Македонија
Донација на 200.070 вакцини од Полска
Министерот за здравство, Венко Филипче, заедно со првата дама на Република Полска, Агата Корнхаузер-Дуда, и првата дама на Република Северна Македонија, Елизабета Ѓоргиевска, го посети Институтот за трансфузиона медицина, каде што се складирани 200.070 вакцини од производителот „Фајзер/Бионтек“, кои Република Полска ѝ ги донира на Република Северна Македонија.
„Во последните месеци живееме во натпросечно тешка ситуација предизвикана од коронавирусот, непријател што ги напаѓа народите во целиот свет. Во тој контекст, сметам дека меѓународната соработка е од особена важност бидејќи само со помош на меѓународната соработка можеме да се бориме со овој непријател. Ме радува тоа што за време на оваа официјална посета на Северна Македонија можам да предадам 200 илјади дози вакцини од производителот ‘Фајзер’ како донација за македонскиот народ“, изјави првата дама на Република Полска, Агата Корнхаузер-Дуда, упатувајќи апел до сите оние што не се вакцинирани да го дадат својот придонес за постигнување колективен имунитет и да се вакцинираат.
Првата дама на Република Северна Македонија, Елизабета Ѓоргиевска, истакна дека оваа донација е уште една потврда за пријателството меѓу македонскиот и полскиот народ, но и чин на солидарност, кој ни е неопходен за време на оваа глобална криза.
„Во изминатите две години, верувам дека секој од нас имал некој во своја близина што бил болен од Ковид-19. Верувам и дека голем број од нас загубија блиски луѓе, роднини, пријатели. Затоа, сметам дека со оглед на сите податоци што постојат и што ни се достапни, само вакцината е единствен излез од оваа ситуација. Би сакала да ги охрабрам сите што немаат примено вакцина, заради себе, заради нивните блиски и заради сите во околината, да ја примат што побргу бидејќи повторно се соочуваме со голем број заболени секојдневно. Само со вакцинацијата, односно со масовната имунизација, ќе постигнеме излез од оваа криза“, рече таа.
Министерот за здравство, доктор Венко Филипче, изјави дека овие две години покажале колку всушност се важни помошта и солидарноста од другите земји истакнувајќи дека Полска е меѓу првите земји што го најавиле механизмот на солидарност и донација на вакцини.
„Со оваа значајна количина од 200 илјади вакцини од производителот ‘Фајзер’, нашите количини во овој момент практично се удвојуваат, односно имаме вкупно 470 илјади вакцини. Ова е сосема доволно за кус временски период, во согласност со новите мерки, кои верувам дека Владата ќе ги усвои, граѓаните да се вакцинираат и да спречат повторно да растат бројките и повторно да се соочиме со голем број заболени, а со тоа да се оптоварат болничките капацитети“, изјави Филипче.
„Верувам дека граѓаните ќе сфатат дека сите овие мерки, кои не е лесно да се препорачаат, се неопходни да го заштитиме здравствениот систем, да ги заштитиме и здравствените работници, кои неуморно речиси две години, интензивно, без прекин, работат деноноќно, а ние пренаменуваме други одделенија во ковид-центри со цел да се заштитат и државата и здравствениот систем“, заврши тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Пораките на Марко Рубио од Минхенската безбедносна конференција се јасен сигнал за сите сојузници
Пораките на американскиот државен секретар Марко Рубио од Минхенската безбедносна конференција се јасен сигнал за сите сојузници, светот веќе не функционира по старите правила. Како Влада, продолжуваме посветено да го зајакнуваме нашето место во трансатлантската заедница.
Подготвени сме да одговориме на предизвиците, да ја модернизираме нашата одбрана и да обезбедиме сигурна иднина за нашите граѓани, објави премиерот Христијан Мицкоски, од Минхен.
Мицкоски од вчера престојува во повеќедневна посета на Сојузна Република Германија, каде што учествува на 62. Минхенска безбедносна конференција, на која, како што соопшти владината прес-служба, ќе ја реафирмира определбата на државата за предвидлив и фер процес на интеграција во Европската Унија, без дополнителни билатерални условувања.
Македонија
Убиство во Челопек, 78-годишна жена задушена со перница
Полицијата уапси дваесет и петгодишен жител на село Малотино од општина Старо Нагоричане, осомничен за убиство на седумдесет и осумгодишна жителка на село Челопек, соопшти денеска СВР Куманово. Како што наведуваат од кумановската полиција, на 12-ти февруари, осомничениот влегол во нејзиниот дом, физички ја нападнал и со перница ја задушил жената.
-Вчера во 19:30 часот во село Драгоманце, општина Старо Нагоричане, полициски службеници од Полициското одделение Старо Нагоричане го лишиле од слобода Т.Б.(25) од с. Малотино, општина Старо Нагоричане, поради сомнение дека сторил кривично дело по член 123 од Кривичниот законик. Тој се сомничат дека на 12-ти февруари во нејзиниот дом физички ја нападнал и задушил со перница М.С.(78) од село Челопек, општина Старо Нагоричане, по што таа починала на местото, соопшти полицијата.
Тој се сомничи дека извршил повеќе кривични дела „тешка кражба“ во повеќе села на подрачјето на општина Старо Нагоричане. Известен е јавен обвинител, а лицето било задржано во полициска станица. По целосно документирање на случајот, против него биде поднесена соодветна пријава.
Македонија
СДСМ: Две недели без одговор како 5 тони дрога поминале преку граница, бараме одговорност од Мицкоски
СДСМ обвинува дека и по 14 дена нема одговор од институциите за, како што велат, „најголемиот нарко-скандал во регионот“, поврзан со транспорт на пет тони дрога преку државната граница.
Од партијата посочуваат дека молчат премиерот Христијан Мицкоски, како и повеќе функционери, оценувајќи дека тоа отвора сомнежи за одговорност на власта.
„Овој гласен молк е најсилна потврда дека скандалот води до врвот на Владата“, се наведува во соопштението.
СДСМ реагира и на изјавите дека биле запленети 100 тони марихуана, оценувајќи дека доколку постоело толкаво производство, тоа претставува сериозен пропуст на институциите.
Според нив, за такво количество би била потребна површина од над 30 хектари, поради што прашуваат дали биле извршени контроли од надлежните служби, вклучително и полицијата, инспекторатите и безбедносните агенции.
Партијата дополнително прашува како пет тони дрога биле транспортирани со товарни возила покрај системите за надзор, камерите и граничните контроли.

