По трагичната несреќа во Бугарија, во болницата „Пирогов“ во Софија примени се 17-годишно девојче и шест возрасни лица, изјави д-р Маја Аргирова од Клиниката за изгореници при медицинската установа за БТА. Таа нагласи дека тие не се во животна опасност.

Девојчето и петмина од возрасните се на Клиниката за изгореници, а еден е упатен на Клиниката за трауматологија. На сите им се прават дополнителни прегледи во болницата.

Несреќата се случи на магистралниот пат „Струма“ малку по 2 часот по полноќ кај селото Боснек. Автобусот со македонски регистарски ознаки сообраќал во правец на Република Северна Македонија. Возилото во Бугарија влегло од Турција. Малку по полноќ, автобусот застанал на бензинска пумпа во близина на Софија по што продолжил. Несреќата се случила еден час подоцна.

Засега нема потврда дали автобусот првин излетал од патот, а потоа се запалил или најпрвин избувнал пожар во возилото. Според првичните информации, причината поради која луѓето не можеле да се спасат е тоа што автобусот се превртел.