Регион
Во Србија уапсени 11 лица за педофилија, договарале средби со деца преку интернет
МВР на Србија денеска уапси 11 лица што ширеле детска порнографија, снимале и им дистрибуирале порнографски содржини на малолетници, пишуваат регионалните медиуми.
Според полициското соопштение, овие лица контактирале со децата преку интернет и со нив договарале средби за сексуални односи.
„Благодарение на ефикасната и упорна работа на припадниците на МВР, Одделот за сузбивање високотехнолошки криминал на СБПОК, денеска во акцијата ‘Армагедон’ се уапсени 11 лица за ширење детска порнографија, снимање и дистрибуција порнографски содржини на малолетници преку интернет и договарање средби со нив за сексуални односи“, изјави министерот за внатрешни работи, Александар Вулин.
„Како човек и татко на малолетни деца, длабоко се срамам затоа што тие биле меѓу нас, како министер за внатрешни работи ветувам дека ќе се борам уште посилно против педофилите и предаторите што ги демнат нашите деца. Секое дете ќе биде заштитено. Секој педофил и сексуален предатор ќе биде пронајден и уапсен“, рече тој.
Особено ги молам родителите да се грижат за своите деца, да обрнат повеќе внимание и да ги слушаат, да внимаваат со кого комуницираат нивните деца“, изјави Вулин, пренесуваат агенциите.
Во акцијата „Армагедон“ уапсени се М. М. (1995) од Пирот, М. М. (1995), М. М. (1983), И. М. (1981) и Ф .Б. (1999), сите од Белград, како и Н. Т. (1995) од Топоница, А. С. (1978) од Панчево, Д. М. (1984) од Суботица и С. Н. (1981) од Турија.
Уапсени се и Ф. Р. (1996) од Чачак и И. А. (1964) од Власотинце.
Сите се во притвор, соопшти полицијата.
Тие се обвинети затоа што подолго време преку интернет користеле една апликација за споделување податоци или еден пребарувач за да ги прикријат локациите за преземање, складирање компјутерски харддискови и споделување содржини создадени со искористување деца за порнографски цели.
Исто така, постои сомнеж дека комуницирале со малолетници на социјалните мрежи, им праќале фотографии и видеоснимки од порнографски содржини и добивале содржини создадени со експлоатација на малолетници, но и договарале средба со нив поради сексуален однос, се вели во образложението на полицијата.
При претресот на становите на осомничените биле пронајдени поголемо количество видеоклипови и фотографии создадени со искористување малолетници во порнографски цели, содржини за сексуална експлоатација на деца на возраст од пет до 12 години, како и други фотографии и видеа на деца што се злоупотребувани за порнографски цели.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Кси слета во Србија: Претседателот на Кина пречекан од Вучиќ и државниот врв
Заедно со претседателот на Србија Александар Вучиќ и првата дама, кинескиот претседател Кси Џинпинг беше пречекан на црвениот тепих од српската делегација составена од премиерот Милош Вучевиќ, претседателката на Собранието Ана Брнабиќ, министерот за надворешни работи Марко Ѓуриќ, српската амбасадорка во Кина Маја Стефановиќ и кинескиот амбасадор во Белград Ли Минг со сопругата.
Свечениот пречек на кинеската делегација која брои 400 лица е закажан за в среда пред палатата „Србија“.
Домаќин на претседателот Кси Џинпинг ќе биде српскиот претседател Александар Вучиќ, а двајцата лидери ќе разговараат за широк спектар на теми – од политички, економски и технолошки до соработка во областа на културата.
За време на дводневната посета на Кси Џинпинг на Србија, планирано е да се потпишат над 30 договори.
Беше организиран и свечен ручек на кој кинескиот претседател ќе има можност да дегустира српски јадења и вина, а ќе има и музичка програма на српски и кинески јазик, која ќе заврши со песната „Ова е Србија“.
Поради доаѓањето на кинескиот претседател преземени се големи безбедносни мерки, па неговата делегација ќе ја обезбедуваат 3.400 полицајци.
Регион
Руски хакери ги нападнаа веб-страниците на косовските институции
Руски хакери ги нападнаа веб-страниците на косовските институции, изјави министерот за одбрана Ејуп Македончи.
„Група руски хакери извршија сајбер-напад на Косово како одмазда за мојата изјава за поддршка на Украина“, изјави Македончи.
Во текстот на руските хакери се споменува говорот на тој косовски министер кој, според нив, рекол дека „Косово е подготвено да и понуди воена помош на Украина“.
„Косово е подготвено да ги здружи колективните напори за поддршка на одбраната на Украина. Треба повеќе да размислат за ова“ – напишаа хакерите на руски, спомнувајќи го министерот Македончи.
Министерката за надворешни работи и дијаспора Доника Гервала објави дека „Русија врши хибриден напад на Косово“.
Гервала на мрежата „Х“ изјави дека „рускиот хибриден напад на Косово“ доаѓа по најавата за поддршка на Косово за Украина со воена опрема.
Регион
Александар Вулин: Пријателството меѓу Србија и Кина е челик затоа што го ковавме во оган
Вицепремиерот на Србија, Александар Вулин, на промоцијата на културната размена меѓу Кина и Србија на тема „Што ги делат планините и реките, пријателството обединува“, изјави дека пријателството меѓу двете земји е челик бидејќи е ковано во оган и дека Србија и Кина се разделени за многу работи, но најважното ги обединува, а тоа е одлуката на две држави да бидат слободни.
„Пријателството на нашите лидери, претседателот Вучиќ и претседателот Си Џинпинг, не обврзува да сториме сè, исто како нив, за нашите народи да бидат поблиски отколку што нè прави блиски географијата или историјата. Србите и Кинезите ги дели сè, ние сме различни во сè, но нас нè обединува она најважното – нашата одлука да бидеме слободни, нашата посветеност на најважната карактеристика на народите и луѓето – слободата“, рече Вулин на настан организиран од China Media Group.