Свет
Канада ја одобри вакцината на „Фајзер“ за деца на возраст од 5 до 11 години

Канадските здравствени власти објавија дека ја одобруваат употребата на вакцината против Ковид-19 на „Фајзер/Бионтек“ за деца на возраст од 5 до 11 години.
„По целосно независен научен преглед, Министерството за здравство утврди дека придобивките од оваа вакцина за деца на возраст од 5 до 11 години ги надминуваат опасностите“, се вели во соопштението на властите.
Дозата на вакцината за овие деца е намалена на 10 микрограми од инјекција или трипати помалку од вообичаената доза. Инјекциите треба да се даваат со разлика од три недели, соопшти Health Canada, но не кажа кога ќе почне вакцинацијата.
„Ние работиме тесно со производителот и по одобрувањето од Health Canada, очекуваме да ги добиеме дозите многу бргу“, рече Тереза Там, главен канадски службеник за јавно здравје, на прес-конференција.
Високиот функционер прецизира дека федералните власти соработуваат со 13 провинции и територии за да се уверат дека сите се подготвени за испорака, логистика и спроведување на педијатриска имунизација.
За време на клиничките испитувања, имунолошкиот одговор на децата на возраст од 5 до 11 години бил сличен на оној на младите луѓе на возраст од 16 до 25 години. Вакцината била 90,7 отсто ефикасна во спречувањето Ковид-19 кај деца на возраст од 5 до 11 години и не се забележани сериозни несакани ефекти, соопшти Министерството.
„Фајзер“ аплицира за одобрување на 18 ноември врз основа на податоците од студиите спроведени на 2.268 деца од таа возрасна група.
Во средата американската биотехнолошка компанија „Модерна“ поднесе барање за одобрување на својата вакцина против Ковид-19 за деца на возраст од 6 до 11 години.
Во Канада повеќе од 85 отсто од луѓето на возраст над 12 години се вакцинирани против Ковид-19.
На друго место во светот, мал број земји, вклучувајќи ги Израел и Соединетите Американски Држави, досега ја одобрија вакцината на „Фајзер/Бионтек“ за деца.
Кина, Обединетите Арапски Емирати, Камбоџа и Колумбија исто така почнаа да ги вакцинираат децата помлади од 12 години, но со кинески вакцини.
Израел во вторник почнува да ги вакцинира децата на возраст од 5 до 11 години со вакцината на „Фајзер/Бионтек“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Се нуди награда од 50.000 долари за осомничен за двојно убиство во Минесота

Американските власти во Минесота и натаму трагаат по 57-годишниот Венс Лутер Бетлер, осомничен за убиство на демократската пратеничка Мелиса Хортман и нејзиниот сопруг, како и за ранување на сенаторот Џон Хофман и неговата сопруга.
Државното Биро за кривични дела на Минесота објави дека Бетлер е висок 195 см, тежи околу 100 килограми, има кафеава коса и очи, и последен пат бил виден вчера во Минеаполис, облечен во светол каубојски шешир, темна кошула со долги ракави и светли панталони, носејќи темна торба.
– Не знаеме дали има соучесници, можно е да бил со други лица. Сакам да ги сослушаме сите што можеби биле во контакт со него, изјави полицискиот претставник Дру Еванс.
ФБИ објави фотографија од Бетлер како стои пред домот на еден пратеник маскиран како полицаец, и понуди награда од 50.000 долари за информации што ќе доведат до негово апсење и осуда.
Бетлер живее во округот Сибли, близу градот Грин Ајл, и работи како директор за безбедносни патроли во приватна фирма. Во минатото бил генерален менаџер во синџир продавници и фабрика за храна.
Во 2016 година бил назначен од тогашниот гувернер Марк Дејтон за претставник од приватниот сектор во Советот за развој на работната сила, организиран од гувернерот. Во истиот совет членувал и сенаторот Хофман, жртвата на нападот.
Засега не е јасно дали Бетлер и Хофман имале лична поврзаност.
Американските власти нападите ги опишаа како „чинови на политичко насилство“.
Свет
Германија, Франција и Велика Британија нудат итни преговори со Иран

Германија, Франција и Велика Британија се подготвени веднаш да започнат разговори со Иран околу неговата нуклеарна програма во обид да се намали тензијата на Блискиот Исток, изјави германскиот министер за надворешни работи Јохан Вадефул.
– Се надевам дека ова сè уште е можно, изјави Вадефул за германската јавна телевизија АРД, додавајќи дека Техеран претходно ја пропуштил можноста за конструктивни разговори.
Тој нагласи дека деескалацијата и долготраен мир во регионот се можни само ако Иран престане да биде закана за регионот, Израел и Европа.
Свет
Еден загина откако се урнаа два воздушни балони над долината Ихлара, дел од познатата туристичка област Кападокија

Два воздушни балони се урнаа во централна Турција, при што загина најмалку едно лице, а 19 се повредени, јави турската државна телевизија ТРТ.
Загинатиот бил еден од лицата што управувале со балоните.
Несреќата се случила при лет над долината Ихлара, дел од познатата туристичка област Кападокија, која е позната по балонските летови и живописниот пејзаж.