа пригода сакам да ве информирам и да ги повикам надлежните институции да преземат соодветни чекори со цел почитување на законите во Република Северна Македонија. Имено, јавниот обвинител ме информира претходно дека предметот ТНТ, како и другите предмети што ги застапува пред Основниот кривичен суд, имал договор со судот да се завршат до крајот на годината, т.е. најдоцна до 15.12.2021 година.
Успеал, му честитаме. Се поставува прашањето каде е тука еднаквоста на оружјата кога претходно Обвинителството и судот договараат што треба да се случи на главна расправа.
Во согласност со горенаведото, ве молам итно да преземете соодветни мерки со цел владеење на законите во Република Северна Македонија и водење судски постапки во согласност со позитивните законски прописи“, пишува Даути во дописот до медиумите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Собранието ќе формира комисија за избор на нов претседател на антикорупциската

Собраниската Комисија за прашања на изборите и именувањата во 12 часот ќе одржи седница на која се очекува да ја формира Комисијата за селекција на кандидати за нов претседател на Државната комисија за спречување на корупцијата (ДКСК).
Процесот следи откако на 5 август беше распишан јавен оглас, со рок за пријавување од 10 дена. Оваа постапка се спроведува по оставката на претходната претседателка Татјана Димитровска, која е обвинета за оддавање службена тајна и компјутерски фалсификат.
Според Законот за спречување на корупцијата и судирот на интереси, до изборот на нов претседател, функцијата ја врши заменик-претседателот на ДКСК. Новиот претседател мора да има најмалку десет години работно искуство, од кои осум во областа на борбата против корупцијата, владеењето на правото или добро управување.
Македонија
Свечена седница по повод 24 години од потпишувањето на Охридскиот рамковен договор

Во Владата ќе се одржи одбележување на 24 години од потпишувањето на Охридскиот рамковен договор.
По тој повод со почеток во 10:00 часот во Свечената сала во Владата на Република Северна Македонија ќе се одржи свечена седница на која ќе се обрати премиерот Христијан Мицкоски.
Настанот ќе биде пренесуван во живо на „Фејсбук“ и „Јутуб“ каналот на Владата.
Охридскиот рамковен договор беше потпишан на 13 август 2001 година помеѓу претставниците на тогашните најголеми политички партии и специјални претставници на ЕУ и на САД.
Македонија
Сончево и многу топло со мала локална облачност: максималната температура до 39 степени

Времето денеска ќе биде сончево и многу топло со мала локална облачност. Ќе дува слаб до умерен ветер од југоисточен правец. Минималната температура ќе биде во интервал од 13 до 21, а максималната ќе достигне од 32 до 39 степени.
Во Скопје сончево и многу топло со слаб до умерен ветер од југоисточен правец. Минималната температура ќе се спушти до 19, а максималната ќе достигне до 38 степени.
Времето во наредните денови
Ќе се задржи сончево и топло време со умерена облачност преку денот. Ќе дува слаб до умерен ветер претежно од југоисточен правец.